ەلوردادا قازاق تىلىندەگى العاشقى ءموبيلدى ويىن رەسمي تۇردە تانىستىرىلدى. مەملەكەتتىك ءتىلدى مەڭگەرۋگە, اقىل-ويدى دامىتۋعا ارنالعان ءتۇرلى تاپسىرمادان تۇراتىن, قيىندىقتى ەڭسەرىپ, بەلەستەردى باعىندىرۋعا جەتەلەيتىن جوبانى عىلىم جانە جوعارى ءبىلىم مينيسترلىگىنىڭ ء«تىل-قازىنا» ۇلتتىق ورتالىعى ازىرلەگەن. تۇساۋكەسەرگە ءتىل جاناشىرلارى, ۇكىمەت, سەنات مۇشەلەرى, مەملەكەت جانە قوعام قايراتكەرلەرى, اتا-انالار مەن بالالار قاتىستى.
وي مەن ويىن الاڭىندا ءسوز العان سەنات دەپۋتاتتارى نۇرتورە ءجۇسىپ, دارحان قىدىرالى مەن حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى جوبا اۆتورلارىن قۇتتىقتاپ, قازاق تىلىندەگى زاماناۋي كونتەنتتى دامىتۋدىڭ ماڭىزىن جانە بالالارعا ارنالعان ۇلتتىق تسيفرلىق ونىمدەردىڭ ستراتەگيالىق مانگە يە ەكەنىن اتاپ ءوتتى. ال عىلىم جانە جوعارى ءبىلىم ءمينيسترى ساياسات نۇربەك: «Steppe games» – مەملەكەتتىك ءتىل ساياساتىن ىلگەرىلەتۋدەگى جانە ءبىلىم بەرۋ سالاسىن تسيفرلاندىرۋداعى ءرولى ايرىقشا, تسيفرلىق ەكوجۇيە. ءونىم قازاق ءتىلىن ۇيرەتۋدىڭ جاڭا, كرەاتيۆتى جانە قولجەتىمدى فورماتىن قالىپتاستىرۋعا ىقپال ەتەدى. ونىڭ ۇستىنە كرەاتيۆ يندۋسترياداعى مازمۇن قۇندى تاۋارعا اينالدى. سوندىقتان ورتالىقتىڭ باستاماسىن قولدادىق, «Astana Hub» تا جوبانىڭ جۇزەگە اسۋىنا اتسالىستى», دەپ پىكىر ءبىلدىردى.
وسىدان سوڭ ء«تىل-قازىنا» ورتالىعىنىڭ باس ديرەكتورى ماقپال جۇماباي «Steppe games» ويىنىنىڭ نەگىزگى قۇرىلىمىن جينالعان جۇرتشىلىققا تانىستىردى. ونىڭ ايتۋىنشا, «Steppe games» جوباسى مەملەكەتتىك ءتىلدى بالالار مەن جاسوسپىرىمدەرگە ويىن ارقىلى ۇيرەتەدى. ياعني بۇل – «edutainment» فورماتىنا نەگىزدەلگەن العاشقى قازاق تىلىندەگى ءموبيلدى ويىن. «مۇندا ۇلتتىق تاعامدار, ۇلتتىق ويىندار, تاريحي ەسكەرتكىشتەر, سالت-ءداستۇر ەلەمەنتتەرى تاپسىرمالار تۇرىندە بەرىلەدى. ءونىمنىڭ ماڭىزدى ءبىر ەرەكشەلىگى, قىزىقتى سيۋجەتى بار. ويىننىڭ باستى كەيىپكەرلەرى ارمان مەن ايشانىڭ (بالا ءوز اتىن قويىپ ويناسا دا بولادى) جەتەلەيتىن سەرىگى – تازى. «Steppe games» ەلىمىزدىڭ ناقتى گەوگرافيالىق كارتاسىنا نەگىزدەلگەن. ءار وبلىس – ويىن ايماعى, ازىرگە الماتى مەن استانا قالالارىنان باستادىق. الداعى ۋاقىتتا باسقا دا وبلىستاردى قامتيمىز. سول كەزدە ءوڭىر-ءوڭىر بولىپ جارىسامىز دەسەك تە بولادى. ويىنداعى جالىقتىرمايتىن تىلدىك جاتتىعۋلار مەن تاپسىرمالار بالالاردى ءتىل ۇيرەنۋگە ۇزدىكسىز ىنتالاندىرادى», دەپ ءتۇسىندىردى م.جۇماباي.
ءىس-شارا بارىسىندا قاتىسۋشىلار قوسىمشانى تاجىريبە جۇزىندە سىناپ كوردى. بالالارعا ارنالعان ارنايى ويىن ايماعى ۇيىمداستىرىلىپ, ءاربىر كىشكەنتاي قوناققا ەستەلىك سىيلىقتار تابىستالدى. ايتا كەتەيىك, «Steppe games» ءموبيلدى قوسىمشاسىن «App Store» جانە «Play Market» پلاتفورمالارىنان جۇكتەي الاسىز.