سۇيىتىلعان گاز جەتكىلىكتى

سونداي-اق قازىرگى تاڭدا سۇيىتىلعان مۇناي گازىن ساتۋ قىزمەتى باسەكەلەستىك ورتاعا بەرىلگەنىن ەسكەرسەك, وبلىستا گاز قوندىرعىسىمەن جابدىقتالعان كولىكتەردىڭ سانى 31 مىڭ 326-عا ارتقان. ودان بولەك, بۇگىنگى جاعدايدا وبلىس تۇرعىندارى ءۇشىن سۇيىتىلعان مۇناي گازىنا دەگەن قاجەتتىلىك 9-10 مىڭ توننانى قۇراعان.

بۇل تۋرالى وبلىس اكىمدىگىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقاراماسىنىڭ باسشىسى عالىم يساقوۆ حابارلادى.

باسقارما باسشىسىنىڭ سوزىنە سۇيەنسەك, ەنەرگەتيكا مينيسترلىگى تاراپىنان توقسان سايىن الەۋمەتتىك سۇيىتىلعان مۇناي گازى ءبولىنىپ وتىرادى. ال بيىل قىركۇيەك ايىنا وبلىسقا 5 مىڭ 330 توننا سۇيىتىلعان مۇناي گازى بولىنسە, ونىڭ ىشىندە «پەترو قازاقستان ويل پروداكتس» جاۋاپكەرشىلىگى شەكتەۋلى سەرىكتەستىگى زاۋىتىنان 3 مىڭ 755 توننا, «سنپس-اقتوبەمۇنايگاز» اكتسيونەرلىك قوعامىنان 1 مىڭ 575 توننا جىبەرىلگەن.

وسى جىلى ايماققا 75 مىڭ 661 توننا گاز ءبولىنىپ, كاسىپكەرلەر تاراپىنان, ياعني 31 گاز جەلىسى ۇيىمىمەن كوممەرتسيالىق سۇيىتىلعان مۇناي گازى ساتىپ الىنۋدا.

– قازىرگى تاڭدا وبلىستا 39 ۆاگون-تسيستەرنادا 1 مىڭ 404 توننا سۇيىتىلعان مۇناي گازى تەمىرجولمەن جونەلتىلدى. بۇل ۆاگوندار جاقىن ۋاقىتتا دىتتەگەن جەرگە جەتىپ, جانارجاعارماي قۇيۋ ستانتسيالارىنا تولىققاندى بولىنەدى. بۇگىندە وڭىردە 360 توننا سۇيىتىلعان مۇناي گازىنىڭ قورى بار. ودان بولەك, ەنەرگەتيكا ءمينيسترىنىڭ بۇيرىعىنا سايكەس ءبىرىنشى تامىزدان باستاپ تاراز قالاسى جانە وعان جاقىن اۋداندارداعى اۆتوگاز تولتىرۋ بەكەتتەرىندە گازدىڭ باعاسى ءبىر ليتر ءۇشىن 102 تەڭگە, الشاق ورنالاسقان, ياعني 200 شاقىرىمنان اساتىن بەكەتتەردە 107 تەڭگەنى قۇرادى, – دەيدى عالىم يساباي ۇلى.

سونىمەن بىرگە باسقارما باسشىسى قازىرگى ۋاقىتتا وبلىستاعى بارلىق اۆتوگاز قۇيۋ بەكەتتەرىندە گاز ەركىن ساتىلىمدا ەكەنىن, تاپشىلىق جانە كەزەك كۇتۋدىڭ بايقالمايتىنىن جەتكىزدى.

جامبىل وبلىسى