شىعىس قازاقستان وبلىسى ۇلان اۋدانىنىڭ بوزانباي اۋىلىندا كوركەم بۇركىت توبەنىڭ ەتەگىندە «شىعىس سالبۋرىنى-2025» اتتى V مەرەيتويلىق حالىقارالىق فەستيۆال باستالدى. وعان موڭعوليا, رەسەي, ۆەنگريا, قىرعىزستان, يسپانيا جانە باسقا دا ەلدەردەن قوناقتار مەن قاتىسۋشىلار جينالدى, دەپ حابارلايدى Egemen.kz.
شارانىڭ قۇرمەتتى قوناقتارى قاتارىندا تۋريزم جانە سپورت مينيسترلىگىنىڭ مەملەكەتتىك جاتتىقتىرۋشىسى بازاربەك كۇنتۋعان, رەسپۋبليكالىق قۇسبەگىلەر فەدەراتسياسىنىڭ ۆيتسە-پرەزيدەنتى باعداتحان مۇپتەكەقىزى, موڭعوليادان كەلگەن اڭىزعا اينالعان بۇركىتشى ايشولپان نۇرعايىپ جانە حالىقارالىق ەتنومادەني ۇيىمداردىڭ وكىلدەرى بار.
شقو اكىمدىگىنىڭ مالىمەتىنشە ەتنوالاڭدا 30-دان استام كيىز ۇيدەن قۇرالعان ەتنواۋىل تىگىلدى. مۇندا شەبەرلىك ساباقتارى, قولونەر كورمەلەرى, سونداي-اق قازاقتىڭ سالت-داستۇرلەرى كورسەتىلىپ جاتىر: «اشامايعا مىنگىزۋ», «بەتاشار», «تۇساۋ كەسۋ», «قىرقىنان شىعارۋ», «بەسىككە سالۋ», «سىرعا سالۋ».
فەستيۆالدىڭ باستى وقيعاسىنا – جىرتقىش قۇستارمەن اڭ اۋلايتىن قۇسبەگىلەر سايىسى جاتادى. سونىمەن قاتار, تازى جارىسى, كوكپار جانە باسقا دا ۇلتتىق ويىندار ۇيىمداستىرىلعان.