بۇل – كەيىنگى ءۇش جىلدا پاۆلودار وڭىرىنە تارتىلعان قاراجاتتىڭ مولشەرى. تەك بيىل العاشقى 7 ايدا نەگىزگى كاپيتالعا 535,1 ملرد تەڭگە سالىنعان. اسىرەسە ونەركاسىپ, اۋىر ءوندىرىس, مۇناي-گاز, سونداي-اق فەرروقورىتپا سالالارىنا قاراجات كوبىرەك قۇيىلىپتى.
«پاۆلودار» ارنايى ەكونوميكالىق ايماعىنىڭ ينۆەستيتسيالىق پورتفەلى – 541 ملرد تەڭگە. وندا 36 قاتىسۋشى تىركەلگەن جانە الداعى 5 جىلدا مەتالل كونسترۋكتسيا, پوليمەر تۇيىرشىگى, تسەلليۋلوزا, جوعارى كەرنەۋلى يزولياتور جانە باسقا دا ونىمدەر شىعاراتىن جوبالار ىسكە اسىرىلادى. ارنايى ەكونوميكالىق ايماقتىڭ تيىمدىلىگىن ارتتىرۋ ءۇشىن قاتىسۋشىلاردىڭ ءوز مىندەتتەمەسىن ورىنداۋى بويىنشا باقىلاۋدى كۇشەيتتىك, جوبالاردى ىرىكتەۋ كريتەريلەرىن كەڭەيتۋ بويىنشا شارالار قابىلداپ جاتىرمىز», دەيدى وبلىس اكىمىنىڭ ورىنباسارى ايگەرىم قابىلتاەۆا.
ەكىباستۇزدا جالپى قۋاتتىلىعى 460 مىڭ توننا بولاتىن 3 فەرروقورىتپا زاۋىتى سالىنىپ جاتىر. ەكەۋى جىل سوڭىنا دەيىن ىسكە قوسىلادى. كەنشىلەر قالاسىنىڭ ماڭىندا بيىل بولاشاق ەلەكتر مەتاللۋرگيا زاۋىتىنىڭ كاپسۋلاسى سالىندى. جوبا تاۋ-كەن مەتاللۋرگيا كەشەنىن دامىتۋعا تىڭ سەرپىن بەرەتىنىن اتاپ ءوتۋ كەرەك. «پاۆلودار» ارنايى ەكونوميكالىق ايماعىندا (اەا) قۇرامىندا التىنى بار جوعارى كومىرتەكتى ءسۋلفيدتى كونتسەنتراتتاردى قايتا وڭدەۋ جوباسى, سۇيىتىلعان مۇناي گازىن پايدالانۋ جوباسى ىسكە اسىپ وتىر. بۇعان قوسا جىلىنا 97 مىڭ توننا الكيلات شىعاراتىن جاڭا زاۋىت ىسكە قوسىلادى. «الكيلات» زاۋىتى ەكولوگيالىق تالاپتارعا ساي ك5 كلاسىنداعى تاۋارلىق بەنزين وندىرىسىندە جوعارى وكتاندى كومپونەنتتى الۋ ءۇشىن پايدالانىلادى.
وڭىرلىك كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى ليۋدميلا كۋرمانوۆانىڭ دەرەگىنشە, جىل قورىتىندىسى بويىنشا ەرتىس – بايان ءوڭىرىنىڭ ءتۇرلى سالاسىنا 1 ترلن تەڭگەدەن استام ينۆەستيتسيا قۇيىلادى دەپ بولجانىپ وتىر.
«ينۆەستيتسيالاردىڭ باسىم بولىگى (53%-ى) ونەركاسىپ سالاسىنا, ونىڭ ىشىندە وڭدەۋ جانە تاۋ-كەن ءوندىرۋ ونەركاسىبىنە تيەسىلى. تاعى 19%-ى اۋىل شارۋاشىلىعىنا, سونداي-اق 16%-ى كولىك جانە قويمالاۋ سالالارىنا قاتىستى. پاۆلودار وبلىسىندا وڭدەۋ جانە تاۋ-كەن ونەركاسىبى كاسىپورىندارى, باي مينەرالدى-شيكىزات بازاسى, دامىعان ەنەرگەتيكالىق ينفراقۇرىلىم شوعىرلانعان. ينۆەستورلار ءۇشىن بۇل ەڭ اۋەلى ەنەرگياعا جۇمسالاتىن شىعىنداردىڭ ارزاندىعىن بىلدىرەدى», دەيدى باسقارما باسشىسى.
