بيىل «ەڭبەك جولى» رەسپۋبليكالىق بايقاۋىنىڭ وڭىرلىك كەزەڭىنىڭ ء«وندىرىستىڭ ۇزدىك جاس قىزمەتكەرى» نوميناتسياسى بويىنشا «شىعىستۇستىمەت» جشس-دە جۇمىس ىستەيتىن تاۋ-كەن شەبەرى ايبار ايدار ۇلى بولاتىن.
بۇعان قوسا ايبار ايدار ۇلى ەڭبەك مينيسترلىگى ۇزدىك بەس جاس ماماننىڭ تىزىمىنە ەڭگىزىپتى. بۇل ايتۋلى بايقاۋدا جەڭىمپاز بولعاندار تۋرالى: «جەڭىمپازدار ءتۇرلى ماماندىقتار مەن سالالاردا ەڭبەك ءوتىلىنىڭ ازدىعىنا قاراماستان جوعارى كاسىبي جەتىستىكتەرگە قول جەتكىزدى. ولاردىڭ قاتارىندا اۆياتسيا مەن ەنەرگەتيكادان باستاپ كەن ءوندىرىسى, اگرارلىق سەكتور سىندى ءتۇرلى سالا وكىلدەرى بار. بۇل – ولاردىڭ قاجىرلى ەڭبەگى مەن كاسىبي شەبەرلىگى تەك ءوز تىرشىلىگىن عانا ەمەس, بۇكىل ۇجىمنىڭ جۇمىسىن جانداندىرا الاتىنىن دالەلدەيتىن جارقىن مىسال», دەيدى ۇيىمداستىرۋشىلار.
«ۇزدىك جاس ءوندىرىس قىزمەتكەرى» اتاعىنا يە بولعان ايبار ايدار ۇلى ارىپتەستەرىنە قاراعاندا, ۇزاق ەڭبەك ەتىپ ۇلگەرمەسە دە, قازىردىڭ وزىندە بىرنەشە كۇردەلى جەراستى ماماندىقتارىن مەڭگەرىپ ۇلگەرگەن كورىنەدى. وسى رەتتە بيىلعى «جۇمىسشى ماماندىقتار جىلى اياسىندا ايبارمەن از-كەم اڭگىمە وربىتكەن ەدىك.
– ماعان بايقاۋعا قاتىسۋدى ۇسىنعاندا, تاۋەكەل دەدىم دە كۇشىمدى سىناپ كورۋگە بەل بۋدىم. قاتىسۋعا قاجەتتى بەينەروليكتەردى ءتۇسىرىپ, ءوتىنىم بەردىك. ارينە, جەڭىسكە جەتكەنىمە قۋانىشتىمىن, بىراق بۇل ازىرگە تەك ايماقتىق كەزەڭ عانا. الدا بۇدان دا بيىك بەلەستەردى باعىندىرۋعا بار كۇشىمدى سالامىن, – دەدى ول.
ايبار ايدار ۇلى ەڭبەك جولىن قاتارداعى جۇمىسشىدان باستاپ, قىسقا مەرزىم ىشىندە تاۋكەن ماستەرى دارەجەسىنە دەيىن كوتەرىلگەن. قازىر ول بىرنەشە جەراستى ماماندىعىن يگەرىپ, جاس ماماندارعا ۇيرەتىپ تە ءجۇر.
– «شىعىستۇستىمەت» جشس – تەك ءوندىرىس ورنى ەمەس, بۇل – ۇلكەن مەكتەپ. مۇندا تاجىريبەلى ماماندار مول, ەڭ باستىسى, ەڭبەكتى باعالاي بىلەتىن جۇيە قالىپتاسقان. كومپانيا بىزگە ۇنەمى وقۋعا, دامۋعا مۇمكىندىك بەرەدى. سول ءۇشىن دە مەن ءوزىمدى وسى ۇجىمنىڭ ءبىر بولشەگى رەتىندە ماقتان ەتەمىن, – دەيدى ول.
