استانادا العاش رەت ۇستەل تەننيسىنەن حالىقارالىق دەڭگەيدەگى پرەزيدەنت كۋبوگى وتەدى

جارىس Beeline Arena سپورت كەشەنىندە Nomad Table Tennis Academy ۇيىمداستىرۋىمەن, قر-نىڭ تۋريزم جانە سپورت مينيسترلىگى جانە قازاقستان ۇستەل تەننيسى فەدەراتسياسىنىڭ قولداۋىمەن وتكىزىلەدى. دەمەۋشىلەر Aspan Holding جانە VD Stroy Engineering كومپانيالارى.

ءتۋرنيردىڭ جالپى سىياقى قورى – 115 000 اقش دوللارىن قۇرايدى.

پرەزيدەنت كۋبوگى – وتاندىق ۇستەل تەننيسى تاريحىنداعى جاڭا بەلەس, ەل سپورتىنىڭ حالىقارالىق دەڭگەيگە كوتەرىلۋىنە جول اشاتىن ماڭىزدى قادامداردىڭ ءبىرى. بۇل تۋرنير ەلىمىزدىڭ تۇكپىر-تۇكپىرىنەن جانە شەتەلدەن كەلگەن ۇزدىك تەننيسشىلەردى ءبىر الاڭدا توعىستىراتىن سپورت مەرەكەسىنە اينالماق.

جارىسقا 250-دەن استام سپورتشى, 50-گە جۋىق باپكەر جانە 30 تورەشى قاتىسادى. قاتىسۋشىلار قاتارىندا استانا, الماتى, شىمكەنت, قاراعاندى وڭىرلەرىنەن, سونداي-اق وڭتۇستىك كورەيا, قىتاي, ۆەنگريا, مىسىر, مالايزيا, يران, ساۋد ارابياسى سياقتى ەلدەردەن كەلگەن تەننيسشىلەر بار.

جارىس ساناتتارى

تۋرنير جەكە جانە كوماندالىق جارىس تۇرلەرىندە ءتورت سانات بويىنشا وتەدى:

U-11 – 2014 جىلى تۋعاندار جانە 11 جاسقا دەيىنگىلەر;

U-16 – 2009 جىلى تۋعاندار جانە 16 جاسقا دەيىنگىلەر;

Open 17+ – 2008 جىلى تۋعاندار جانە ودان ۇلكەندەر;

Team event – كوماندالىق سايىس.

ءتۋرنيردىڭ ەڭ كوپتەن كۇتكەن جانە ەرەكشە ءساتى – الەمدىك ۇستەل تەننيسىنىڭ اڭىز تۇلعالارى قاتىساتىن شوۋ-ماتچ. استانادا ءبىر ساحنادا ونەر كورسەتەتىن جۇلدىزدار:

Xu Xin (قىتاي) – ۇستەل تەننيسىنەن الەمنىڭ ەكس-ءبىرىنشى راكەتكاسى; Fang Bo (قىتاي) – الەم چەمپيوناتىنىڭ كۇمىس جۇلدەگەرى; Werner Schlager (اۆستريا) – الەم چەمپيونى (2003); Joo Sae-hyuk (كورەيا) – الەم جانە وليمپيادا جۇلدەگەرى.

ەل نامىسىن قورعايتىن جەتەكشى سپورتشىلار قاتارىندا: كيريلل گەراسيمەنكو, الان قۇرمانعاليەۆ, ايدوس كەنجەعۇلوۆ, ەسكەندىر حاركي, زاۋرەش اكاشەۆا, سارۆينوز ميركاديروۆا, جانەركە كوشكىمباەۆا جانە انەل باقىت بار. ولاردىڭ قاتىسۋى ءتۋرنيردىڭ دەڭگەيىن ارتتىرىپ, جاس بۋىنعا ۇلكەن شابىت سىيلايدى.

جارىس كەستەسى

24 قازان – قاتىسۋشىلاردىڭ كەلۋى, جاتتىعۋ, پرەسس-كونفەرەنتسيا • 25 قازان – سالتاناتتى اشىلۋ ءراسىمى, جەكە بىرىنشىلىك (U-11, U-16) • 26 قازان – جەكە بىرىنشىلىك (U-11, U-16) • 27 قازان – كوماندالىق بىرىنشىلىك جانە جەكە جارىس (Open 17+) • 28 قازان – جارتىلاي فينالدىق كەزدەسۋلەر • 29 قازان – فينالدىق ويىندار جانە ماراپاتتاۋ ءراسىمى

پرەزيدەنت كۋبوگى – سپورت مادەنيەتىن دامىتۋعا, جاستار اراسىندا ۇستەل تەننيسىن كەڭىنەن ناسيحاتتاۋعا جانە حالىقارالىق ىنتىماقتاستىقتى نىعايتۋعا باعىتتالعان. بۇل تۋرنير تەك جارىس الاڭى عانا ەمەس, جاس تالانتتار مەن الەمدىك شەبەرلەردىڭ توعىساتىن ورتاسى بولماق.

بارلىق قالا تۇرعىندارى مەن قوناقتارى ءۇشىن تۋرنيرگە كىرۋ تەگىن!

بۇل – كاسىبي سپورتشىلار ويىنىن تاماشالاپ, وتاندىق تەننيسشىلەردى قولداۋعا تاماشا مۇمكىندىك.