جامبىل وبلىسىنداعى فۋرمانوۆ اينالما كانالىندا 40 جىلدان كەيىن مەحانيكالىق تازالاۋ جۇمىستارى جۇرگىزىلىپ جاتىر. وسى كانال ارقىلى شۋ وزەنى سۋى تۇركىستان وڭىرىندەگى سوزاق اۋدانىنا باعىتتالادى. بۇگىندە كانالدىڭ 52 شاقىرىمى تازارتىلعان, دەپ جازادى Egemen.kz.
اتالعان جۇمىسقا 8 شىنجىر تاباندى ەكسكاۆاتور مەن ەكى تيەگىش تارتىلعان, سۋ جىبەرۋ ماۋسىمى باستالعانعا دەيىن 70 شاقىرىمنان استام اۋماقتى تازالاۋ جوسپارلانعان.
بىلتىرعى قىركۇيەكتەن وسى جىلعى ءساۋىر ايىنا دەيىن شۋ وزەنى ارقىلى سوزاق اۋدانىنا 1,5 ميلليارد تەكشە مەتردەن استام سۋ جىبەرىلگەن ەكەن.
فۋرمانوۆ اينالما كانالىنىڭ جالپى ۇزىندىعى – 120 شاقىرىم, ال وتكىزۋ قۋاتى – سەكۋندىنا 45-50 تەكشە مەتر.
كانال – مالعا سۋ بەرۋگە, باۋ-باقشا مەن جايىلىمدى سۋارۋعا پايدالانىلادى. قازىر كانالدىڭ ءتۇبى ەكى مەترگە دەيىن تازالانىپ, جاعالاۋلارى قالپىنا كەلتىرىلىپ جاتىر.
«سالا مينيسترلىگىنىڭ قولداۋىمەن جۇرگىزىلىپ جاتقان جۇمىس سارىسۋ, سوزاق اۋداندارى تۇرعىندارىنا زور كومەك بولارىنا سەنەمىز», دەيدى مويىنقۇم اۋدانىنىڭ تۇرعىنى تەمىرلان اقبالاەۆ. ايتا كەتەلىك, اتالعان كانال جامبىل ءوڭىرىنىڭ مويىنقۇم اۋدانىنداعى قىلىشباي, قۇموزەك, قارابوگەت, سارىوزەك ەلدى مەكەندەرى ماڭىنان وتەدى.