ماماندار كولىك جانە قويمالاۋ سالاسىنداعى ينۆەستيتسيالاردىڭ وسە تۇسۋىنە وبلىستىڭ نەگىزگى كولىك دالىزدەرىنىڭ قيىلىسىندا ورنالاسۋى سەبەپ دەيدى. وبلىس رەسەيمەن شەكارالاس, ءبىزدىڭ ءوڭىر ارقىلى شەتەل كومپانيالارى قازاقستاننىڭ ىشكى نارىعىنا قول جەتكىزىپ, قىتايعا شىعا الادى. وسى رەتتە لوگيستيكالىق ورتالىق, تەرمينال, قويما جانە ينفراقۇرىلىمدىق جوبالارعا سۇرانىس ارتىپ كەلەدى. ينۆەستورلار مۇنى تاۋار اعىنىن ۇلعايتۋ جانە حالىقارالىق ساۋدانى دامىتۋ ارقىلى اقشا تابۋ مۇمكىندىگى دەپ ەسەپتەيدى. وڭىرگە قارجى قۇيىپ وتىرعان ەڭ بەلسەندى ەلدەر – قىتاي, رەسەي, تۇركيا, گەرمانيا جانە فرانتسيا.
ايماقتىڭ ينۆەستيتسيالىق جوبالار پۋلى 2032 جىلعا دەيىنگى ىسكە اسىرۋ كەزەڭىمەن ەسەپتەگەندە 100-دەن استام جوبانى قۇرايدى. جيىنتىق قۇنى – 7 ترلن تەڭگە. نەگىزگى كاپيتالعا ينۆەستيتسيا كولەمى جونىنەن ءوڭىر ەلىمىزدەگى ۇزدىك 10 ايماقتىڭ قاتارىنا ەنگەن. سالىنعان ينۆەستيتسيا ەسەبىنەن جىل باسىنان بەرى 500-گە جۋىق جۇمىس ورنى قۇرىلعان. ال شەتەل قاراجاتىنىڭ قۇيىلۋىمەن تەك بىلتىر جالپى قۇنى 20,4 ملرد تەڭگە بولاتىن 5 جوبا ىسكە قوسىلعان. ولار – جيھاز, اليۋميني جانە بيمەتالل رادياتورلارىن ءوندىرۋ (اككۋمۋلياتورلاردى قايتا وڭدەۋ), ەلەكترمەن دانەكەرلەنگەن ءتۇزۋ تىگىستى قۇبىرلاردى شىعاراتىن زاۋىتتى جاڭعىرتۋ جانە ءسۇت-تاۋار فەرماسىن سالۋ جوبالارى.
بيىل پاۆلودار ءوڭىرى اگروونەركاسىپتىك كەشەنگە سالىنعان ينۆەستيتسيا كولەمى بويىنشا رەسپۋبليكادا ەكىنشى ورىنعا شىقتى. اۋىل شارۋاشىلىعى باسقارماسى باسشىسىنىڭ ورىنباسارى الىبەك قالەنوۆتىڭ ايتۋىنشا, ايماقتا جالپى سوماسى 38,4 ملرد تەڭگە بولاتىن 25 جوبا (قايتا وڭدەۋ كاسىپورىندارى, اۋىل شارۋاشىلىعى ونىمدەرىن ساقتاۋ نىساندارى جانە سۋارمالى جەرلەر) دايىن تۇر. ولاردىڭ ىسكە قوسىلۋى ناتيجەسىندە 125 جاڭا جۇمىس ورنى اشىلادى دەپ جوسپارلانعان.
پاۆلودار وبلىسى