ايدا بالاەۆا: جەڭىس كۇنى – كەلەر ۇرپاققا تاعىلىم بەرەتىن قاسيەتتى كۇن

«9 مامىر – حالقىمىزدىڭ جادىندا ماڭگى ساقتالعان ۇلى كۇن. ەرلىك پەن ەلدىكتىڭ, قايسار رۋح پەن وتانشىلدىقتىڭ مەرەكەسى. وسى كۇنى ءبىز بابالارىمىزدىڭ ولشەۋسىز ەرلىگىن زور ريزاشىلىقپەن ەسكە الىپ, مايدان دالاسىندا قازا تاپقان قاھارمانداردىڭ رۋحىنا تاعزىم ەتەمىز. ادامزاتقا فاشيزمنەن ازات بولاشاق سىيلاعان ارداگەرلەرىمىزگە شىنايى العىسىمىزدى بىلدىرەمىز. مەملەكەت باسشىسى اتاپ وتكەندەي, قازاقستان ورتاق جەڭىسكە, جەر بەتىندە ادىلەت پەن ەركىندىكتىڭ سالتانات قۇرۋىنا وراسان زور ۇلەس قوستى. ءاليا مولداعۇلوۆا, مانشۇك مامەتوۆا, تالعات بەگەلدينوۆ, قاسىم قايسەنوۆ, راقىمجان قوشقارباەۆ, سەرگەي لۋگانسكي, حيۋاز دوسپانوۆا, ساعادات نۇرماعامبەتوۆ جانە باسقا دا كوپتەگەن باتىرلاردىڭ ەسىمى ۇلى جەڭىس شەجىرەسىنە التىن ارىپپەن جازىلدى.

جۇزدەگەن قازاقستاندىق كەڭەس وداعىنىڭ باتىرى اتانىپ, مىڭداعان جاۋىنگەر مايدان دالاسىندا كورسەتكەن ەرلىگى مەن قاھارماندىعى ءۇشىن جاۋىنگەرلىك وردەندەرمەن جانە مەدالدارمەن ماراپاتتالدى», دەدى ايدا بالاەۆا.

وسى رەتتە ول سوعىس جىلدارىندا مادەنيەت پەن ادەبيەت تە ەرەكشە ميسسيا اتقارعانىن ءسوز ەتتى.

« ۇلى جەڭىس كەزىندە قازاق قالامگەرلەرى قالام مەن قارۋدى قاتار ۇستاپ, مايدان شەبىندە دە, شىعارماشىلىقتا دا حالىقتىڭ رۋحىن كوتەرۋگە زور ۇلەس قوستى. مالىك عابدۋللين, كەمەل توقاەۆ, ءازىلحان نۇرشايىقوۆ, قاسىم امانجولوۆ, قاسىم قايسەنوۆ جانە باسقا دا مايدانگەر جازۋشىلار ءوز شىعارمالارىندا سوعىس جىلدارىنداعى ەرلىكتى, وتانشىلدىقتى جانە ءومىر شىندىعىن كوركەم بەينەلەپ, كەلەر ۇرپاققا قۇندى ادەبي مۇرا قالدىردى. بۇگىندە ەلىمىزدە مايدانگەرلەر ەرلىگىن ۇلىقتاۋ باعىتىندا اۋقىمدى جۇمىس جۇرگىزىلىپ كەلەدى.

وسى ماقساتتا مادەنيەت جانە اقپارات مينيسترلىگى وتكەن جىلى مايدانگەرلەر تۋرالى دەرەكتەردى جيناقتاۋعا, جۇيەلەۋگە جانە ساقتاۋعا, سونداي-اق ولاردىڭ ۇلى جەڭىسكە قوسقان ۇلەسى جونىندەگى اقپاراتقا اشىق قولجەتىمدىلىكتى قامتاماسىز ەتۋگە ارنالعان بىرەگەي «باتىرلارعا تاعزىم» ونلاين-پورتالىن ىسكە قوستى», دەدى مينيستر.

ونىڭ ايتۋىنشا, سايتتا 705 488 ارداگەر تۋرالى مالىمەت ورنالاستىرىلعان. ولاردىڭ قاتارىندا 365 كەڭەس وداعىنىڭ باتىرى, 4 ەكى مارتە كەڭەس وداعىنىڭ باتىرى جانە 19 «داڭق» وردەنىنىڭ يەگەرى بار.

قاسىم-جومارت توقاەۆ جەڭىس كۇنىمەن قۇتتىقتادى

سونداي-اق, قوعامدا باتىرلار ەسىمىن ۇلىقتاۋ ىسىنە دە ايرىقشا ءمان بەرىلىپ كەلەدى. جەڭىستىڭ 80 جىلدىعىنا وراي ەكىنشى دۇنيەجۇزىلىك سوعىستىڭ 500-دەن استام ارداگەرىنىڭ ەسىمىن كوشەلەر مەن داڭعىلدارعا بەرۋ تۋرالى شەشىم قابىلداندى.

«قادىرلى دوستار! جەڭىس كۇنى – وتكەنگە تاعزىم ەتەتىن عانا ەمەس, كەلەر ۇرپاققا تاعىلىم بەرەتىن قاسيەتتى كۇن. ءبىزدىڭ ورتاق پارىزىمىز – سوعىس تۋرالى تاريحي شىندىقتى ساقتاۋ, جاستاردىڭ بويىنا وتانشىلدىق, بىرلىك جانە اتا-بابا ەرلىگىنە قۇرمەت قۇندىلىقتارىن ءسىڭىرۋ. بارشاڭىزدى جەڭىس كۇنىمەن تاعى دا قۇتتىقتايمىن! ەلىمىزدە ءاردايىم بەيبىتشىلىك پەن كەلىسىم سالتانات قۇرسىن!», دەلىنگەن قۇتتىقتاۋدا.