جامبىل وبلىسىنىڭ شۋ قالاسىندا جىلۋ جەلىلەرىنىڭ توزۋى - 70%-عا جەتكەن. ورال قالاسىندا جەو 86%-عا دەيىن توزسا, قاراعاندى قالاسىندا بۇل كورسەتكىش - 81%-عا, پاۆلوداردا 79%-عا جەتكەن جانە قوستاناي وبلىسىنىڭ ارقالىق قالاسىندا 70%-عا دەيىن توزعان, دەپ جازادى Egemen.kz.
بۇگىن دەپۋتات بەرىك بەيسەنعاليەۆ ءماجىلىستىڭ جالپى وتىرىسىندا جىلۋ جەلىلەرىنىڭ توزۋىنان تۇتىنۋشى, ياعني قاراپايىم حالىق زارداپ شەگەتىنىن اتاپ ءوتتى.
سونداي-اق ول ەلىمىز بويىنشا جىلۋ جەلىلەرىنىڭ ورتاشا توزىعى 52% ەكەنىن جانە جىلۋ ەلەكتر ورتالىقتارىنىڭ 76%-ى 50 جىلدان, ودان قالعاندارى - 30 جىلدان استام جۇمىس ىستەپ كەلە جاتقانىنا نازار اۋداردى. بەرىك بەيسەنعاليەۆتىڭ ايتۋىنشا, مۇنداي كورسەتكىش كەز-كەلگەن ەلدى مەكەندە اپاتتىڭ ىقتيمالدىعىن ارتتىرادى. دەپۋتات وسى ماسەلەلەردى شەشۋ ءۇشىن بىرقاتار ءىس-شارا قابىلداۋدى ۇسىندى.
«1. وڭىرلەردەگى توزىعى 60%-دان اسقان جىلۋ جەلىلەرىن «ەنەرگەتيكا جانە كوممۋنالدىق سەكتوردى جاڭعىرتۋ» ۇلتتىق جوباسى شەڭبەرىندە جاڭعىرتۋ بويىنشا جۇمىستاردى جەدەلدەتۋ جانە جىلۋمەن قامتۋ بويىنشا جەكە بلوكتى ءبولىپ شىعارىپ ۇلتتىق جوبا مەن وڭىرلىك باعدارلامالاردىڭ ۇيلەسىمدىلىگىن قامتاماسىز ەتۋ;
نەعۇرلىم توزىعى جەتىپ, اپاتتىق جاعداي الدىندا تۇرعان, جىلۋ تراسسالارىن, جىلۋ ەلەكتر ورتالىقتارى مەن قازاندىقتاردى قايتا جاڭارتۋ ءۇشىن, اسىرەسە توزۋ دەڭگەيى سىن كوتەرمەيتىن وڭىرلەرگە ورتا جانە ۇزاق مەرزىمدى بيۋدجەت جوسپارلاۋ اياسىندا جەتكىلىكتى ءارى تۇراقتى قارجىلاندىرۋدى قاراستىرۋ; ەسكىرگەن جىلۋ جەلىلەرىنە تۇسەتىن جۇكتەمەنى ازايتۋ جانە ولاردىڭ قىزمەت ەتۋ مەرزىمىن ۇزارتۋعا مۇمكىندىك بەرەتىن ەنەرگيا ۇنەمدەۋ تەحنولوگيالارى مەن بالامالى ەنەرگيا كوزدەرىن پايدالانۋدى كەڭەيتۋ; جىلۋمەن قامتاماسىز ەتەتىن كاسىپورىندارعا ينۆەستيتسيا تارتۋدى كۇشەيتۋ, ونىڭ ىشىندە مەملەكەتتىك-جەكەشەلىك ارىپتەستىك تەتىكتەرى مەن «جاسىل» وبليگاتسيالاردى شىعارۋ; سالانىڭ كادرلىق جانە عىلىمي-تەحنيكالىق الەۋەتىن ارتتىرۋ, جىلۋ ەلەكتر ورتالىقتارى ءۇشىن مامانداردى دايارلاۋدىڭ ماقساتتى باعدارلامالارىن ەنگىزۋ جانە وتاندىق جابدىق وندىرۋشىلەرىن قولداۋ قاجەت», دەدى بەرىك بەيسەنعاليەۆ.