استانا. 21 ناۋرىز. شۆەيتساريانىڭ نون قالاسىندا چەمپيوندار ليگاسىنىڭ شيرەك فينالى ءۇشىن جەرەبە تارتۋ ءراسىمى ءوتتى. ناتيجەسىندە, ءمادريدتىڭ قوس كومانداسى «رەال» مەن «اتلەتيكو» تاعى دا قارسىلاس اتانىپ وتىر. سونداي-اق, ءپاريجدىڭ پسج-سى «بارسەلونامەن» جارتىلاي فينالدىڭ جولداماسىن ساراپقا سالادى. بۇل تۋرالى egemen.kz حابارلادى.
سونىمەن چەمپيوندار ليگاسىنىڭ شيرەك فينالىندا مىنا كوماندالاردىڭ ويىنىن كورەمىز:
پسج – «بارسەلونا»;
«اتلەتيكو» – «رەال»;
«پورتۋ» – «باۆاريا»;
«موناكو» – «يۋۆەنتۋس».
شيرەك فينالدىڭ العاشقى ويىندارى 14-15 ساۋىردە وتەدى. ال قارىمتا كەزدەسۋلەر 21-22 ساۋىرگە جوسپارلانعان.
وتكەن ماۋسىمنىڭ فينالىندا «رەال» «اتلەتيكونى» 4:1 ەسەبىمەن جەڭگەنى ەسىمىزدە. نەگىزگى ۋاقىتتىڭ سوڭعى مينۋتىنا دەيىن 0:1 ەسەبىمەن جەڭىلىپ تۇرىپ, شەشۋشى ساتتە عانا سەرحيو راموس تارازى باسىن تەڭەستىردى. ال قوسىمشا ەكى كەزەڭدە كارلو انچەلوتتيدىڭ شاكىرتتەرى قارسىلاستارىن جۇندەي ءتۇتتى. 90 مينۋت بويى سالا الماعان گولدارىن وسى 30 مينۋتتىڭ ىشىندە قارشا بوراتقان «رەال» ويىنشىلارى ناعىز فينالعا لايىق ويىن كورسەتكەن بولاتىن. قوسىمشا كەزەڭدە گارەت بەيل, مارسەلو جانە كريشتيانۋ رونالدۋلار مەرگەندىگىمەن كوزگە ءتۇستى.
سول فينالدىق ويىننان كەيىن قوس كوماندا يسپانيا چەمپيوناتى, سۋپەركۋبوك جانە يسپانيا كۋبوگى جارىستارىندا التى رەت كەزدەستى. سونىڭ بىردە بىرىندە «رەال» جەڭىسكە جەتىپ كورگەن جوق. ءتورت ويىندا «اتلەتيكو» باسىم تۇسسە, ەكى ماتچ تەڭ اياقتالدى.
ءمادريدتىڭ قوس كومانداسى ەۋروكۋبوك باسەكەلەرىندە وسىمەن ءۇشىنشى رەت كەزدەسىپ وتىر. ونىڭ بىرەۋى بىلتىرعى فينالدىق ويىن. ال العاشقىسى 1958-1959 جىلعى سول كەزدەگى ەۋروپا چەمپيوندارى كۋبوگىنىڭ جارتىلاي فينالىندا تىركەلدى. ەكى ويىن قورىتىندىسى بويىنشا جالپى ەسەپ تەڭ اياقتالىپ (2:2), قايتا وينالعان ماتچتا «رەال» 2:1 ەسەبىمەن جەڭىسكە جەتكەن ەدى.
پسج مەن «بارسەلونانىڭ» بيىلعى ماۋسىمدا ءبىر توپتا بولعانىن بىلەمىز. سول سىندا ءپاريجدىڭ كومانداسى ءوز الاڭىندا 3:2 ەسەبىمەن جەڭسە, سىرت الاڭداعى ويىندا 1:3 ەسەبىمەن ەسە جىبەردى.
سونداي-اق, قوس كوماندا 2012-2013 جىلعى ماۋسىمنىڭ شيرەك فينالىندا دا ءبىر-بىرىنە قارسىلاس اتانعان ەدى. ەكى ويىن ناتيجەسى 3:3 ەسەبىمەن تەڭ اياقتالسا دا, سىرت الاڭدا سوققان گولىنىڭ سەپتىگىمەن جارىستى «بارسەلونا» جالعاستىردى. ال 1997 جىلى اتالعان قارسىلاستار كۋبوكتاردىڭ كۋبوگى جارىسىنىڭ فينالىندا كەزدەستى. روتتەردامدا وتكەن سول ويىندا كاتالونيانىڭ كومانداسى 1:0 ەسەبىمەن جەڭىسكە جەتتى. جالعىز گولدىڭ اۆتورى برازيليانىڭ داڭقتى ويىنشىسى رونالدو بولعانىن ايتا كەتەيىك.
«پورتۋ» 1987 جىلى ەۋروپا چەمپيوندارى كۋبوگىنىڭ فينالىندا «باۆاريامەن» ويناپ, 2:1 ەسەبىمەن جەڭگەن. ال ميۋنحەندىكتەر باستى ەۋروكۋبوك باسەكەسىنىڭ شيرەك فينالىندا «پورتۋدى» ەكى رەت اينالىپ وتكەن. العاشقىسى 1990-1991 جىلى تىركەلسە (جالپى ەسەپ 3:1), ەكىنشىسى 1999-2000 جىلعى ماۋسىمدا بولدى. ول كەزدە قوس ويىننىڭ ناتيجەسى بويىنشا «باۆاريا» 3:2 ەسەبىمەن باسىم تۇسكەن بولاتىن.
چەمپيوندار ليگاسىنىڭ 1997-1998 جىلعى ماۋسىمىندا جارتىلاي فينالدا «يۋۆەنتۋس» «موناكونى» جارىستان شىعارعانى بەلگىلى. العاشقى ويىندا ءتۋريننىڭ كومانداسى قارسىلاستارىن 4:1 ەسەبىمەن تاس-تالقان ەتسە, قارىمتا كەزدەسۋدە 2:3 ەسەبىمەن ەسە جىبەردى.
چەمپيوندار ليگاسىنىڭ بيىلعى فينالى 6 ماۋسىمدا بەرليندەگى «وليمپياشتاديون» ستاديونىندا وتەدى. جارتىلاي فينالدىڭ جەرەبەسى 24 ساۋىردە تارتىلىپ, ويىندار 5-6 جانە 12-13 مامىردا وتەدى دەپ كۇتىلۋدە.
ەلامان قوڭىر.
دەرەك: egemen.kz.
سۋرەت: uefa.com.