بۇل تۋرالى ورتالىق كوممۋنيكاتسيالار قىزمەتى (وكق) الاڭىنداعى ءباسپاسوز كونفەرەنتسياسىندا «قازاۆتوجول» ۇك» اق باسقارما توراعاسى دارحان يماناشەۆ ءمالىم قىلدى, دەپ حابارلايدى Egemen.kz.
ناقتى اتاعاندا, وسى جىلعى جول-قۇرىلىس ماۋسىمىندا 9500 شاقىرىم رەسپۋبليكالىق ماڭىزى بار اۆتوجولداردان – 2900 شاقىرىم جولدا قايتا جاڭارتۋ جانە قۇرىلىس جوبالارى, 460 شاقىرىم جولدا كۇردەلى جوندەۋ, 5100 شاقىرىم جولدا ورتاشا جوندەۋ جۇمىستارى جۇرگىزىلگەن. جىل باستالعالى 2 مىڭ شاقىرىمدا جۇمىستار اياقتالىپ, قولدانىسقا بەرىلگەن.
سپيكەردىڭ ايتۋىنشا, بيىلعا جوسپارلانعان ماڭىزدى جوبالاردىڭ ءبىرى – «قالباتاۋ-مايقاپشاعاي» اۆتوجولىنىڭ قايتا جاڭارتۋ جۇمىستارى اياقتالىپ, 415 شاقىرىم جولدا قوزعالىس اشىلىپ وتىر.
«قاراشا ايىنىڭ باسىندا اقتوبە وبلىسىندا I ساناتتاعى «اقتوبە-قارابۇتاق-ۇلعايسىن» ۋچاسكەسىنىڭ 28 شاقىرىمدىق بولىگىن اشامىز. قىزىلوردا وبلىسىندا II ساناتتاعى «قىزىلوردا-جەزقازعان» اۆتوجولىنىڭ ۇزىندىعى 192 شاقىرىمدىق ۋچاسكەسى پايدالانۋعا بەرىلەدى. ال ۇلىتاۋ وبلىسىندا «قىزىلوردا-جەزقازعان» جوباسى اياسىندا 40 شاقىرىم جول سالىندى», دەدى د.يماناشەۆ.
سونداي-اق, الماتى وبلىسىندا ۇزىندىعى 67 شاقىرىمدى قۇرايتىن I ساناتتاعى «قۇرتى-قاپشاعاي» ۋچاسكەسىنىڭ قايتا جاڭارتۋ جۇمىستارى اياقتالىپ, پايدالانۋعا بەرىلمەك.