استاناداعى اقبۇلاق وزەنى بويىندا ەرەكشە تەحنيكالىق سايىس ءوتتى. «TWO BRIDGES ENU» اتتى اشىق كەمەمودەلدەۋ جارىسىنا ەلىمىزدىڭ التى وبلىسىنان كەلگەن 10-17 جاس ارالىعىنداعى 40-تان استام وقۋشى قاتىسىپ, ءوز قولدارىمەن جاساعان كەمە ۇلگىلەرىن تانىستىردى, دەپ جازادى Egemen.kz.
جارىستىڭ سالتاناتتى اشىلۋىنا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى ستراتەگيالىق دامۋ جانە ينتەرناتسيونالداندىرۋ جونىندەگى پرورەكتورى دۋمان ايتماعامبەتوۆ, Propilon جوبالاۋ بيۋروسىنىڭ نەگىزىن قالاۋشى ءارى باسشىسى, ۋنيۆەرسيتەت تۇلەگى دانيل لوگۆينەنكو, كەمەمودەلدەۋ فەدەراتسياسىنىڭ پرەزيدەنتى سەرگەي وكونەچنيكوۆ, سونداي-اق «ARNNA MINERALS» كومپانياسىنىڭ وكىلدەرى مەن ۋنيۆەرسيتەت ۇجىمى قاتىستى.
«پرەزيدەنتىمىز ەلىمىزگە تەحنيكالىق باعىتتاعى ماماندار قاجەت ەكەنىن ءجيى اتاپ وتەدى. بىلىكتى مامانداردىڭ قالىپتاسۋى ءدال وسىنداي قىزىعۋشىلىقتان باستالادى. ۋنيۆەرسيتەتىمىز – زەرتتەۋ باعىتىن ۇستاناتىن جوعارى وقۋ ورنى, سوندىقتان بىزگە وسىنداي ىزدەنىمپاز جاستار قاجەت», دەدى پرورەكتور دۋمان ايتماعامبەتوۆ.
جارىستى ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن رەسپۋبليكالىق قوسىمشا ءبىلىم بەرۋ وقۋ-ادىستەمەلىك ورتالىعى ۇيىمداستىردى. ءىس-شارا استانا قالاسى اكىمدىگىنىڭ قولداۋىمەن ءوتتى. باس دەمەۋشى – Propilon, سەرىكتەستەر قاتارىندا Shaurma Food, Miglior سىندى كومپانيالار بار.
«وسىنداي سايىستاردىڭ سەبەبىمەن بالالار بوس ۋاقىتتارىن ءتيىمدى وتكىزىپ, ءوز قولىمەن جاڭا نارسە جاساۋعا داعدىلانادى. ولار الەۋمەتتىك جەلىگە تەلمىرىپ وتىرماي, ناقتى تەحنيكامەن اينالىسادى. ءبىز ءدال وسى شىعارماشىل ءارى ىزدەنىمپاز بۋىندى قولداۋعا بەل بۋدىق», دەدى Propilon باسشىسى دانيل لوگۆينەنكو.
سايىسقا استانا, اقمولا, قاراعاندى, پاۆلودار, قوستاناي جانە باتىس قازاقستان وبلىستارىنان كەلگەن 8 كوماندا قاتىستى. جاس مودەليستەر اراسىندا ەرەكشە كوزگە تۇسكەندەردىڭ ءبىرى – الەكساندر زامانوۆ. ول كەمەمودەلدەۋمەن بەس جىلدان بەرى اينالىسىپ كەلەدى.
«جاساپ وتىرعان ءاربىر ۇلگىم مەن ءۇشىن كىشكەنتاي جاڭالىق سياقتى. سەبەبى ونىڭ قۇرىلىمىن ويلاستىرىپ, قوزعالتقىشىن رەتتەپ, سۋدىڭ ۇستىندە قالاي جۇرەتىنىن باقىلاۋ – ناعىز تاجىريبە الاڭى. بولاشاقتا وسى باعىتتا كاسىبي مامان بولۋدى ارماندايمىن», دەيدى جاس قاتىسۋشى.
ال باتىس قازاقستان وبلىسىنان كەلگەن سۇلتانبەك ماقسۇتوۆتىڭ ايتۋىنشا, ول كىشكەنتاي كەزىنەن تەحنيكاعا قۇمار بولىپتى. ءتۇرلى ءۇي تەحنيكالارىن بۇزىپ-جيناپ, ءوز بەتىنشە ۇيرەنگەن. قازىر ورتالىقتا سۇيىكتى ىسىمەن اينالىسىپ ءجۇر. بولاشاقتا IT سالاسىنا بەت بۇرىپ, وندىرىستىك كەمەلەردىڭ ۇلگىلەرىن جاساۋدى ارماندايدى. ونىڭ دوسى جىگەر باقتىگەرەەۆ تە 12 جاسىنان بەرى كەمەمودەلدەۋمەن اينالىسىپ كەلەدى. قازىر ول مەكتەپ بىتىرگەن سوڭ ەۋرازيا ۇلتتىق ۋنيۆەرسيتەتىنە تەحنيكالىق ماماندىق بويىنشا وقۋعا تۇسۋگە نيەتتى.
تەرەكتى اۋدانىنان كەلگەن ۇيىرمە جەتەكشىسى ماناس اققوجين بۇل تەحنيكالىق ونەردىڭ جاستار اراسىندا ۇلكەن قىزىعۋشىلىق تۋدىرىپ وتىرعانىن ايتتى.
«كەمە ۇلگىسىن جاساۋ – بۇل تەحنيكالىق شىعارماشىلىق پەن سپورتتىق باسەكەنى بىرىكتىرەتىن ەرەكشە سالا. قازىر الەمدە تەحنيكا مەن قاشىقتان باسقارىلاتىن قۇرىلعىلاردىڭ زامانى. مۇنداي سايىستار بالالاردىڭ زەرتتەۋشىلىك, تەحنيكالىق قابىلەتتەرىن دامىتىپ, ولاردى عىلىم مەن ءوندىرىس سالاسىنا باعىتتايدى. بۇگىندە ءبىزدىڭ شاكىرتتەر ەل كولەمىندەگى ءتۇرلى بايقاۋلاردا جۇلدەلى ورىن الىپ ءجۇر», دەدى ول.
سايىس قورىتىندىسى بويىنشا ءبىرىنشى ورىندى قاراعاندى وبلىسىنىڭ كومانداسى يەلەندى, ەكىنشى ورىن – باتىس قازاقستان وبلىسىنا, ال ءۇشىنشى ورىن – قوستاناي وبلىسىنا بۇيىردى. جەڭىمپازدار مەن 15 ونەرتاپقىش ارنايى ديپلومدارمەن ماراپاتتالدى.