قاراعاندى وبلىسىندا ءوزىن الەۋمەتتىك كومەك جوباسى رەتىندە كورسەتكەن ء«ۇمىت سامعاۋ» ۇيىمى قارجى پيراميداسىن ۇيىمداستىردى دەگەن كۇدىكپەن تەرگەلىپ جاتىر. توپ 400-دەن استام ازاماتتىڭ سەنىمىنە كىرىپ, 100 ملن تەڭگەدەن استام قاراجات جيناعان, دەپ حابارلايدى Egemen.kz.
تەرگەۋ مالىمەتىنشە, ۇيىم ءوزىن قايىرىمدىلىق جوباسى رەتىندە تانىستىرىپ, جالعىزباستى انالارعا جانە تۇرمىسى تومەن جاندارعا ماتەريالدىق كومەك كورسەتۋدى ماقسات ەتكەنىن مالىمدەگەن.
الايدا شىن مانىندە ۇيىم ازاماتتاردى جوعارى تابىسقا ۋادە بەرىپ, قارجى پيراميداسىنىڭ كلاسسيكالىق ۇلگىسىمەن جۇمىس ىستەگەن. قاتىسۋشىلارعا سالعان قاراجاتىنىڭ كولەمىنە قاراي 300%-دان 800%-عا دەيىن پايدا تۇسەتىنى ايتىلعان. سالىم نەعۇرلىم كوپ بولسا, تابىس تا سوعۇرلىم جوعارى بولاتىنى تۋرالى شارتتار ۇسىنىلعان.
ناتيجەسىندە بەلگىلى بولعانداي, قاتىسۋشىلارعا تولەنگەن قاراجات ناقتى كاسىپكەرلىك نەمەسە ينۆەستيتسيالىق قىزمەتتەن ەمەس, كەيىن قوسىلعان سالىمشىلاردىڭ اقشاسى ەسەبىنەن بەرىلگەن. بۇل جۇيە ءبىراز ۋاقىت جۇمىس ىستەگەنىمەن, اقىر سوڭىندا جۇزدەگەن ادامنىڭ قارجىلىق شىعىنعا ۇشىراۋىنا سەبەپ بولعان.تەرگەۋشىلەردىڭ ايتۋىنشا, قارجى سحەماسىن ۇيىمداستىرعاندار وزدەرىنىڭ تۋىستارى مەن تانىستارىن «دروپپەر» رەتىندە پايدالانىپ, سالىمشىلاردىڭ اقشاسىن سولاردىڭ اتىنا اشىلعان بانك كارتالارى مەن شوتتارىنا قابىلداپ وتىرعان.
قازىرگى تاڭدا انىقتالعان مالىمەت بويىنشا, 400-دەن استام ادام اتالعان جوباعا قاتىسقان, ال جينالعان قاراجاتتىڭ جالپى كولەمى 100 ميلليون تەڭگەدەن اسىپ كەتكەن.
سوت شەشىمىمەن كۇدىكتى تۇلعانىڭ پاتەرى مەن كولىگىنە تىيىم سالىندى. قازىر ءىستىڭ بارلىق قاتىسۋشىلارى انىقتالىپ, تەرگەۋ شارالارى جالعاسىپ جاتىر.