«ورتالىق ازيا – اقش» سامميتىندە دونالد ترامپقا قازاقستانعا قوناق بولۋ جوسپارىڭىزدا بار ما دەگەن ساۋال قويىلدى, دەپ جازادى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«قازاقستان مەن اقش جالپى قۇنى 17 ميلليارد دوللاردى قۇرايتىن كەلىسىمدەر جاسادى. ول اۆياتسيا, مينەرالدى رەسۋرستار جانە تسيفرلىق تەحنولوگيالار سەكىلدى باعىتتاردى قامتيدى. ءسىزدىڭ ويىڭىزشا, بۇل سەرىكتەستىكتىڭ قاي سالاسى ماڭىزدى؟ ەكىنشى سۇراق. ترامپ مىرزا, ءسىزدى قازاقستانعا كەلگەن العاشقى اقش پرەزيدەنتى دەپ قاشان ايتا الامىز؟ ءبىزدىڭ ەلگە قوناق بولۋ جوسپارىڭىزدا بار ما؟», دەدى ساۋال قويۋشى.
اقش پرەزيدەنتى بۇل ابدەن مۇمكىن ەكەنىن ايتتى.
«بۇل ابدەن مۇمكىن (قازاقستانعا ساپارمەن كەلۋ – رەد). بارلىق سالا وتە ماڭىزدى دەپ سانايمىن. ءبىر جىلدان كەيىن نە بولاتىنىن بىلمەيمىز. ءسىزدىڭ تابيعي رەسۋرسقا باي ەلىڭىز, سونداي-اق پاراساتتى پرەزيدەنتىڭىز بار», دەپ جاۋاپ بەردى دونالد ترامپ.