مەملەكەت باسشىسى «قازاقستان – اكادەميالىق ءبىلىم ايماعى» ستراتەگيالىق سەرىكتەستەر فورۋمىندا ءسوز سويلەدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنت ءبىلىم جانە عىلىمدى ەشقانداي شەكارا تالعامايتىن, بارلىق ەلگە ورتاق ستراتەگيالىق ماڭىزى ايرىقشا سالا رەتىندە اتاپ, بۇگىنگى فورۋم سونىڭ ايقىن دالەلى ەكەنىنە نازار اۋداردى.
«بۇل – شىن مانىندە وتە ماڭىزدى جيىن, جاھاندىق ءبىلىم مەن عىلىمنىڭ دامۋى تۋرالى اسا قۇندى وي-پىكىرلەر ايتىلاتىن, بولجامدار جاسالاتىن بىرەگەي الاڭ. وسىعان وراي كەشەدەن بەرى الەمدەگى جەتەكشى جوعارى وقۋ ورىندارىنىڭ باسشىلارى جانە وكىلدەرى استانادا باس قوسىپ, پىكىر الماسىپ جاتىر. حالىقارالىق دەڭگەيدەگى عالىمدار مەن ساراپشىلار ەلوردامىزدا ماڭىزدى ماسەلەلەردى تالقىلاۋدا. بۇگىن دە اكادەميالىق ءبىلىم الەمىندەگى بەدەلدى جوعارى وقۋ ورىندارىنىڭ جەتەكشىلەرى تەرەڭ ماعىنالى ويلارىن ورتاعا سالدى. بارشاڭىزعا شىنايى ريزاشىلىعىمدى بىلدىرەمىن», دەدى قاسىم-جومارت توقاەۆ.
پرەزيدەنتتىڭ پىكىرىنشە, ءبىلىم مەن عىلىم – الەمدى وزگەرتە الاتىن ەڭ باستى كۇش, ال ۋنيۆەرسيتەت – وزىق ويلار مەن جاڭا يدەيالاردىڭ ورداسى, عىلىمي ىزدەنىس ورتاسى.
«قازىر ادامزات تۇبەگەيلى وزگەرىستەر داۋىرىنە قادام باسقان كەزدە ءبىلىم وردالارى زامان تالابىنا ساي وزىق بولۋعا ءتيىس. ونسىز ەشقانداي دامۋ دا, وركەندەۋ دە بولمايتىنى انىق. قازاقستان ءبىلىم-عىلىم جۇيەسىن دامىتۋعا ايرىقشا ءمان بەرىپ وتىر. 2019 جىلدان بەرى وسى سالاعا بولىنەتىن قارجى ءۇش ەسە ۇلعايدى. ەلىمىزدە جوعارى وقۋ ورىندارىنىڭ دەربەستىگى ارتىپ كەلەدى, زەرتتەۋ ۋنيۆەرسيتەتتەرى كوبەيۋدە. «عىلىم جانە تەحنولوگيالىق ساياسات تۋرالى» جاڭا زاڭ قابىلداندى. پرەزيدەنت جانىنان عىلىم جانە تەحنولوگيالار جونىندەگى ۇلتتىق كەڭەس قۇرىلدى. مەملەكەت عالىمدارعا, اسىرەسە, جاس زەرتتەۋشىلەرگە بارىنشا قولداۋ كورسەتۋدە. جوعارى ءبىلىمنىڭ بارشا ازاماتقا بىردەي قولجەتىمدى بولۋى – وتە ماڭىزدى مىندەت», دەدى مەملەكەت باسشىسى.
قاسىم-جومارت توقاەۆ وسكەلەڭ ۇرپاقتىڭ ساپالى ءبىلىم الۋى ءۇشىن مەملەكەت تاراپىنان جاسالىپ جاتقان قامقورلىققا توقتالدى
«ەلىمىزدە 2024 جىلدان باستاپ «ۇلتتىق قور – بالالارعا» باعدارلاماسى جۇزەگە اسىرىلىپ جاتىر. سوعان سايكەس ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزى بالالاردىڭ ەسەپشوتىنا سالىنادى, ياعني قازاقستانداعى ءار بالا 18 جاسقا دەيىن ۇلتتىق قوردان قارجى الىپ تۇرادى. اتالعان قاراجاتتى مەرزىمىنەن بۇرىن قولدانۋعا بولمايدى. بالالار كامەلەت جاسقا تولعاننان كەيىن جيناقتالعان قارجىنى باسپانا نەمەسە ءبىلىم الۋعا جۇمساي الادى. سونىمەن قاتار بەس جاستان اسقان بالالارعا ارنالعان «كەلەشەك» بىرىڭعاي جيناقتاۋ جۇيەسى ىسكە قوسىلدى. بۇل جۇيەدە اتا-انالاردىڭ ەرىكتى سالىمى, مەملەكەت تاراپىنان بولىنەتىن باستاپقى ءبىلىم بەرۋ كاپيتالى, جىل سايىنعى مەملەكەتتىك سىياقى جانە ينۆەستيتسيالىق تابىس جيناقتالادى. جوبالاردىڭ نەگىزگى ماقساتى – ءبىر, بۇل – جاس ۇرپاقتىڭ ساپالى ءبىلىم الۋىنا جاعداي جاساۋ. بۇدان بولەك, جاستارعا پايىزسىز ءبىلىم نەسيەلەرى جانە ءتۇرلى گرانتتار بەرىلۋدە. جوعارى ءبىلىم بەرۋ سالاسىنىڭ ينفراقۇرىلىمى جاڭعىرتىلىپ جاتىر, جاڭا وقۋ عيماراتتارى (كامپۋستار) بوي كوتەرۋدە. ايماقتاردا جوعارى وقۋ ورىندارىنىڭ جانىنان ستۋدەنتتەرگە ارنالعان جاتاقحانالار سالىنۋدا», دەدى پرەزيدەنت.