مەملەكەت باسشىسى قاسىم-جومارت توقاەۆ قازاقستان حالقىن جەڭىس كۇنىمەن قۇتتىقتادى, دەپ حابارلايدى Egemen.kz.
«قىمباتتى وتانداستار! سىزدەردى جەڭىس كۇنىمەن شىن جۇرەكتەن قۇتتىقتايمىن! بۇگىن ءبىز مايدان دالاسىندا وتان ءۇشىن وت كەشىپ, ەرلىك جاساعان جاۋىنگەرلەرگە جانە تىلدا تاباندى ەڭبەك ەتكەن ارداگەرلەرگە شىنايى ريزاشىلىق سەزىممەن تاعزىم ەتەمىز. قاسىرەتتى جىلداردىڭ بارلىق اۋىرتپالىعىن قايىسپاي كوتەرىپ, جەڭىسكە جەتكەن اعا بۋىنعا ايرىقشا قۇرمەت كورسەتەمىز.
ەلىمىز ورتاق جەڭىسكە ولشەۋسىز ۇلەس قوستى. ەكىنشى دۇنيەجۇزىلىك سوعىس كەزىندە ميلليونداعان وتانداسىمىز جانقيارلىقپەن شايقاستى, ايانباي جۇمىس ىستەپ, اسكەردى كەرەك-جاراقپەن قامتاماسىز ەتتى. جۇزدەن استام جەرلەسىمىز «داڭق» وردەنىنىڭ تولىق كاۆالەرى اتاندى, بەس ءجۇز ادام باتىر اتاعىن الدى, ونداعان مىڭ ازامات جاۋىنگەرلىك ەرلىگى جانە قاجىرلى ەڭبەگى ءۇشىن ماراپاتتالدى. ءبىز اعا بۋىننىڭ وشپەس داڭقىن ەشقاشان ۇمىتپايمىز», دەلىنگەن قۇتتىقتاۋدا.
وسى رەتتە پرەزيدەنت جاۋجۇرەك ساردارلار مەن ساربازداردىڭ قۇرمەتىنە مەموريالدار ورناتىلىپ, كىتاپتار شىعارىلىپ, فيلمدەر تۇسىرىلگەنىن, سونداي-اق كوشەلەرگە, مەكتەپتەرگە, مۋزەيلەرگە, اۋەجايلارعا, اسكەري بولىمدەر مەن ينستيتۋتتارعا ەل قورعاعان ەرلەردىڭ ەسىمى بەرىلىپ جاتقانىن اتاپ ءوتتى.
«قاھارمان ارداگەرلەرىمىزدىڭ ەرەن ەرلىگىنىڭ ءمان-ماعىناسىن وسكەلەڭ ۇرپاقتىڭ ساناسىنا ءسىڭىرۋ – بۇگىنگى بۋىننىڭ قاسيەتتى پارىزى. ءبىز ەرجۇرەك مايدانگەرلەردىڭ قايتپاس قايسارلىعى مەن اسقاق رۋحىنىڭ ارقاسىندا دەربەس ءارى بەيبىت ەلدە ءومىر ءسۇرىپ كەلەمىز, سونداي-اق, ءتول مادەنيەتىمىزدى دامىتىپ, قازىرگى زاماننىڭ يگىلىگىن سەزىنىپ وتىرمىز. قازاقستاندى بۇكىل الەم بىلەدى جانە قۇرمەتتەيدى. ءبىز جاڭا كونستيتۋتسيا ەرەجەلەرىنە سايكەس ادىلەتتى قازاقستاندى قۇرىپ جاتىرمىز.
اتا زاڭىمىز ەشكىمدى ۇلتىنا, نانىم-سەنىمىنە قاراي ءبولىپ-جارمايدى, بارلىق ازاماتتىڭ قۇقىقتارى مەن بوستاندىقتارىن بىردەي قورعايدى. ۇلى جەڭىس كۇنى – ەڭ الدىمەن, جاۋىنگەرلىك ەرلىگى مەن جىگەرلى ەڭبەگىنىڭ ارقاسىندا مامىراجاي زامانعا جەتكىزگەن باتىرلارىمىزدىڭ ەسىمىن ەل جادىندا جاڭعىرتۋ كۇنى. بۇل – ۇلان-اسىر تويعا ەمەس, ءماندى ءارى ماعىنالى ويعا شاقىراتىن مەرەكە. حالقىمىزدىڭ بەيبىت ومىرگە جانە ءوسىپ-وركەندەۋگە ۇمتىلىسىنىڭ ايقىن كورىنىسى ىسپەتتەس كوك بايراعىمىز ءاردايىم اشىق اسپان استىندا جەلبىرەسىن! ۇلى جەڭىس كۇنى قۇتتى بولسىن!», دەدى مەملەكەت باسشىسى.