اقتوبە وبلىسىندا جىل باسىنان بەرى وتباسىلىق-تۇرمىستىق جانجال بويىنشا 4 مىڭعا جۋىق قوڭىراۋ تۇسكەن. سونداي-اق وتباسىندا ۇرىپ-سوعۋ دەرەكتەرى بويىنشا 187 قىلمىستىق ءىس تىركەلگەن, دەپ حابارلايدى Egemen.kz.
اقتوبە وبلىسى پوليتسيا دەپارتامەنتىنىڭ دەرەگىنە قاراعاندا, قۇقىق بۇزۋشىلىقتاردىڭ نەگىزگى سەبەپتەرى – ەرلى-زايىپتىلاردىڭ اراسىنداعى كەلىسپەۋشىلىكتەر, قىزعانىشتان تۋعان جانجال جانە ىشىمدىككە اۋەستەنۋشىلىك. تىركەلگەن دەرەكتەرگە قاراعاندا, بارلىق جاعدايدا وتباسىنىڭ شىرقىن بۇزاتىن ەر ادامدار بولىپ شىقتى. ماسەلەن, 14 قازاندا تەمىر اۋدانىنىڭ 47 جاستاعى تۇرعىنى تۇندە ۇيىنە ءىشىپ كەلىپ, جانجال شىعارىپ, ايەلى مەن بالالارىنىڭ ار-نامىسىنا تيگەن. پوليتسيا ونىڭ ءبىر جىلدا ەكىنشى رەت وتباسىلىق جانجالعا سەبەپكەر بولعانىن حابارلايدى. وسىعان ۇقساس جاعداي حرومتاۋ اۋدانىندا دا ورىن الدى. 18 قازاندا اۋىل تۇرعىنى ۇيىنە ءىشىپ كەلىپ, ازاماتتىق نەكەدەگى ايەلىن بالاعاتتاپ, ءۇيىنىڭ ەسىگىن سىندىرعان. وتباسىنىڭ شىرقىن بۇزعان ەكى ەر ادام اكىمشىلىك جاۋاپكەرشىلىككە تارتىلىپ, ولارعا قوعامدىق جۇمىس تۇرىندە جازا تاعايىندالدى جانە پوليتسيانىڭ پروفيلاكتيكالىق ەسەبىنە الىندى.
«وتباسىندا زورلىق-زومبىلىققا, قۇقىقبۇزۋشىلىققا جول بەرگەن ادام جازاسىن وتەگەننەن كەيىن دە پوليتسيانىڭ باقىلاۋىندا تۇرادى. قۇقىقبۇزۋشىعا ارنايى نۇسقاۋلىق بەرىلىپ, مىندەتتەلگەن ەرەجەلەردى قاتاڭ ساقتاۋ تالاپ ەتىلەدى. بۇل شارالار ەڭ الدىمەن جابىرلەنۋشىنىڭ قۇقىعىن قورعاۋعا باعىتتالعان», دەيدى اقتوبە وبلىسى پوليتسيا دەپارتامەنتى وتباسىلىق-تۇرمىستىق زورلىق-زومبىلىققا قارسى كۇرەس ءبولىمىنىڭ ينسپەكتورى ايگەرىم كورپەشوۆا.
بيىلعى جىلدىڭ توعىز ايىندا پد وتباسىلىق- تۇرمىستىق جانجالداردى تۋدىرۋشىلارعا قارسى 3500-گە جۋىق قورعاۋ نۇسقاۋلىعىن ازىرلەگەن. قۇقىق قورعاۋ ورگاندارى وتىنىشىمەن سوت اقتوبەلىك 1 مىڭ وتباسىلىق جانجال تۋدىرۋشىعا ارنايى نۇسقاۋلىقتار شىعارىپ, ولاردىڭ ءىس-ارەكەتىن باقىلاۋدى اۋماقتىق پوليتسيا ينسپەكتورلارىنا مىندەتتەدى. ينسپەكتور ولاردى ۇنەمى باقىلاپ تۇرادى. «توعىز ايدىڭ ىشىندە ۋچاسكەلىك پوليتسيا ينسپەكتورلارى وتباسىلىق-تۇرمىستىق قورعاۋ نۇسقاماسىن بۇزعان 270 ادامدى, ەرەكشە تالاپتاردى بۇزعان 438 اگرەسسوردى انىقتاپ, ولار اكىمشىلىك جازاعا تارتىلدى», دەيدى پوليتسيا اعا لەيتەنانتى ايگەرىم كورپەشوۆا.
پوليتسيا دەپارتامەنتىنىڭ دەرەگىنە قاراعاندا, جىل باسىنان بەرى وتباسىلىق-تۇرمىستىق جانجالداردان زارداپ شەككەن 57 ايەل مەن 126 بالا داعدارىس ورتالىقتارىنا ورنالاستىرىلعان. مۇنىمەن قاتار, وتباسىلارعا پسيحولوگيالىق كومەك كورسەتۋ جۇمىستارى دا قاتار جۇرگىزىلىپ كەلەدى. ماسەلەن, بالا-شاعاسىنىڭ شىرقىن ءجيى بۇزاتىن ەكى ەر ادامعا سوت شەشىمىمەن پسيحولوگيالىق كومەك كورسەتىلدى. بۇل جەردە جانجالدىڭ تۋ سەبەپتەرى انىقتالىپ, وتباسىلىق كيكىلجىڭدى بولدىرماۋعا كەڭەستەر بەرىلەدى. وكىنىشكە قاراي, ىشىمدىككە اۋەستەنۋشىلىك, جۇمىسسىزدىق, ەرلى-زايىپتىلاردىڭ ءبىر-بىرىمەن ءتىل تابىسا الماۋى كيكىلجىڭدەردىڭ نەگىزگى سەبەبىنە اينالىپ وتىر.
اقتوبە وبلىسى