اتىراۋ قالاسىندا جاساندى ينتەللەكت ەلەمەنتتەرى بار 75 بەينەباقىلاۋ كامەراسى جۇمىس ىستەيدى. كامەرالار ادامدار كوپ جينالاتىن ايالدامالارعا, اۋەجايعا, تەمىرجول ۆوكزالى مەن اۆتوۆوكزال اۋماعىنا ورناتىلعان. اتىراۋ وبلىستىق پوليتسيا دەپارتامەنتى باستىعىنىڭ ورىنباسارى جاكەي يمانقۇلوۆتىڭ ايتۋىنشا, بەينەتالداۋ جۇيەسى تيىمدىلىگىن دالەلدەگەن, دەپ حابارلايدى Egemen.kz.
«بۇل جۇيە ادامداردىڭ ءجۇزىن تانىپ, اگرەسسيۆتى مىنەز-ق ۇلىقتى, تۇرعىنداردىڭ شامادان تىس جينالۋىن, وزگە دە كۇماندى جاعدايلاردى اۆتوماتتى تۇردە تىركەيدى. مۇنداي جايت انىقتالعان ساتتە جۇيە جەدەل قىزمەتتەرگە بىردەن دابىل بەلگىسىن جىبەرەدى. اتالعان جۇيەگە ىزدەۋدەگى, ەسەپتەگى تۇلعالاردىڭ فوتوسۋرەتتەرى ەنگىزىلگەن. كامەرا وبەكتيۆىنە ىلىنگەن ادامدار بەت ءپىشىنى ارقىلى سايكەستەندىرىلىپ, جەدەل باسقارۋ ورتالىعىنا حابار تۇسەدى», دەيدى جاكەي يمانقۇلوۆ.
ونىڭ مالىمەتىنشە, جىل باسىنان بەرى بەينەتالداۋ جۇيەسىنىڭ كومەگىمەن 209 ادام انىقتالعان. ونىڭ ىشىندە 119 قۇقىق بۇزۋشى پوليتسياعا جەتكىزىلگەن. انىقتالعان ادامداردىڭ باسىم بولىگى – اۋەجاي, تەمىرجول جانە اۆتوۆوكزال اۋماقتارىندا جاساندى ينتەللەكت ارقىلى بەت بەينەسى سايكەستەندىرىلىپ تانىلعان ازاماتتار.
«جاڭا تسيفرلىق تەحنولوگيالار پوليتسيا جۇمىسىنىڭ تيىمدىلىگىن ارتتىرىپ, قوعامدىق قاۋىپسىزدىك ساقتاۋعا باعىتتالدى. بولاشاقتا مۇنداي ينتەللەكتۋالدى جۇيەنى وبلىستىڭ وزگە اۋداندارىنا ورناتۋ جوسپارلانىپ وتىر», دەدى جاكەي يمانقۇلوۆ.