ەل مەكتەپتەرىندە ءبىرىنشى توقسان اياقتالىپ كەلەدى. كۇزگى كانيكۋل 2025 جىلعى 27 قازاندا باستالىپ, 2 قاراشانى قوسا العاندا جەتى كۇنگە سوزىلادى, دەپ جازادى Egemen.kz.
وقۋ-اعارتۋ مينيسترلىگى وقۋشىلاردىڭ دەمالىسىن ءتيىمدى وتكىزۋ ءۇشىن «ادال ازامات» ءبىرتۇتاس تاربيە باعدارلاماسى اياسىندا ءىس-شارالار جوسپارىن ۇسىنىپ وتىر.
جوسپار پاتريوتيزم, ادىلەتتىلىك جانە جاۋاپكەرشىلىك سياقتى قۇندىلىقتاردى دامىتۋعا باعىتتالعان ءىس-شارالاردى قامتيدى:
«بالالار كىتاپحاناسى» جوباسىن ىسكە اسىرۋ شەڭبەرىندە «دەمالىستا كىتاپ وقيمىز» ءىس-شاراسى;
«بۋللينگتەن قورعان!» قاۋىپسىزدىك ساباعى;
«مەكتەپ تەاترىنىڭ» جۇمىسىن ۇيىمداستىرۋعا كەڭەس بەرىلگەن.
«ەڭ باستىسى, بالالاردىڭ قاۋىپسىزدىگىن قامتاماسىز ەتۋ. وسى ماقساتتا اتا-انالارمەن بىرگە جول-كولىك جاراقاتتارىنىڭ الدىن الۋ ءىس-شارالارىنا, مەكتەپتىڭ ىشكى ءتارتىبىن ساقتاۋ, بالالاردىڭ كوشەدە قاۋىپسىزدىگى, ۇيدەگى ءورت قاۋىپسىزدىگى جانە كيبەرقاۋىپسىزدىك شارالارىنا ەرەكشە نازار اۋدارۋ قاجەت», دەلىنگەن مينيسترلىك حابارلاماسىندا.