بۇگىن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ ەلىمىزدىڭ ۇستازدارىن كاسىبي مەرەكەلەرى – مۇعالىمدەر كۇنىمەن قۇتتىقتادى. مەملەكەت باسشىسى بۇل مەرەكەنىڭ ەلىمىزدە ەرەكشە مانگە يە ەكەنىن اتاپ ءوتىپ, ۇستازدارعا دەگەن زور قۇرمەت پەن العىسىن ءبىلدىردى, دەپ جازادى Egemen.kz.
سالتاناتتى جيىن بارىسىندا پرەزيدەنت ءبىلىم بەرۋ سالاسىنا سۇبەلى ۇلەس قوسقان بىرقاتار پەداگوگتى مەملەكەتتىك ناگرادالارمەن ماراپاتتادى. ولاردىڭ قاتارىندا سەمەي قالاسىنداعى گەولوگيالىق بارلاۋ كوللەدجىنىڭ اعىلشىن ءتىلى ءپانىنىڭ وقىتۋشىسى وماربەكوۆا ايگۇل تولەۋتايقىزى دا بار. ول «ەرەن ەڭبەگى ءۇشىن» مەدالىمەن ماراپاتتالىپ, بۇل ماراپاتتى مەملەكەت باسشىسىنىڭ قولىنان العانىن ايتتى.
ايگۇل وماربەكوۆا ءوز سوزىندە بۇل ماراپاتتى ۇلكەن قۇرمەت رەتىندە قابىلدايتىنىن ايتىپ, ەلىمىزدە ءبىلىم بەرۋ سالاسىنا, اسىرەسە سوڭعى بەس جىلدا ەرەكشە كوڭىل ءبولىنىپ كەلە جاتقانىن اتاپ ءوتتى. ول پەداگوگ مارتەبەسى تۋرالى زاڭ قابىلدانعانىن, تەحنيكالىق جانە كاسىپتىك ءبىلىم بەرۋ سالاسىنا قولداۋ ارتىپ كەلە جاتقانىن تىلگە تيەك ەتتى.
«بيىل جۇمىسشى ماماندىقتار جىلى بولىپ جاريالاندى. ءبىز تەحنيكالىق جانە كاسىپتىك ءبىلىم بەرۋ جۇيەسىنىڭ ماماندارى رەتىندە گەولوگيالىق بارلاۋ سالاسىنا قاجەت مامانداردى دايارلايمىز. بۇگىندە كوللەدجىمىزدە گەولوگتار مەن گەوفيزيكتەردى اعىلشىن تىلىندە وقىتاتىن توپتار اشىلدى», دەدى ۇستاز.
ايتا كەتۋ كەرەك, ءبىلىم بەرۋ سالاسىنا ۇكىمەت تاراپىنان دا, وقۋ-اعارتۋ مينيسترلىگى مەن جەرگىلىكتى ءبىلىم باسقارمالارى تاراپىنان دا ۇلكەن قولداۋ كورسەتىلىپ كەلەدى. ءبىز جۇمىس ىستەپ جاتقان بارلىق ءبىلىم بەرۋ باعدارلامالارى كوللەدجدىڭ ماتەريالدىق-تەحنيكالىق بازاسىن نىعايتۋعا, سونداي-اق باسەكەگە قابىلەتتى ماماندار دايارلاۋعا باعىتتالعان.
«سالامىزداعى باستى باسىمدىقتاردىڭ ءبىرى — كوللەدجىمىزدە گەولوگتار مەن گەوفيزيكتەردى اعىلشىن تىلىندە وقىتاتىن توپتاردىڭ اشىلۋى. قازىرگى تاڭدا بۇل — ەڭبەك نارىعىندا وتە وزەكتى باعىت. سەبەبى قازىرگى زامان ماماندارى تەك اعىلشىن ءتىلىن جاقسى مەڭگەرىپ قانا قويماي, شەتەلدىك ارىپتەستەرمەن ەركىن تىلدەسە الۋى قاجەت. بۇل ءوز كەزەگىندە ءبىزدىڭ تۇلەكتەرگە اعىلشىن ءتىلىن ۇيرەنە وتىرىپ, حالىقارالىق ءبىلىم كەڭىستىگىنە ەنۋگە جانە شەتەلدىك جۇمىس كۇشىن الماستىرا الاتىن مامان رەتىندە قالىپتاسۋعا مۇمكىندىك بەرەدى», دەدى ايگۇل تولەۋتايقىزى.