سولتۇستىك قازاقستان وبلىسىنا قاراستى قىزىلجار اۋدانىنىڭ تەپليچنوە اۋىلىنداعى قورعانىس بوگەتىن رەكونسترۋكتسيالاۋعا ۇكىمەت رەزەرۆىنەن شامامەن 1,4 ملرد تەڭگە ءبولىندى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى. جۇمىستار پرەزيدەنتتىڭ سۋ تاسقىنىنا قارسى قۇرىلىستاردى نىعايتۋ جونىندەگى تاپسىرمالارىنا سايكەس جۇرگىزىلىپ جاتىر, دەپ حابارلايدى Egemen.kz.
ۇكىمەتتىڭ ءباسپاسوز قىزمەتىنىڭ مالىمدەۋىنشە, رەكونسترۋكتسيالاۋ جۇمىسىنىڭ ماقساتى – قۇرىلىستىڭ بەرىكتىگىن نىعايتۋ جانە ەلدى مەكەننىڭ تولىققاندى قورعالۋىن قامتاماسىز ەتۋ. بوگەتتى تولىق رەكونسترۋكتسيالاۋ جوباسىنا اۆتوجولداردى قالپىنا كەلتىرۋ, تەمىربەتون پليتالارىن توسەۋ, درەناج جۇيەسى جانە اباتتاندىرۋ كىرەدى. بارلىق ءىس-شارا اياقتالعاننان كەيىن گيدرولوگيالىق نىساننىڭ جوعارعى دەڭگەيى 2024 جىلعى سۋ تاسقىنىنىڭ ەڭ جوعارى دەڭگەيىنە تەڭ دەڭگەيدە بەلگىلەنەدى.
جوبانى جۇزەگە اسىرۋ مىڭعا جۋىق حالقى بار تەپليچنوە اۋىلىن سۋ تاسقىنىنان قورعاۋدى قامتاماسىز ەتەدى.
ۇكىمەت ەلدى مەكەندەردى سۋ تاسقىنىنان قورعاۋ جۇمىستارىن جۇرگىزىپ جاتىر. سۋ رەسۋرستارى جانە يرريگاتسيا مينيسترلىگىنىڭ دەرەكتەرى بويىنشا التى وڭىردە – اقمولا, اقتوبە, باتىس قازاقستان, قوستاناي, پاۆلودار, سولتۇستىك قازاقستان وبلىستارىندا گيدروتەحنيكالىق قۇرىلىستاردى قالپىنا كەلتىرۋ جانە سالۋ بويىنشا 57 جوبا, ونىڭ ىشىندە 13 جاڭا نىسان قۇرىلىسى جۇزەگە اسىرىلىپ جاتىر. بۇگىندە 57 نىساننىڭ 40-ى اياقتالعان, 221 شاقىرىم قورعانىس بوگەتتەرى سالىنىپ, نىعايتىلدى, بۇل جۇمىستىڭ 91%-ىن قۇرايدى.
ايتا كەتەلىك, تەپليچنوە اۋىلىنداعى قورعانىس بوگەتى 1980 جىلى پايدالانۋعا بەرىلگەن. باستاپقىدا بوگەتتىڭ ۇزىندىعى 380 مەتر, ورتاشا ەنى 11 مەتر, ورتاشا بيىكتىگى 4 مەتر بولعان. 2024 جىلعى سۋ تاسقىنى كەزىندە سقو قىزىلجار اۋدانىنىڭ اۋماعىندا جەرگىلىكتى تابيعي سيپاتتاعى توتەنشە جاعداي جاريالاندى. ەسىل وزەنىنىڭ تاسۋى سالدارىنان تەپليچنوە اۋىلىنداعى قورعانىس بوگەتى اپاتتى جاعدايعا تاپ بولدى. 2024 جىلعى سۋ تاسقىنىنان كەيىنگى قالپىنا كەلتىرۋ جۇمىستارى كەزىندە بوگەتتىڭ ۇزىندىعى ۇلعايتىلدى.