پرەزيدەنت قاسىم-جومارت توقاەۆ رەسپۋبليكا كۇنىنە ارنالعان سالتاناتتى جيىندا ءسوز سويلەپ, بيىلعى ەكونوميكالىق جەتىستىكتەردى قورىتىندىلاي كەلە, ەلىمىزدە استىق ءتۇسىمى مول بولىپ, قامباعا 20 ميلليون توننادان استام بيداي جينالعانىن ايتتى, دەپ حابارلايدى Egemen.kz.
ء«بىز ۇلتتىق ەكونوميكانى تۇبەگەيلى جاڭعىرتۋ ءۇشىن ارتاراپتاندىرۋعا باسا ءمان بەرىپ وتىرمىز. اسىرەسە, كولىك-تاسىمال سالاسىن ستراتەگيالىق ماڭىزدى باعىت رەتىندە دامىتىپ جاتىرمىز. قازاقستان ەۋرازيانىڭ باستى لوگيستيكا ورتالىعى, ياعني حابى بولۋى كەرەك. وعان ەلىمىزدىڭ الەۋەتى جەتەدى, مۇمكىندىگىمىز دە مول. وتكەن ايدا «دوستىق – مويىنتى» تەمىرجولىنىڭ ەكىنشى جەلىسى ىسكە قوسىلدى. بۇل – ەگەمەندىك كەزەڭىندە سالىنعان ەڭ ءىرى تەمىرجول قۇرىلىسى», دەدى مەملەكەت باسشىسى.
سونداي-اق پرەزيدەنت بيىل 13 مىڭ شاقىرىم اۆتوكولىك جولى سالىنىپ, جوندەلگەنىن ايتتى.
«قىتاي ارقىلى اۋقىمدى جۇك تاسىمالداۋ مۇمكىندىگىنە يە بولدىق. قازىرگى حالىقارالىق نارىقتاعى تۇراقسىز احۋالدى ەسكەرسەك, مۇنى ۇلكەن جەتىستىك دەپ ايتۋعا بولادى. اۋە قاتىناسى سالاسىنداعى تابىستارىمىز دا از ەمەس. بيىل 36 جاڭا اۋە رەيسى اشىلدى, ولاردىڭ ىشىندە ازيا مەن ەۋروپانىڭ ءىرى قالالارى بار. بىراق بۇل جۇيەنى ودان ءارى دامىتۋىمىز كەرەك. ونىڭ ۇستىنە اۋە جولدارى ارقىلى جۇك تاسىمالداۋ جۇيەسىن دە (كارگو) نىعايتۋىمىز قاجەت. ەلىمىزدە ءوندىرىس تە دامىپ كەلەدى. بۇل سالانىڭ ءوسىمى جىل باسىنان بەرى 7,5 پايىزعا جەتتى. شاعىن جانە ورتا بيزنەستىڭ ەكونوميكاداعى ۇلەسى 40 پايىزعا جاقىندادى. كاسىپكەرلەر ەلىمىزدەگى ەڭبەككە قابىلەتتى ازاماتتاردىڭ جارتىسىنا جۋىعىن جۇمىسپەن قامتىپ وتىر. قۇرىلىس سالاسى قارقىندى دامىپ جاتىر. بىلتىر قازاقستاندا 19 ميلليون شارشى مەترگە جۋىق تۇرعىن ءۇي سالىندى. بۇل – تاۋەلسىزدىك جىلدارىنداعى ەڭ جوعارى كورسەتكىش, ناتيجەسىندە مىڭداعان وتباسى باسپانالى بولدى. اۋىل شارۋاشىلىعى سالاسىنداعى جالپى ءونىم كولەمى 2,5 ەسە ءوستى. بيىل دا قامبامىز استىققا تولدى, 20 ميلليون توننادان استام بيداي جينالدى. قازاقستاننىڭ ەكسپورتتىق الەۋەتى ارتۋدا, ساۋدا سەرىكتەسى رەتىندەگى بەدەلى نىعايۋدا», دەپ اتاپ ءوتتى ەل پرەزيدەنتى.