ادام جانىنا اراشا بولىپ, قاۋىپ-قاتەردىڭ ورتاسىندا ءجۇرۋ — ەكىنىڭ ءبىرىنىڭ قولىنان كەلە بەرمەيتىن ءىس, ول ۇلكەن جانكەشتىلىكتى تالاپ ەتەدى. سونداي ماماندىقتاردىڭ ءبىرى — قۇتقارۋشى. قيىن, بىراق كۇندەلىكتى تۇرمىستا قاجەتتى ماماندىقتى تاڭداعان جاس – اقتىلەۋ ءيمانالى. اقتاۋلىق جاس جىگىت كوكشەتاۋ قالاسىنداعى ازاماتتىق قورعانىس جوعارى كوپسالالى كوللەدجىندە «توتەنشە جاعدايلاردان قورعاۋ» ماماندىعى بويىنشا ءبىلىم الىپ ءجۇر.
اقتىلەۋدىڭ ماماندىق تاڭداۋ جولىنداعى ماڭىزدى ارمانىنىڭ ورىندالۋىنا «جارقىن بولاشاق» باعدارلاماسى سەبەپشى بولدى, جالپى بۇل باعدارلاما ارقىلى جاۋاپتى ماماندىقتاردى مەڭگەرۋگە مۇمكىندىك العان ماڭعىستاۋلىق جاستار از ەمەس. ولار بۇگىندە ەلىمىزدىڭ ءار تۇكپىرىندەگى ءتۇرلى كوللەدجدە ءارتۇرلى ماماندىق بويىنشا وقىپ ءجۇر.
– توتەنشە جاعدايلاردان قورعاۋ سالاسىندا جۇمىس ىستەۋدى بالا كۇنىمنەن ارماندايتىنمىن, ءاردايىم ادامدارعا كومەكتەسكىم كەلەتىن. ءبىر ادامنىڭ ءومىرىن ساقتاپ قالسام ۇلكەن جەتىستىك سول بولار ەدى دەپ ويلايتىن ەدىم. بۇعان بالا كەزىمدە كورگەن مۋلتفيلمدەر مەن فيلمدەر دە اسەر ەتكەن بولار, بارىندە دە جاقسىلىق جاساۋ يدەياسى بولاتىن ەدى عوي. مەن دە سونداي بولعىم كەلدى. وقۋعا قۇجات تاپسىرۋعا دايىندالىپ جۇرگەن كەزدە كاسپي تەڭىزىنە دەمالۋعا بارعان ەدىك. سۋعا باتىپ بارا جاتقان ءبىر بالانى جاعاعا شىعارىپ ۇلگەرگەنىم ەسىمدە. سول بالانىڭ العىسى ماعان ەرەكشە اسەر ەتتى. ادام ءومىرىن ساقتاپ قالۋعا كومەكتەسكەنىمدى سەزىنىپ, وسى ماماندىققا تۇسەمىن دەگەن سەنىمىم بەكي ءتۇستى, – دەيدى 16 جاستاعى ستۋدەنت ا.ءيمانالى.
اقتىلەۋ وقۋعا تۇسكەلى بۇل سالانىڭ ماڭىزى مەن باعىتتارىن تەرەڭ تۇسىنە باستاعان. ونىڭ ايتۋىنشا, قاۋىپ-قاتەرگە دايىن بولۋ ءۇشىن فيزيكالىق دايىندىق قانا ەمەس, ادامگەرشىلىك, جانكەشتىلىك سياقتى قاسيەتتەر وتە ماڭىزدى. «توتەنشە جاعدايلاردان قورعاۋ سالاسىنا تابيعي اپاتتارمەن كۇرەسۋ, الدىن الۋ, ەۆاكۋاتسيالاۋ, قۇتقارۋ سياقتى باعىتتار كىرەدى. جەر سىلكىنىسى, تسۋنامي, داۋىل — وسىنىڭ ءبارى ءبىزدىڭ جۇمىسىمىزبەن بايلانىستى. مۇنداي ساتتەردە ادامدار كىمنەن كومەك سۇراۋ كەرەگىن بىلمەي جاتادى. سونداي كەزدە قولدان كەلگەنشە كومەكتەسۋگە تىرىسامىز. بۇل — ازاماتتىق بورىشىمىز. سوندىقتان بۇل ماماندىق باتىلدىقتى تالاپ ەتەدى, ىشكى مادەنيەتى مەن ءتارتىبى دە مىقتى بولۋى كەرەك», دەيدى ول نىق سەنىممەن.
