مەملەكەت باسشىسى قاسىم-جومارت توقاەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى جولداۋىندا وڭىرلەرگە ينۆەستيتسيا تارتۋ جانە وڭدەۋ ونەركاسىبىن دامىتۋدىڭ ماڭىزىنا ايرىقشا توقتالعانى بەلگىلى. پرەزيدەنت جۇكتەگەن مىندەتتى جۇزەگە اسىرۋ ماقساتىندا جامبىل وبلىسىندا ەكى بىردەي زاۋىت سالىنباق.
بايزاق اۋدانىندا ۋاقىت سۇرانىسىنا ساي جاڭا قانت زاۋىتىنىڭ قۇرىلىسى باستالدى. جامبىلدىق شارۋالار ءۇشىن جاعىمدى جاڭالىققا اينالعان جوبانى قىتايلىق «Zhongkai Guoyuan Industrial Investment Co.» كومپانياسى قولعا الىپ وتىر. ال «Oushangyuan Process & Equipment Intelligent Co.» كومپانياسى اۋقىمدى جوبانىڭ تەحنولوگيالىق سەرىكتەسى رەتىندە ىسكە كىرىستى. جاڭادان بوي كوتەرەتىن زاۋىتتىڭ الەۋەتىنە نازار اۋدارعان اۋىل شارۋاشىلىعى ءمينيسترى ايداربەك ساپاروۆ پەن ءوڭىر باسشىسى ەربول قاراشوكەەۆ ىلكىمدى جوبانىڭ ءوڭىر ەكونوميكاسىن ىلگەرىلەتۋگە قوسار ۇلەسى زور ەكەنىنە سەنىمدى.
رەسمي دەرەككە جۇگىنسەك, اۋقىمدى جوبانى جۇزەگە اسىرۋ ءۇشىن شامامەن 200 ملن دوللار كولەمىندە ينۆەستيتسيا تارتىلعان. الداعى ۋاقىتتا كاسىپورىندا 350-دەن استام جاڭا جۇمىس ورنى اشىلماق. جاڭا زاۋىتتا جىلىنا 1 ملن توننا قانت قىزىلشاسى وڭدەلىپ, 120 مىڭ توننا قانت, مەلاسسا مەن جوم سەكىلدى قوسالقى ونىمدەر وندىرۋگە مۇمكىندىك تۋادى. ينۆەستورلاردىڭ ايتۋىنشا, جوبا تولىققاندى جۇزەگە اسقان كەزدە بارلىق ءوڭىر قانتپەن قامتىلىپ, يمپورتقا دەگەن تاۋەلدىلىك ايتارلىقتاي ازايادى. «Zhongkai Kazakhstan International Sugar Industry Company» كومپانياسىنىڭ باس ديرەكتورى سياو انباونىڭ سوزىنە سەنسەك, وڭىردە وڭدەۋ ونەركاسىبىن دامىتۋعا بارلىق مۇمكىندىك قاراستىرىلعان. ەڭ باستىسى, جەرگىلىكتى اتقارۋشى بيلىك وكىلدەرى شەتەلدىك ينۆەستورلارمەن بىرلەسە جۇمىس اتقارۋعا بارىنشا ىنتالى بولىپ وتىر. ءوڭىر بيلىگىنىڭ قولداۋى ينۆەستورلاردىڭ ءىرى جوبالاردى الاڭسىز جۇزەگە اسىرۋىنا مۇمكىندىك تۋعىزادى.
جاڭادان بوي كوتەرەتىن قانت زاۋىتى وڭىردە اگروونەركاسىپتىك كەشەندى دامىتۋعا سەرپىن بەرىپ قانا قويماي, قانت قىزىلشاسى ءوندىرىسىن جاڭا دەڭگەيگە كوتەرەدى. ال جامبىلدىق شارۋالار كاسىپورىندى شيكىزاتپەن قامتۋعا تولىقتاي دايىن ەكەنىن ايتادى. قانت زاۋىتىنان بولەك, تاراز قالاسىنىڭ يندۋستريالىق ايماعى الاڭىندا اۋىل شارۋاشىلىعى تەحنيكاسىن شىعارۋعا ماماندانعان كاسىپورىن قۇرىلىسى باستالدى. ىرگەلى جوبانى ىسكە اسىرۋعا «Kaz FM World agriculture machinery» جشس (Nuode Network Technology Co., Ltd, قىتاي) بەكىنىپ وتىر. جاۋاپتى تۇلعالاردىڭ ايتۋىنشا, ءوندىرىس الاڭى بەس گەكتار اۋماققا دەيىن سوزىلىپ جاتىر. جاڭا زاۋىتتا تراكتوردىڭ بىرنەشە ءتۇرى جانە تىركەمە جابدىقتارىن شىعارۋ كوزدەلگەن. ىرگەلى جوبانى جۇزەگە اسىرۋ ءۇشىن 10 ملرد تەڭگە كولەمىندە ينۆەستيتسيا تارتىلعان. زاۋىت تولىق قۋاتىندا جۇمىس ىستەگەن كەزدە جىلىنا 2 000 بىرلىك تەحنيكا شىعارۋعا مۇمكىندىك تۋماق. 55 جاڭا جۇمىس ورنى اشىلادى.
«وتاندىق برەندپەن تەحنيكا شىعارۋدىڭ ماڭىزى زور. بۇل قادام اگرارلىق سەكتور ءۇشىن ايرىقشا مانگە يە. وزىمىزدە وندىرىلەتىن تەحنيكانىڭ شارۋالار ءۇشىن قولجەتىمدى بولاتىنى ءسوزسىز. ولار زاماناۋي قۇرال-جابدىقتان تارىقپايدى. جاڭا كاسىپورىن اۋىل شارۋاشىلىعىنداعى باسەكەلەستىكتى ارتتىرادى. سونداي-اق ءوڭىردىڭ وندىرىستىك الەۋەتىن ۇستەمەلەۋگە مۇمكىندىك تۋعىزادى», دەيدى ءوڭىر باسشىسى ەربول قاراشوكەەۆ.
جالپى, وڭىرگە ينۆەستيتسيا تارتۋ جۇمىسى سوڭعى ۋاقىتتا قارقىن الدى. وسى جىلدىڭ سەگىز ايىنداعى كورسەتكىشكە كوز جۇگىرتسەك, وبلىستىڭ نەگىزگى كاپيتالىنا 391,7 ملرد تەڭگە كولەمىندى ينۆەستيتسيا تارتىلعان. بۇل كورسەتكىش وتكەن جىلدىڭ العاشقى سەگىز ايىمەن سالىستىرعاندا, 32,4%-عا جوعارى. الداعى ەكى-ءۇش جىلدىڭ بەدەرىندە وڭىردە جالپى قۇنى 300 ملرد تەڭگەدەن اساتىن 20 اۋىل شارۋاشىلىعى جوباسىن جۇزەگە اسىرۋ كوزدەلگەن. بۇل جوبالار تولىققاندى ىسكە اسقان كەزدە وبلىستىڭ ەكسپورتتىق الەۋەتى ايتارلىقتاي ارتادى.
جامبىل وبلىسى