سەۋل قالاسىندا پرەزيدەنت جانىنداعى ۇلتتىق عىلىم اكادەمياسى مەن كورەيا عىلىمي-تەحنيكالىق اقپارات ينستيتۋتى (KISTI) عىلىم, تەحنولوگيا جانە جاساندى ينتەللەكت سالاسىنداعى ارىپتەستىك تۋرالى كەلىسىمگە قول قويدى.
كەلىسىم قازاقستان مەن وڭتۇستىك كورەيا اراسىنداعى عىلىمي-تەحنولوگيالىق ىنتىماقتاستىقتىڭ جاڭا كەزەڭىنە جول اشىپ, «AI SilkNet» عىلىمي-تەحنولوگيالىق فورسايت جانە بولجامدى تالداۋ ورتالىعىن قۇرۋدى كوزدەيدى.
جاڭا ورتالىقتىڭ ماقساتى – جاساندى ينتەللەكت, ۇلكەن دەرەكتەر جانە ستسەناريلىك مودەلدەۋ سالالارىنداعى وڭتۇستىك كورەيانىڭ وزىق تەحنولوگياسىن ەلىمىزدىڭ زياتكەرلىك الەۋەتىمەن ۇشتاستىرۋ. ورتالىق الماتىداعى پرەزيدەنت جانىنداعى ۇعا بازاسىندا ورنالاسادى. ونىڭ قىزمەتىن اكادەميا مەن KISTI-ءدىڭ بىرلەسكەن اتقارۋشى كوميتەتى باسقارادى. باسقارۋ جۇيەسى ءوزارا تاجىريبە الماسۋ قاعيداتتارىنا نەگىزدەلىپ, جەتەكشىلىك قىزمەتتى قازاقستان مەن وڭتۇستىك كورەيا وكىلدەرى كەزەكپەن اتقارادى.
پرەزيدەنت جانىنداعى ۇعا پرەزيدەنتى ا.كۇرىشباەۆ KISTI پرەزيدەنتى دوكتور سيك ءليدىڭ قولداۋىنا ريزاشىلىعىن ءبىلدىرىپ, «AI SilkNet» ورتالىعىنىڭ بولاشاعى جايىندا ايتىپ ءوتتى.
قازىرگى تاڭدا جاساندى ينتەللەكت ستراتەگيالىق ويلاۋدىڭ نەگىزگى قۇرالىنا اينالىپ وتىر. بۇل رەاكتيۆتى باسقارۋدان پرواكتيۆتى باسقارۋعا كوشۋ, ياعني بولجامدار مەن ستسەناريلەردىڭ مەملەكەتتىك ساياساتتىڭ اجىراماس بولىگىنە اينالاتىن بولادى. ازياداعى سۋپەركومپيۋتەرلىك جانە تالدامالىق تەحنولوگيالار سالاسىندا جەتەكشى ورىنعا يە KISTI جۇيەلەرىنىڭ نەگىزىندە ەلىمىزدە عىلىم مەن تەحنولوگيانىڭ دامۋ ءۇردىسىن بولجاۋعا, باسىم باعىتتى ايقىنداۋعا جانە ستراتەگيالىق شەشىمدەر قابىلداۋدى مەملەكەتتىك ءارى كورپوراتيۆتىك دەڭگەيدە قولداۋعا جول اشاتىن ۇلتتىق بولجامدى تالداۋ جانە فورسايت جۇيەسىنىڭ قۇرىلۋىنىڭ بولاشاعى زور.
ورتالىقتىڭ قىزمەتى عىلىمي جاريالانىمدار, پاتەنتتەر مەن تەحنولوگيالار بويىنشا بىرىڭعاي تسيفرلىق پلاتفورما مەن دەرەكتەر بازاسىن قۇرۋعا, سونداي-اق فورسايت-زەرتتەۋلەرگە ارنالعان بولجامدى تالداۋ قۇرالىن ازىرلەۋگە باعىتتالادى.
الماتى