ونىڭ ايتۋىنشا, شاحتاداعى جۇمىس ءتارتىبى قاتاڭ بولعانىمەن, قاۋىپسىزدىك ەرەجەسى مۇلتىكسىز ساقتالعان جاعدايدا بۇل ماماندىق وزىنە ەرەكشە قۋات پەن سەنىم بەرەدى.
– مەن ءۇشىن ەڭ باستىسى – وسى ەڭبەكتىڭ ەلەنۋى عانا ەمەس, جەر استىنداعى ارىپتەستەرىمنىڭ دە ەڭبەگىنىڭ باعالانۋى, – دەيدى ايبار ايدار ۇلى ءسوزىن جالعاستىرىپ. – ءبىز ءبىر كوماندا بولىپ جۇمىس ىستەيمىز. ءار اۋىسىم سايىن تاۋ ىشىندە ونداعان ادام بىرىگىپ, ءبىر ماقسات ءۇشىن تەر توگەدى. كەن ءوندىرۋ وڭاي شارۋا ەمەس, بىراق ءدال وسى ورتادا مەن ءوز ءىسىمنىڭ ماڭىزىن سەزىنەمىن.
جاس ماماننىڭ ايتۋىنشا, كومپانيا وڭىرلەرگە ناقتى «دونور» ءرولىن اتقارىپ وتىر – سالىق تۇسىمدەرى مەن الەۋمەتتىك جوبالار ارقىلى جەرگىلىكتى ەكونوميكانى قولداپ كەلەدى.
– ءبىزدىڭ بۇل كەن ورىندارى مەن ءۇشىن تەك جۇمىس بەرۋشى ەمەس, تۇتاس ءوڭىردىڭ تىرەگى دەۋگە بولادى. وسى كاسىپورىننىڭ ارقاسىندا شىعىس ءوڭىرى تالاي شاعىن كەنت پەن اۋىل تىرشىلىك ەتىپ وتىر. مىسالى, جەزكەنت, ورلوۆ, نيكولاەۆ سياقتى ەلدى مەكەندەردىڭ تۇرمىس ىرعاعى وسى زاۋىتتىڭ جۇمىسىنا تىكەلەي بايلانىستى. مۇندا مىڭداعان ادام ەڭبەك ەتەدى – كەنشى, مەحانيك, ەلەكتريك, ينجەنەر, جۇرگىزۋشى, اسپاز... ارقايسىسى ءوندىرىس تىزبەگىنىڭ ماڭىزدى بولىگى, – دەيدى تاۋ-كەن شەبەرى.
– كوپشىلىك بايقاعان شىعار, سوڭعى جىلدارى ينفراقۇرىلىم جاقسارىپ, الەۋمەتتىك نىساندار جوندەلىپ جاتىر. مۇنىڭ ءبارى – ءوندىرىس تابىسىنىڭ ناتيجەسى. ءبىز وندىرەتىن كەن – ەل ەكونوميكاسىنىڭ وزەگى, ال ونىڭ ارتىندا ادامداردىڭ قاجىرلى ەڭبەگى تۇر. سوندىقتان مەن ءوزىمدى وسى ۇلكەن ءىستىڭ كىشكەنتاي ءبىر بولشەگى رەتىندە سەزىنەمىن, – دەيدى ايبار ايدار ۇلى.
ول الداعى ۋاقىتتا ءوندىرىستىڭ جاڭا تەحنولوگيالارىن مەڭگەرىپ, ينجەنەرلىك دەڭگەيگە جەتۋدى ماقسات ەتىپ وتىر. – ەڭبەك – ادامدى شىڭدايدى. ال ەگەر سول ەڭبەگىڭ ەلەنسە, ودان ارتىق قۋانىش جوق, – دەيدى جاس مامان ءسوزىن تۇيىندەپ.
اباي وبلىسى