اتىراۋ وبلىسىنىڭ قۇرمانعازى اۋدانىندا 30 گەكتاردا قامىس قوپاسى بىقسىدى. بۇگىن ونىڭ 12 گەكتارى ءسوندىرىلدى, دەپ حابارلايدى Egemen.kz.
وبلىس اكىمىنىڭ ورىنباسارى قايرات نۇرتاەۆ مۇنايلى شاھاردا سەزىلگەن يىسكە بايلانىستى قۇرىلعان جەدەل شتابتىڭ جينالىسىن وتكىزدى. ءورت وشاقتارىن انىقتاۋ ءۇشىن جۇرگىزىلگەن مونيتورينگ كەزىندە ءورتتىڭ اتىراۋ قالاسىنان 20 شاقىرىم قاشىقتا تۇتانعانى انىقتالعان.
«اتىراۋ وبلىستىق توتەنشە جاعدايلار دەپارتامەنتىنىڭ جەدەل كەزەكشىسى كەشە, 6 قازاندا ساعات 23:00-دە اتىراۋ قالاسىنان كاسپي تەڭىزىنە قاراي شامامەن 20 شاقىرىم قاشىقتىقتا 1 گەكتاردا قۇرعاق ءشوپتىڭ جانعانىن انىقتادى. كەزەكشى قۇرامنىڭ كۇشىمەن بۇگىن, 7 قازاندا ساعات 01:12-دە ءورت وشاعى تولىق جويىلدى», دەپ حابارلادى دەپارتامەنتتىڭ يميدجدىك جۇمىس جانە سىرتقى كوممۋنيكاتسيالار توبى.
ال قۇرمانعازى اۋدانىندا 67 شاقىرىم قاشىقتاعى «جاركاسا» كانالىنىڭ قارسى بەتىندە, كاسپي تەڭىزىنىڭ جاعالاۋىنداعى 30 گەكتاردا قامىس قوپاسى بىقسىپ جاتىر.
«وسى كەزگە دەيىن 12 گەكتارداعى بىقسۋ ءسوندىرىلدى. ەلدى مەكەندەرگە ءتونىپ تۇرعان قاۋىپ جوق. كاسپي تەڭىزىنىڭ جاعالاۋىنا تاياۋ ماڭداعى ءورتتى ءسوندىرۋ ءۇشىن وبلىستىق توتەنشە جاعدايلار دەپارتامەنتىنىڭ كۇشتەرى مەن قۇرالدارى جىبەرىلدى», دەپ مالىمدەدى دەپارتامەنتتىڭ يميدجدىك جۇمىس جانە سىرتقى كوممۋنيكاتسيالار توبىنان.