«قازمۇنايگاز» ۇلتتىق كومپانياسىنىڭ جانە «Samruk-Kazyna Trust» قورىنىڭ قولداۋىمەن جۇزەگە اسقان «جارقىن بولاشاق» باعدارلاماسى ارقىلى ءبىلىم الىپ جۇرگەن بوزبالا – بيىل ەكىنشى كۋرس ستۋدەنتى. كوللەدجدەگى پاندەردىڭ ىشىنەن اقتىلەۋگە گرافيكا ساباعى ەرەكشە ۇنايدى. بولاشاق مامان رەتىندە وعان بۇل ءپان وتە ماڭىزدى.
– العاشىندا بۇل ءپان قيىن سياقتى كورىندى. كەيىن سىزبالاردىڭ توتەنشە جاعداي ماماندارىنا قانشالىقتى ماڭىزدى ەكەنىن ءتۇسىندىم. سولار ارقىلى قاي جەردە ەۆاكۋاتسيالىق ەسىك بار ەكەنىن, عيماراتقا قالاي كىرۋگە بولاتىنىن, قاي جەردە نە ورنالاسقانىن ءبىلىپ, تۇسىنە الامىز. سوندىقتان وسى ساباققا ەرەكشە ىنتامەن قاتىستىم. ماماندىعىمىزعا ساي, ءبارىمىز قاتاڭ تارتىپپەن جۇرەمىز. فورما كيۋدىڭ ءوزى ۇلكەن جاۋاپكەرشىلىكتى قالىپتاستىرادى. فورماداعى ادام ءوزىن مادەنيەتتى, سابىرلى ۇستاۋى كەرەك, دەيدى اقتىلەۋ ءيمانالى.
الداعى وقۋ جىلدارىندا ول پراكتيكالىق پاندەردى مەڭگەرەتىن بولادى. كەلەشەكتە ستۋدەنت العان ءبىلىمى بويىنشا ءارتۇرلى وڭىردە قىزمەت ەتىپ كورگىسى كەلەدى. ا.ءيمانالىنىڭ سوزىنشە, قايدا تۇراتىنىڭ ەمەس, كىمگە كومەكتەسە الاتىنىڭ ماڭىزدى. كەز كەلگەن جەردە كومەككە مۇقتاج جاندار بار.
توتەنشە جاعدايلار سالاسى — قاۋىپ-قاتەرى مەن جاۋاپكەرشىلىگى قاتار جۇرەتىن ماماندىق. سوندىقتان اقتىلەۋدىڭ بۇل تاڭداۋىن قابىلداۋ وتباسى ءۇشىن العاشىندا وڭاي بولماعانىن ايتادى.
– وتباسىم العاشىندا قورىقتى. اسىرەسە اجەم. بىراق بالا كۇنگى ارمانىم ەكەنىن ءتۇسىندىرىپ, وسى ماماندىقتا وقىعىم كەلەتىنىن ايتقان سوڭ, باتاسىن بەردى. «جۇمىستىڭ وڭايى جوق, تەك وزىڭە سەن» دەپ اق جول تىلەپ, شىعارىپ سالدى. بولاشاققا جوسپارىم — وسى وقۋ ورنىن ۇزدىك اياقتاپ, مىقتى مامان اتانۋ. كەيىن جوعارى ءبىلىم الىپ, وسى سالادا جۇمىس ىستەگىم كەلەدى. اسىرەسە قۇرلىقتاعى توتەنشە جاعدايلارمەن جۇمىس ىستەۋگە قىزىعامىن. سەبەبى سول جەردە ادامدارعا كومەكتەسۋ مۇمكىندىگى كوبىرەك, دەگەن ا.ءيمانالى وتباسىنىڭ سەنىمىن اقتاپ, كاسىبي قۇتقارۋشى بولىپ قالىپتاسقىسى كەلەدى.
ماڭعىستاۋ وبلىسى