كوپتەگەن قازاقستاندىقتار ءۇشىن العاشقى پاتەر نەمەسە ءۇي ساتىپ الۋ – ومىردەگى ەڭ ماڭىزدى ءارى قۋانىشتى وقيعالاردىڭ ءبىرى. بۇل ارمانعا قول جەتكىزۋگە ازاماتتارعا وتباسى بانك كومەكتەسەدى. جىل باسىنان بەرى بانكتىڭ ءاربىر ءۇشىنشى سالىمشىسى العاش رەت ءوز باسپاناسىن ساتىپ الىپ, جاڭا قونىس يەسىنە اينالدى, دەپ جازادى Egemen.kz.
قازاقستاندىقتار ءتيىمدى جيناق جۇرگىزىپ, قولجەتىمدى نەسيە الۋعا تۇرعىن ءۇي قۇرىلىس جيناقتارى جۇيەسى جانە ونىڭ نەگىزىندە ىسكە قوسىلعان باعدارلامالار ارقاسىندا جەتتى. بۇل باعدارلامالار ءارتۇرلى حالىق توپتارىنا باعىتتالعان – جاس مامانداردان باستاپ, تۇرعىن ءۇي كەزەگىندە تۇرعان وتباسىلارعا دەيىن. ولار جيناقتاۋ مەرزىمىن قىسقارتىپ, ءتيىمدى شارتتارمەن جىلجىمايتىن م ۇلىك ساتىپ الۋعا مۇمكىندىك بەرەدى.
بيىلدان بەرى العاشقى باسپاناسىن ساتىپ العان قازاقستاندىقتار سانى مىناداي:
عالىمداردان – 191 ادام. ولارعا نەسيە جىلدىق 5% مولشەرلەمەمەن بەرىلىپ, باستاپقى جارنا 10% بولدى. مەملەكەتتىك باعدارلامالار ارقىلى تۇرعىن ءۇي كەزەگىندە تۇرعان 4 935 ادام باسپانالى بولدى. نەسيە مولشەرلەمەسى 2% نەمەسە 5%, باستاپقى جارنا 10% بولىپ بەلگىلەنگەن. «ناۋرىز» جانە «ناۋرىز جۋمىسكەر» باعدارلامالارى بويىنشا 7 038 قازاقستاندىق ءۇيلى بولدى. الەۋمەتتىك وسال ساناتتاعى ازاماتتارعا نەسيە مولشەرلەمەسى 7%, قالعاندارىنا – 9%. ايتا كەتەرلىگى, بۇل باعدارلاما ارقىلى ءۇي ماسەلەسىن نەگىزىنەن 35 جاسقا دەيىنگى جاستار شەشە الدى – بەرىلگەن نەسيەلەردىڭ شامامەن 60%-ى ولارعا تيەسىلى. وبلىستارداعى 4 656 تۇرعىن وڭىرلىك باعدارلامالار اياسىندا جاڭا باسپاناسىنا يە بولدى. بۇل باعدارلامالار اكىمدىكتەرمەن بىرلەسە جۇزەگە اسىرىلادى, سوندىقتان شارتتارى ءار وڭىردە ءارتۇرلى بولۋى مۇمكىن. تۇرعىن ءۇي قۇرىلىس جيناق جۇيەسىنىڭ قاتىسۋشىلارى باعدارلامالاردان تىس.«بيىلدان بەرى وتباسى بانكىنىڭ قولداۋىمەن 60 مىڭ قازاقستاندىق وتباسى ءوز باسپاناسىنا يە بولدى. ولار جالپى 1,250 ترلن تەڭگە نەسيە الدى. وتكەن جىلدىڭ وسى كەزەڭىمەن سالىستىرعاندا جاڭا تۇرعىن ۇيگە قونىس اۋدارعاندار سانى 15%-عا, بەرىلگەن نەسيەلەر كولەمى 37%-عا وسكەن. ءبىزدىڭ ءۇشىن ەرەكشە ماڭىزدىسى – بيىل ءاربىر ءۇشىنشى وتباسى بانك كليەنتى العاش رەت ءوز پاتەرىنىڭ ەسىگىن اشتى. بۇل دەگەنىمىز بانك شىنىمەن دە ادامدارعا ومىرىندەگى ەڭ باستى ماسەلەلەردىڭ ءبىرى – ءوز ءۇيىن ساتىپ الۋ ماسەلەسىن شەشۋگە كومەكتەسىپ وتىرعانىن كورسەتەدى», دەدى وتباسى بانك باسقارما ءتورايىمى ءلاززات يبراگيموۆا.
قازىرگى تاڭدا وتباسى بانكىندە 3 195 535 قازاقستاندىق ءوز باسپاناسىنا جيناق جاساۋدا. كۇن سايىن شامامەن 2 500 جاڭا دەپوزيت اشىلىپ, 200-دەي نەسيە بەرىلۋدە. بانك قولداۋىمەن بيىلدىڭ سوڭىنا دەيىن تاعى 7 000–10 000 قازاقستاندىق العاشقى باسپاناسىن ساتىپ الا الادى دەپ كۇتىلۋدە.
تۇسىنىكتەمە: ءارتۇرلى باعدارلامالار بويىنشا جىلدىق ءتيىمدى سىياقى مولشەرلەمەسى (جتسم) نەسيەلىن الۋشى كاتەگورياسىنا جانە كرەديتتىك شارتتارعا بايلانىستى 2%-دان 13%-عا دەيىن وزگەرەدى. جاس عالىمدار باعدارلاماسى بويىنشا جتسم – 5,2%–5,5%;تۇرعىن ءۇي كەزەگىندە تۇرعاندار ءۇشىن جتسم – 2,0%–2,1% جانە 5,2%–5,8%; «ناۋرىز» باعدارلاماسى بويىنشا جتسم – 7,1%–9,6% جانە 9,4%–13%.