ەكىباستۇزدىڭ اۋىلدىق ايماعىندا جەكە شارۋاشىلىقتىڭ ءۇيى مەن شارۋاشىلىق عيماراتتارى ورتەنگەن. ءتىلسىز جاۋدىڭ سالدارىنان ۇيدە بولعان 6 ادام ورتەنىپ كەتكەن, دەپ حابارلايدى Egemen.kz.
سولنەچنىي كەنتىنە قاراستى شارۋا قوجالىقتارىنىڭ بىرىندە تۇرعىن ءۇي مەن وزگە دە شارۋاشىلىق عيماراتتارى جانعان.
- كەنتتەن 7 شاقىرىم جەردەگى شارۋا قوجالىعىنىڭ عيماراتتارى جانىپ جاتقانى تۋرالى حابارلاما بۇگىن ساعات 06.34-تە كەلىپ ءتۇستى. وقيعا ورنىنا جەدەل تۇردە توتەنشە جاعداي دەپارتامەنتىنىڭ كۇشتەرى مەن ءورت ءسوندىرۋ قۇرالدارى, ەكىباستۇز گرەس-2 ستانساسىنىڭ ورتكە قارسى قۇرىلىمدارى, سولنەچنىي كەنتىنىڭ ءورت ءسوندىرۋ بەكەتى جۇمىلدىرىلدى. قۇتقارۋشىلار ءتىلسىز جاۋدى اۋىزدىقتاۋ بارىسىندا ارقايسىسى 27 ليترلىك 8 گاز باللونىن سىرتقا الىپ شىقتى. بەلگىلى بولعانداي, ءورت جەكە تۇرعىن ءۇيدى تولىقتاي شارپىپ, جاقىن ماڭداعى شارۋاشىلىق عيماراتتارىنا تارالعان. جالپى اۋدانى 930 شارشى مەتر اۋماقتى قۇراعان, - دەپ حابارلادى وڭىرلىك توتەنشە جاعدايلار دەپارتامەنتىنەن.
وقيعا كەزىندە ۇيدە 7 ادام بولعان. 1972 جىلى تۋعان ەر ادام سىرتقا ءوز بەتىمەن شىعىپ ۇلگەرگەن. قۇتقارۋشىلار وقيعا ورنىنان ء(ۇي ىشىنەن) 6 ادامنىڭ دەنەسىن تاپقان. مارقۇمداردىڭ جەكە باستارى انىقتالىپ جاتىر. تەرگەۋ ورگاندارى قايعىلى وقيعانىڭ ءمان-جايىن انىقتاۋعا كىرىستى. زارداپ شەككەن ادام ەمدەۋ مەكەمەسىنە جەتكىزىلىپ, قاجەتتى ەم-دوم كورسەتىلۋدە.
توتەنشە جاعداي دەپارتامەنتى قايتىس بولعانداردىڭ بارلىعى ەرەسەك ەكەنىن, ارالارىندا بالالار بولماعانىن مالىمدەدى.
ءورتتى سوندىرۋگە قۇتقارۋشىلاردىڭ جەكە قۇرامىنان 30 ادام جانە 10 تەحنيكا قاتىسقان.
پاۆلودار وبلىسى