قازاقستاندا بۇكىل ەل بويىنشا اۋىل بالالارىنىڭ باسىن قوسقان IQanat 2025 وليمپياداسىنىڭ ءى تۋرى اياقتالدى. بيىل بۇل كەزەڭگە وقۋشىلاردىڭ رەكوردتى سانى – ەلىمىزدىڭ 170 اۋدانى مەن 3300 اۋىلىنان 64 000-نان استام سەگىزىنشى سىنىپ وقۋشىسى قاتىستى.
وليمپيادانى ۇيىمداستىرۋدا 1100 الامني جانە IQanat ۆولونتەرلەرى – تۇلەكتەر, مەكتەپ وقۋشىلارى جانە وتكەن جىلدارداعى فيناليستەر ماڭىزدى ءرول وينادى. ولار تىركەۋ جۇمىستارىنا كومەكتەسىپ, قاتىسۋشىلاردى قارسى الدى, وقۋشىلاردىڭ كوشىرىپ جازباۋىن قاداعالاپ, بالالاردى ءوز كۇشىنە سەنۋگە ۇمتىلدىراتىن قولداۋ مەن سەنىمدىلىك اتموسفەراسىن قالىپتاستىردى. بۇل – جوبانىڭ «giving back» قاعيداسىمەن ۇندەسىپ جاتىر. ونىڭ اياسىندا جوبانىڭ بۇرىنعى قاتىسۋشىلارى جاس ۇمىتكەرلەرگە ءوز جولىن ءجۇرىپ وتۋگە كومەكتەسەدى.
جوبانىڭ ءار جىلدارداعى قاتىسۋشىلارىنىڭ اراسىنداعى بايلانىس – IQanat-تىڭ ەڭ قۇندى داستۇرلەرىنىڭ ءبىرى. تۇركىستان وبلىسى شولاققورعان اۋىلىندا تۋعان اعايىندى سۇلتانمۇراتتاردىڭ وقيعاسى سونىڭ جارقىن مىسالى بولا الادى.
اعايىندىلاردىڭ كىشىسى قازبەك ى. التىنسارين اتىنداعى اۋىل مەكتەبىنىڭ 8-سىنىبىندا وقيدى جانە بيىل وليمپياداعا قاتىسىپ جاتىر. ول ءبىلىم سايىسىنا اعاسىنا ەلىكتەپ قوسىلىپ, ونىڭ ءىزىن باسۋدى ۇيعاردى. اعاسى جاقسىلىق وتكەن جىلى وليمپيادانىڭ ءۇش تۋرىنان دا ءساتتى ءوتىپ, توپ-100 جەڭىمپازدىڭ قاتارىنا ءىلىندى دە, بۋرابايداعى IQanat مەكتەپ-پانسيوناتىندا وقۋعا گرانت جەڭىپ الدى. قازىر ول ۇزدىك حالىقارالىق باعدارلامالار بويىنشا 10-سىنىپتا ءبىلىم الىپ جاتىر. بۇل – اعايىندىلاردىڭ وتباسى ءۇشىن ۇلكەن كومەك, ويتكەنى, بالالاردىڭ مەكتەپتەگى وقۋ, جاتىن جانە وزگە دە شىعىندارىن IQanat جوباسىنىڭ قامقورشىسى بولعان كاسىپكەرلەر ءوز موينىنا الادى.
«قازىر اعام IQanat-تا وقيدى, ءبىز ءجيى حابارلاسىپ تۇرامىز. ول ساباقتىڭ قالاي كەرەمەت وتەتىنىن, مەكتەپتىڭ كول جاعاسىنداعى ورماندا ورنالاسقانىن, ءجيى سەيىلگە شىعاتىندارىن جانە مۇعالىمدەر مەن سىنىپتاستارى تۋرالى كوپ اڭگىمەلەيدى. بۇل مەنى دە قاتتى ىنتالاندىرادى. وعان قوسا, اعام مەنىڭ وقۋىما كومەكتەسىپ, اقىل-كەڭەسىن ايامايدى. ءتىپتى, وليمپيادانىڭ ءى تۋرىنا دايىندالۋعا دا كومەكتەستى. بۇرىن ءبىز بىرگە تۇرىپ, بىرگە وسكەن ەدىك, اعاممەن قايتا بىرگە بولۋ – مەن ءۇشىن IQanat-قا تۇسۋگە شابىت بەرەتىن سەبەپتەردىڭ ءبىرى», – دەيدى قازبەك سۇلتانمۇرات.
مۇنداي وتباسىلارداعى بالالار ءۇشىن اۋىلداعى ءومىردىڭ بەرەتىن مۇمكىندىكتەرى كوپ ەمەس: رەپەتيتور دا, ۇيىرمەلەر دە, كەرەمەت مەكتەپتەر دە جوق. ولاردا بارى – ءبىر-ءبىرىنىڭ قولداۋى مەن ومىردەگى ۇلكەن ماقساتتارعا جەتۋدى كوزدەيتىن ارمان عانا. سوندىقتان, IQanat وليمپياداسى سىيلايتىن مۇمكىندىك ايرىقشا ماڭىزدى: ول بالالارعا ءوزىن كورسەتىپ, ءوز ءومىرىنىڭ تراەكتورياسىن وزگەرتۋگە كومەكتەسەدى.
وليمپيادانىڭ ءۇش تۋرىنان دا ءساتتى وتكەن جەڭىمپازدار مەتسەناتتاردىڭ ەسەبىنەن بۋرابايداعى IQanat مەكتەپ-پانسيوناتىندا وقي الادى نەمەسە وليمپيادادان كەيىنگى ءۇش جىلدىق سۇيەمەلدەۋ باعدارلاماسىنا قابىلدانادى. مۇندا بالالاردى ۇبت جانە حالىقارالىق ەمتيحاندارعا دايىندايدى, اعىلشىن ءتىلىن تەرەڭدەتىپ وقىتىپ, ءىت, كاسىپكەرلىك جانە زاماناۋي soft skills داعدىلارىن دامىتادى. مۇنىڭ ءبارى جاقسى جوعارى وقۋ ورنىنا تۇسۋگە دايىندالۋعا كومەكتەسەدى.
بۇگىندە IQanat – اۋىل بالالارىنىڭ ءوز الەۋەتىن اشىپ, دامىتۋىنا كومەكتەسەتىن ماقساتى ءبىر 240 كاسىپكەردىڭ قاۋىمداستىعى. جوبانىڭ ارقاسىندا IQanat تۇلەكتەرىنىڭ 94%-ى قازاقستان مەن شەتەلدىڭ ۇزدىك جوعارى وقۋ ورىندارىنا گرانت نەگىزىندە ءتۇسىپ, بۇگىندە الەمنىڭ 19 ەلىندە ءبىلىم الىپ جاتىر. ولار – ارمان مەن جىگەر كەز-كەلگەن جاعدايدان دا كۇشتى ەكەنىنىڭ جارقىن دالەلى.