ۇلىتاۋ وبلىسى, جاڭاارقا اۋدانىنىڭ مادەني-ساۋىق ورتالىعىندا قر حالىق ءارتىسى, مەملەكەتتىك سىيلىقتىڭ يەگەرى, قازاقستاننىڭ ەڭبەك ەرى قايرات بايبوسىنوۆتىڭ 75 جىلدىق مەرەيتويىنا ارنالعان «قازاقتىڭ قايراتى» اتتى سالتاناتتى كەش ءوتتى, دەپ جازادى Egemen.kz.
قازاقتىڭ ۇلتتىق ونەرىنە ولشەۋسىز سىڭىرگەن ەڭبەگى ءۇشىن مەملەكەت باسشىسى قاسىم-جومارت توقاەۆتىڭ قولىنان «قازاقستاننىڭ ەڭبەك ەرى» اتاعىن العان ءانشى ازاماتىن جاڭاارقا جۇرتى قۇشاق جايىپ قارسى الدى. جاڭاارقادان «بالا ءبىرجان» دەگەن اتاقپەن اتتانىپ, الپىس جىلعا جۋىق ارقا اندەرىن عانا ەمەس, قازاقتىڭ حالىق اندەرىن, قازاق كومپوزيتورلارىنىڭ اندەرىن حالىققا ناسيحاتتاپ, ۇلتتىق ءان ونەرىندە تۇڭعىش «قازاقستاننىڭ ەڭبەك ەرى» اتاعىن يەلەنگەن دارا تۇلعا تۋعان جەرىنىڭ تورىنەن ورىن الدى.
قازاقتىڭ كورنەكتى اقىنى, قازاقستاننىڭ مەملەكەتتىك سىيلىعىنىڭ لاۋرەاتى عالىم جايلىباي, قر پارلامەنتى ءماجىلىسىنىڭ دەپۋتاتى, قازاقستاننىڭ ەڭبەك سىڭىرگەن قايراتكەرى امانجول ءالتاي, قازاقستاننىڭ ەڭبەك سىڭىرگەن قىزمەتكەرى, قازاق كسر جانە قازاقستاننىڭ دەنساۋلىق ساقتاۋ سالاسىنىڭ ۇزدىگى ابىلحاكىم اقمىرزين, ۇلىتاۋ وبلىسى اكىمىنىڭ ورىنباسارى ۇلانتاي ۇسەنوۆ, جەزقازعان قالاسىنىڭ اكىمى قايرات شايجانوۆ, قر قۇرمەتتى سپورت قىزمەتكەرى, مەتسەنات قانات احمەتوۆ سياقتى ەل الدىندا جۇرگەن ازاماتتار ىزگى نيەتىن جەتكىزدى.
قايرات اۋكەن ۇلى قازاقتىڭ ءانىن الەمگە پاش ەتكەن كۇمىس كومەي ءانشى عانا ەمەس, قازاق ءداستۇرلى ءان ونەرىن كەڭىنەن ناسيحاتتاۋشى, زەرتتەۋشى, ۇستاز. ءان ونەرىندە كوپتەگەن ءاننىڭ ايتىلۋىن, ءوزىنىڭ باستاپقى ماقامىن وزگەرتپەي جاڭا تۇرعىدا ايتۋ ءۇشىن تەر توككەن. ۇستازىن القالاپ, قولداپ, قولپاشتاعان عالىم مۇحامەدين, سەرىك وسپانوۆ, ەركىن شۇكىمان, ايگۇل قوسانوۆا, ارداق يساتاەۆا, جاقسىلىق كەمالوۆ, سەرجان مۇسايىنوۆ, ايتبەك نىعىزباەۆ, ەرجان بازاربەكوۆ, سىرىم مۇحامەدجانوۆ سياقتى ونەردە ءوز ورىندارى شاكىرتتەرى ارقانى انگە بولەدى.
جاڭاارقا جۇرتشىلىعىنىڭ ارداقتى انشىگە دەگەن قۇرمەتى مەن ىقىلاسى شەكسىز! مەرەيتوي يەسى قايرات بايبوسىنوۆقا ونەرى مەن حالقىنا سىڭىرگەن ەڭبەگىنىڭ قۇرمەتىندەي جاڭاارقا اۋدانى اتىنان اۆتوكولىك كىلتى تابىستادى.
اسىلىن ارداقتاپ, بارىن باعالاپ, الاقانعا سالعان حالىقتىڭ بازارى تارقاماسىن!
ۇلىتاۋ وبلىسى