ماۋسىم اياقتالعان سوڭ الماتىلىق «قايرات» كلۋبى تاعى ءبىر برازيليالىق شابۋىلشىسىمەن – ەلدەر سانتانامەن قوش ايتىسادى. بۇل تۋرالى كلۋب باسشىسى قايرات بورانباەۆ مالىمدەدى, دەپ جازادى Egemen.kz.
ونىڭ ايتۋىنشا, الداعى ماۋسىمدا قازاقستان چەمپيوناتىندا لەگيونەرلەرگە ارنالعان جاڭا ليميت ەنگىزىلەدى. ەرەجە بويىنشا كوماندانىڭ وتىنىمىندە شەتەلدىك ويىنشىلار سانى وننان اسپاۋى ءتيىس.
«جواو پاۋلودان بولەك ەلدەر سانتانا دا كەتەدى. لەگيونەرلەرگە قويىلاتىن تالاپتاردىڭ كۇشەيۋىنە بايلانىستى تاعى ەكى شەتەلدىك فۋتبولشىمەن دە قوشتاسامىز. بىراق قۇرامعا ءۇش جاڭا ويىنشى قوسىلادى», – دەدى قايرات سوۆەتاەۆيچ نۇرسۇلتان قۇرمانعا بەرگەن سۇحباتىندا.
ايتا كەتەيىك, بۇعان دەيىن «قايرات» رەسمي تۇردە جواو پاۋلومەن كەلىسىمشارتتىڭ توقتاتىلعانىن حابارلاعان بولاتىن. قازىرگى تاڭدا الماتىلىق كلۋب وفري اراد, ەگور سوروكين جانە گەورگي زاريامەن دە كەلىسىمشارتتى ۇزارتقان جوق, ولاردىڭ كەلىسىم مەرزىمى جىل سوڭىندا اياقتالادى.
ەسكە سالا كەتەيىك, «قايرات» بيىل قازاقستان چەمپيونى اتاعىن قورعاپ قالدى جانە كەلەسى ماۋسىمدا تاعى دا چەمپيوندار ليگاسىندا وينايدى.