ەل ازاماتتارىنىڭ جارتىسىنان استامى ءوز ومىرىنە قاناعاتتاناتىنىن ايتتى. بۇل تۋرالى ۇلتتىق ستاتيستيكا بيۋروسى جۇرگىزگەن «حالىقتىڭ ءومىر ءسۇرۋ ساپاسى» تاقىرىبىنداعى ىرىكتەمەلى زەرتتەۋ ناتيجەسىندە بەلگىلى بولدى, دەپ جازادى Egemen.kz.
اۋىل تۇرعىندارى ءوز ومىرىنە كوبىرەك ريزا
زەرتتەۋ دەرەكتەرىنە سۇيەنسەك, رەسپوندەنتتەردىڭ 53,2 پايىزى ءومىر ءسۇرۋ جاعدايلارىنا تولىق قاناعاتتاناتىنىن, 46,3 پايىزى جارتىلاي قاناعات ەكەنىن بىلدىرگەن. اۋىلدىق ەلدى مەكەندەردە تۇراتىنداردىڭ 65,4 پايىزى ءوز تۇرمىس دەڭگەيىن وڭ باعالاعان, بۇل كورسەتكىش قالالىق جەرلەردە 51,7 پايىزدى قۇرايدى.
2024 جىلمەن سالىستىرعاندا قاناعاتتانۋ دەڭگەيى ءسال ارتقان: بىلتىر بۇل كورسەتكىش 52,5 پايىز بولسا, بيىل 53,2 پايىزعا جەتكەن.
دەنساۋلىق پەن تابىسقا كوزقاراس
رەسپوندەنتتەردىڭ جارتىسىنا جۋىعى (51%) ءوز دەنساۋلىقتارىنا كوڭىلى تولاتىنىن ايتقان, ال 46,4 پايىزى بۇل سۇراققا «جارتىلاي قاناعات» دەپ جاۋاپ بەرگەن. دەنساۋلىققا قاناعاتتانۋ دەڭگەيى وتكەن جىلمەن سالىستىرعاندا 1,5 پايىزدىق تارماققا وسكەن (2024 جىلى – 49,5%).
ماتەريالدىق تۇرعىدا ازاماتتاردىڭ كوپشىلىگى وزدەرىن «ورتاشا قامتاماسىز ەتىلگەندەر» قاتارىنا جاتقىزادى — مۇنداي پىكىردى 73,6 پايىز رەسپوندەنت بىلدىرگەن.
قولداۋ مەن ءۇمىت باسىم
ساۋالناماعا قاتىسۋشىلاردىڭ 65,8 پايىزى تۋىستارى مەن تانىستارىنان مورالدىق قولداۋ تاباتىنىنا سەنىمدى ەكەنىن ايتقان. ال 73 پايىزى ءوز بولاشاعىنا سەنىپ, الداعى ۋاقىتتا ءومىر ءسۇرۋ جاعدايى جاقسارادى دەپ ءۇمىت ءبىلدىردى.
ۇلتتىق ستاتيستيكا بيۋروسىنىڭ زەرتتەۋى حالىقتىڭ الەۋمەتتىك كوڭىل كۇيى مەن ءومىر ساپاسىنا دەگەن كوزقاراسىنىڭ بىرتىندەپ وڭ باعىتتا وزگەرىپ كەلە جاتقانىن كورسەتەدى.