Mاڭعىستاۋ تۋريزم كوللەدجىنىڭ وندىرىستىك وقىتۋ شەبەرى ەلامان فارابباي ۇلى ءوزىنىڭ اۆتورلىق بالمۇزداعىن جاساپ شىعاردى. ونىڭ دەسەرتى قازاقتىڭ ۇلتتىق ونىمىنەن ازىرلەنگەن.
كەيىپكەرىمىزدىڭ ايتۋىنشا, اۆتورلىق بالمۇزداق – ۇلتتىق ءدام مەن زاماناۋي اسپازدىق تەحنولوگيانى ۇشتاستىرعان ەرەكشە ءونىم. قازىرگى تاڭدا ونىڭ ويلاپ تاپقان بالمۇزداعىنا سۇرانىس تا جوعارى.
«وسى بالمۇزداقتى جاساپ جۇرگەنىمە 5 جىلداي ۋاقىت بولدى. ءبارىمىز دە بالمۇزداقتى جاقسى كورەمىز, اسىرەسە بالالار مەن جاستار كۇن سايىن جەيدى دەسەك بولادى. جۇرت ءجيى تۇتىناتىن ءونىمدى تازا تابيعي, ۇلتتىق دامنەن نەگە جاساماسقا دەگەن وي كەلدى. سولاي ىرىمشىكتەن جاساپ, پاتەنتىن الدىم. 2023 جىلى ستۋدەنتىم ۇلدانا سارسانمەن بىرگە «جىبەك جولى» اتتى حالىقارالىق تۋرنيرگە قاتىسىپ, اۆتورلىق بالمۇزداعىمىزدى باۋىرساقتىڭ جانىنا اسەمدەپ قويىپ ۇسىندىق. ءار ەلدەن كەلگەن تورەشىلەر ءونىمنىڭ ءدامىن قاتتى ۇناتىپ, جارىستان ءبىرىنشى ورىن الدىق. اقتاۋ قالاسىندا ىرىمشىكتەن جاسالعان بالمۇزداقتى العىسى كەلەتىندەر كوپ. اسىرەسە مەيرامحانا مەن ءدامحانالار ءجيى تاپسىرىس بەرەدى. بالمۇزداقتى ءوزىم ازىرلەيمىن. ۇلتتىق برەند اسپازدىق ونەردە دە كەڭىنەن قولدانىلسا, قازاق اسحاناسىن شەتەلگە تانىتۋعا مۇمكىندىك بار», دەيدى ە.فارابباي ۇلى.
يدەيا اۆتورى – قازىر قىزمەت ەتىپ جاتقان كوللەدجدىڭ تۇلەگى. بۇگىندە ستۋدەنتتەرگە ۇلتتىق تاعامداردى جاڭاشا ازىرلەۋدىڭ جولىن كورسەتىپ ءجۇر.