ۇلان اۋدانىندا بيىل 52 شاقىرىم جول مەن كوشە جوندەلىپ جاتىر. ول تۋرالى وبلىس اكىمى نۇرىمبەت ساقتاعانوۆ ۇلان اۋدانىنىڭ حالقىمەن كەزدەسۋدە ايتتى. اۋدانعا جۇمىس ساپارىمەن بارعان ءوڭىر باسشىسى كەزدەسۋدەن كەيىن بىرقاتار الەۋمەتتىك نىساندى ارالادى.
– ۇلان اۋدانىنىڭ اگروونەركاسىپتىك كەشەندە, ونەركاسىپتە, تۋريزم سالاسىندا دامۋ مۇمكىندىكتەرى زور. اۋداننىڭ 2029 جىلعا دەيىنگى دامۋ جوسپارىنا سايكەس, 15,8 ملرد تەڭگە بيۋدجەت قاراجاتىن, 357,9 ملرد تەڭگە جەكە ينۆەستيتسيا تارتۋ جوسپارلانعان. بۇگىندە جالپى قۇنى 8,8 ملرد تەڭگەنى قۇرايتىن جىلۋ وقشاۋلاعىش ماتەريالدار زاۋىتىنىڭ قۇرىلىسى جۇرگىزىلىپ جاتىر, – دەپ مالىمدەدى وبلىس اكىمى.
تۇرعىندار ءوز كەزەگىندە رەسپۋبليكالىق ماڭىزى بار جولدان ميتروفانوۆكا اۋىلىنا دەيىنگى جولدى, پرولەتاركا اۋىلى ىشىندەگى جولداردى جوندەۋ كەرەكتىگىن العا تارتتى. وبلىس اكىمىنىڭ ايتۋىنشا, ميتروفانوۆكا اۋىلىنا كىرەبەرىس جولدى 484,9 ملن تەڭگەگە ورتاشا جوندەۋگە, پرولەتاركا اۋىلى ىشىندەگى جولداردى 154 ملن تەڭگەگە جوندەۋگە سمەتالىق قۇجاتتاما ازىرلەنگەن. جوبالار كەلەسى جىلى جۇزەگە اسادى. سونداي-اق حالىق دۋبىعالى كولىنە دەيىن اپاراتىن جولدىڭ جوقتىعىن ايتتى.
– اتالعان كولدىڭ تۋريستىك الەۋەتى جوعارى. الايدا گاگارينو اۋىلى ارقىلى وتەتىن جولدىڭ جوقتىعى ىشكى ءتۋريزمنىڭ دامۋىن شەكتەپ, ايماقتىڭ ينۆەستيتسيالىق تارتىمدىلىعىن تومەندەتەدى. ماسەلەنى شەشۋ ماقساتىندا دۋبىعالى كولىنە اپاراتىن جول اۋداندىق ماڭىزى بار جولدار تىزىمىنە ەنگىزىلدى, – دەدى ن.ساقتاعانوۆ.
اۋدان جۇرتشىلىعى وزدەرىن تولعاندىرعان باسقا دا ساۋالدارىن قويىپ, ناقتى جاۋاپ الدى. كەلەلى كەزدەسۋدەن كەيىن وبلىس اكىمى سارتوۆكا اۋىلىنداعى شىعىس قازاقستان كوپسالالى كوللەدجىنە باردى. 1945 جىلى قۇرىلعان كوللەدج ستۋدەنتتەردى اۋىل شارۋاشىلىعى, تەحنيكا سالاسى, IT باعىتتارى بويىنشا توعىز ماماندىققا وقىتادى. ءبىلىم ورداسىنداعى 424 ستۋدەنتتىڭ 73-ءى دۋالدى وقىتۋ جۇيەسى ارقىلى تەوريانى وندىرىستىك تاجىريبەمەن ۇشتاستىرىپ ءجۇر. كوللەدجدىڭ 1973 جىلى سالىنعان جاتاقحاناسىندا 192 ستۋدەنت تۇرادى. ولاردىڭ ىشىندە الماتى, جامبىل وبلىستارىنان, شىمكەنت, تۇركىستان, سەمەي, قاراعاندى قالالارىنان كەلگەندەر دە بار.
