ءىىم رەسمي وكىلى شىڭعىس الەكەشەۆتىڭ ايتۋىنشا سوڭعى ۋاقىتتا الەۋمەتتىك جەلىلەردە حايپ, لايك نەمەسە ءتۇرلى كونكۋرستار ءۇشىن جاسالاتىن ارانداتۋشىلىق ارەكەتتەر كوبەيىپ بارادى, دەپ حابارلايدى Egemen.kz.
ش.الەكەشەۆتىڭ سوزىنشە كەيبىر جاستار ساۋدا ورتالىقتارىندا نەمەسە كوشەدە ايعايلاپ, جارتىلاي جالاڭاش جۇگىرىپ, جۇرتقا كەدەرگى كەلتىرىپ, وزدەرىن «شوۋ» ەتىپ ءتۇسىرىپ ءجۇر. مۇنداي ارەكەتتەر ءۇشىن زاڭدا جاۋاپكەرشىلىك قاراستىرىلعان.
جۋىردا ەلوردادا بولعان وسىنداي وقيعا بويىنشا قۇقىقبۇزۋشى 15 تاۋلىككە اكىمشىلىك قاماۋعا الىنعان.
«لايك جيناۋ ءۇشىن جاسالعان مۇنداي ارەكەت باتىلدىق تا, كرەاتيۆ تە ەمەس. بۇل – قوعامدىق ءتارتىپتى بۇزۋ, كوپشىلىككە قۇرمەتسىزدىك كورسەتۋ, ار-ۇياتقا جات قىلىق.
قوعامدىق ورىندا جاسالعان كەز كەلگەن زاڭعا قايشى نەمەسە ۇيات ارەكەتكە جول بەرىلمەيدى. زاڭعا سايكەس جاۋاپقا تارتىلادى. بارشاعا, اسىرەسە جاستارعا ايتارىمىز: كۇماندى ينتەرنەت-ترەندتەرگە ەرمەڭىزدەر. ءوزىڭىزدى دە, اينالاداعى ادامداردى دا قۇرمەتتەڭىزدەر. ناعىز قۇرمەت پەن ابىروي جاقسى ءىس, پايدالى وي, دۇرىس ارەكەت ارقىلى كەلەدى.
ءىىم مۇنداي جاعدايلارعا قاتاڭ توسقاۋىل قويىپ, ازاماتتاردىڭ تىنىشتىعى مەن قاۋىپسىزدىگىن قامتاماسىز ەتۋدى جالعاستىراتىن بولادى», دەدى شىڭعىس الەكەشەۆ.