قازاقستاننىڭ ءبىرىنشى, الەمنىڭ 10-راكەتكاسى ەلەنا رىباكينا بەيجىڭ (قىتاي) WTA 1000 ءتۋرنيرىنىڭ ءتورتىنشى اينالىمىنا شىعا المادى, دەپ حابارلايدى Egemen.kz.
جارىستىڭ 8-راكەتكاسى بولىپ تىركەلگەن قازاقستاندىق تەننيسشى ءۇشىنشى اينالىمدا الەمدىك رەيتينگىدە 66-ورىندا تۇرعان گەرمانيالىق ەۆا ليسپەن شەبەرلىك بايقاستى.
ءبىرىنشى پارتيادا گەرمانيالىق سپورتشى 3:1 ەسەبىمەن العا كەتكەنىمەن, رىباكينا تارازى باسىن تەڭەستىردى – 3:3. الايدا بۇدان كەيىن ليس قاتارىنان ءۇش گەيمدى الدى.
ەكىنشى سەتتە ەلەنا ايقىن باسىمدىلىق كورسەتتى – 6:1.
ءۇشىنشى, شەشۋشى سەتتە ليس تاعى دا 2:0 ەسەبىمەن العا شىققانىمەن, قازاقستاندىق تەننيسشى الىسقا ۇزاتپادى - 2:2. ەسەپ 3:3 بولعاندا, رىباكينا برەيك جاساعانىمەن, سول بويدا ءوز گەيمىن بەرىپ قويدى – 4:4. سودان كەيىن ليس ءۇشىنشى ماتچبولىن ءمۇلت جىبەرگەن جوق – 6:4.
ەكى ساعات 14 مينۋتقا سوزىلعان باسەكەدە رىباكينا 8 ەيسپەن بىرگە 9 برەيك-پوينتتىڭ جەتەۋىن پايدالاندى. ليس 1 ەيس, 7 برەيكپەن (20 برەيك-پوينت) كوزگە ءتۇستى.