مەملەكەت باسشىسى قاسىم-جومارت توقاەۆ بەلارۋس پرەمەر-ءمينيسترى الەكساندر ءتۋرچيندى قابىلدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
كەزدەسۋدە ەكىجاقتى ساۋدا-ەكونوميكالىق ىنتىماقتاستىق, ونەركاسىپ كووپەراتسياسى جانە مادەني-گۋمانيتارلىق ىقپالداستىق پەرسپەكتيۆاسى تالقىلاندى.
قاسىم-جومارت توقاەۆتىڭ پىكىرىنشە, الەكساندر ءتۋرچيننىڭ استاناعا جاساعان العاشقى رەسمي ساپارى قازاقستان مەن بەلارۋس اراسىنداعى ستراتەگيالىق سەرىكتەستىكتىڭ ايرىقشا سيپاتىن راستايدى, سونداي-اق ەكىجاقتى ىقپالداستىقتى ودان ءارى دامىتۋعا نيەتتى ەكەنىن كورسەتەدى.
ء«سىزدىڭ ساپارىڭىز مەملەكەتتەرىمىز اراسىنداعى ىنتىماقتاستىقتى دامىتۋ تۇرعىسىنان وتە ماڭىزدى دەپ سانايمىز. ەلدەرىمىزدىڭ ساۋدا بايلانىستارى ميلليارد دوللارعا جۋىقتاپ, تابىستى دامىپ كەلەدى. مەنىڭ بىلۋىمشە, قازاقستان – بەلارۋستىڭ ەكىنشى ساۋدا سەرىكتەسى. جالپى, ءسىزدىڭ ەلىڭىز بەن حالقىڭىزدىڭ ءتول مادەنيەتىنە ەرەكشە قۇرمەتپەن قارايمىز. ورايلى ءساتتى پايدالانا وتىرىپ, پرەزيدەنت الەكساندر لۋكاشەنكوعا سالەمىمدى جولداعىم كەلەدى. تابىستى ىقپالداستىعىمىزدى ناقتى ناتيجەلەرمەن جالعاستىرۋعا بەيىلمىز», دەدى قازاقستان پرەزيدەنتى. الەكساندر تۋرچين ءوزارا ءتيىمدى ديالوگتىڭ جوعارى قارقىنىن ساقتاۋعا جانە مەملەكەتتەر باسشىلارى العا قويعان مىندەتتەردى ناقتى ىسكە اسىرۋدى ۇيلەستىرۋگە مۇددەلى ەكەنىن جەتكىزدى. «سىزگە پرەزيدەنت الەكساندر گريگورەۆيچ لۋكاشەنكونىڭ ىستىق ىقىلاسىن جەتكىزگىم كەلەدى. كۇنى كەشە ءبىز كەڭىنەن اڭگىمەلەستىك, وعان قازاقستانعا ساپارىمنىڭ باعدارلاماسى جونىندە جان-جاقتى اقپارات بەردىم. قازاقستاننىڭ دامۋ جولىن ءجىتى باقىلاپ وتىرامىز. ۇزاق جىلداردان بەرى ەلىڭىزدىڭ ەكونوميكالىق ءوسىمى تۇراقتى كورسەتكىشكە يە. سوندىقتان قازىرگى تابىستارىڭىزعا شىنايى قۋانامىز. ءوزىڭىز اتاپ وتكەندەي, ەكى ەل اراسىنداعى تاۋار اينالىمى ءوسىپ كەلەدى», دەدى بەلارۋس پرەمەر-ءمينيسترى. بيىل 8 ايدىڭ ىشىندە ءوزارا ساۋدا كولەمى بىلتىرعىمەن سالىستىرعاندا 20 پايىزعا ارتتى. ونەركاسىپ كووپەراتسياسى اياسىندا قۇنى 204 ميلليون دوللار بولاتىن 12 جوبا جۇزەگە استى. تاعى 3 جوبا پىسىقتالىپ جاتىر.