ۇلان اۋدانىندا بىلىمنەن بولەك سپورتقا دا ءجىتى كوڭىل ءبولىنىپ وتىر. وسى كۇنى تاۆريا اۋىلىندا زاماناۋي دەنە شىنىقتىرۋ-ساۋىقتىرۋ كەشەنى اشىلدى.
– بۇل كەشەن اۋىلعا تىڭ تىنىس بەرىپ, جاڭا ءومىر سالتىنىڭ باستاۋىنا اينالادى دەپ سەنەمىز. وسىنداي نىساندار اۋىل جاستارىنىڭ دەنساۋلىعىن نىعايتىپ قانا قويماي, ولاردىڭ بويىندا تاباندىلىق پەن جەڭىسكە دەگەن سەنىم قالىپتاستىرادى. بيىل وڭىردە وسىنداي 3 كەشەن پايدالانۋعا بەرىلەدى, – دەدى وبلىس اكىمى.
كەشەننىڭ جالپى الاڭى 1 284,2 شارشى مەتر. وندا سپورتتىق-ساۋىقتىرۋ ءىس-شارالارى, بوكس, كۇرەس, اۋىر اتلەتيكا جارىستارىن وتكىزۋگە بولادى. عيمارات ىشىندە زاماناۋي جاتتىعۋ زالدارى, كيىم اۋىستىراتىن بولمەلەر, سانيتارلىق توراپتار, مەديتسينالىق پۋنكت, قۇرال-جابدىق ساقتايتىن بولمەلەر بار.
تاۆريا اۋىلىنداعى قۋاتتىلىعى 5,4 مۆت جاڭا ورتالىق قازاندىق تا الەۋمەتتىك نىساندار مەن تۇرعىن ۇيلەردى ورتالىقتاندىرىلعان جىلۋمەن قامتاماسىز ەتۋگە باعىتتالعان. وبلىس اكىمى نۇرىمبەت ساقتاعانوۆ قازاندىق جۇمىسىمەن دە تانىستى. جوبانى «تەرەزە» جشس مەردىگەر كومپانياسى جۇزەگە اسىرىپ جاتىر. قارجى رەسپۋبليكالىق, وبلىستىق بيۋدجەتتەردەن, ۇلتتىق قوردان بولىنگەن. جوبا قۇجاتتاماسىنا سايكەس, قازاندىققا جالپى جىلۋ جۇكتەمەسى 2,801 مۆت بولاتىن 16 نىساندى قوسۋ جوسپارلانعان. بيىلعى جىلىتۋ ماۋسىمىندا بالاباقشا, مەكتەپ, اۋرۋحانا, اكىمدىك عيماراتتارى قوسىلدى. مادەنيەت ءۇيى, سپورتتىق-ساۋىقتىرۋ كەشەنى, مەشىت, «شقو-حوسپيس» مەكەمەسى, دۇكەندەر مەن كوپقاباتتى تۇرعىن ۇيلەردى قوسۋ كەزەڭ-كەزەڭىمەن جۇرگىزىلىپ جاتىر.
ۇلان اۋدانىنىڭ تۇمسا تابيعاتى ءتۋريزمدى دامىتۋعا سۇرانىپ تۇرعان, گەوگرافيالىق ورنى ءوڭىردىڭ الەۋەتىن ارتتىرۋعا تاپتىرماس جەر. توعىز جولدىڭ تورابىندا جاتقان جەر وزەن-كولگە, ورمان-توعايعا وتە باي. ىلكىمدى ىستەرىمەن باتىل العا باسىپ كەلە جاتقان ءوندىرىس وشاقتارى دا از ەمەس. وسىنىڭ ءبارى باس قۇراي كەلىپ, اۋداننىڭ دامۋ بارىسى قارقىنعا قارقىن قوسا بەرەدى دەگەنگە كامىل سەندىرەدى.
شىعىس قازاقستان وبلىسى,
ۇلان اۋدانى