سۋ ۆەدومستۆوسىنىڭ باسسەين ينسپەكتسيالارى وسى جىلعى ۆەگەتاتسيا كەزەڭىندە سۋ زاڭناماسىن بۇزعاندارعا 310 ايىپپۇل سالعان, جالپى سوماسى 58,3 ملن تەڭگە بولعان, دەپ جازادى Egemen.kz.
بىلتىر سۋارۋ ماۋسىمىندا سۋ زاڭناماسىن بۇزعاندارعا 15,8 ملن تەڭگە كولەمىندە 188 ايىپپۇل سالىنعان ەكەن.
ەسكە سالايىق, سالا مينيسترلىگى ۆەگەتاتسيا كەزەڭىندە ەلىمىزدىڭ وڭتۇستىگىندە ءتورت جۇمىس توبىن قۇرعان. ولار وڭىرلەردە سۋدىڭ ءادىل ءبولىنۋىن قامتاماسىز ەتىپ, سۋ شارۋاشىلىعى جاعدايىنا تۇراقتى مونيتورينگ جۇرگىزدى.
سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى نۇرلان الدامجاروۆتىڭ ايتۋىنشا, باس پروكۋراتۋرانىڭ, قۇقىق قورعاۋ جانە وزگە دە مەملەكەتتىك ورگانداردىڭ قاتىسۋىمەن مينيسترلىك رەسپۋبليكا دەڭگەيىندە سۋدىڭ «قارا نارىعىنا» قارسى كۇرەس جونىندەگى ۆەدومستۆوارالىق جۇمىس توبىن قۇرۋ جۇمىستارىن جۇرگىزىپ جاتىر.
«قازىر باس پروكۋراتۋرامەن بىرلەسىپ, زاڭسىز سۋ الۋ فاكتىلەرىنە قارسى كۇرەستى جالعاستىرۋ الگوريتمى ازىرلەنىپ جاتىر», دەدى ن.الدامجاروۆ.