2026–2027 وقۋ جىلىندا ەنگىزىلەتىن مەكتەپ وقۋلىقتارىنىڭ جوبالارى ءبىلىم بەرۋ مازمۇنىن ساراپتاۋ ورتالىعىنىڭ سايتىندا قوعامدىق تالقىلاۋعا ۇسىنىلدى, دەپ جازادى Egemen.kz.
وقۋلىقتاردى تالقىلاۋ «وقۋ ادەبيەتتەرىن قوعامدىق تالقىلاۋ» بولىمىندە جۇرگىزىلەدى.
4-سىنىپتارعا ارنالعان «قازاق ءتىلى», «ورىس ءتىلى» (قازاق تىلىندە وقىتاتىن مەكتەپتەر ءۇشىن), «ماتەماتيكا» (قازاق جانە ورىس تىلدەرىندە وقىتاتىن مەكتەپتەر ءۇشىن), «دۇنيەتانۋ», «ادەبيەتتىك وقۋ» مەن 7–10 سىنىپتارعا ارنالعان «دۇنيەجۇزى تاريحى», «الگەبرا», «قازاق ءتىلى», «حيميا», «بيولوگيا», «فيزيكا», «گەوگرافيا», «قۇقىق نەگىزدەرى», «شەتەل تىلدەرى» (اعىلشىن, نەمىس, فرانتسۋز تىلدەرى) وقۋلىقتارى تالدانادى.
ونلاين فورماتتا وتەتىن تالقىلاۋعا پەداگوگتەر, عالىمدار, ادىسكەرلەر جانە مەكتەپ وقۋلىقتارىنىڭ ساپاسىنا بەي-جاي قارامايتىن قازاقستاندىقتار قاتىسا الادى.
«قولدانىستاعى زاڭناماعا سايكەس وقۋلىقتار بەس ساتىلى ساراپتامادان وتەدى: عىلىمي-پەداگوگيكالىق ساراپتاما, پىسىقتاۋ كەزەڭى, پيلوتتىق مەكتەپتەردە اپروباتسيا, قوعامدىق تالقىلاۋ جانە پاندىك ساراپتامالىق كوميسسيانىڭ قورىتىندىسى. قازىر بۇل وقۋلىقتار قوعامدىق تالقىلاۋمەن قاتار, ەلىمىزدىڭ بىرنەشە وڭىرىندە 34 پيلوتتىق مەكتەپتە سىناقتان ءوتىپ جاتىر. پاندىك ساراپتامالىق كوميسسيانىڭ شەشىمىمەن بارلىق كەزەڭنەن وتكەن وقۋلىقتار مەكتەپتەردە قولدانۋعا جانە قازاقستان رەسپۋبليكاسىنىڭ وقۋ-اعارتۋ مينيسترلىگى بەكىتەتىن وقۋلىقتار تىزبەسىنە ەنگىزۋگە ۇسىنىلادى», دەلىنگەن وقۋ-اعارتۋ مينيسترلىگىنىڭ حابارلاماسىندا.