ۇلىتاۋ وبلىسىندا پرەزيدەنت قاسىم-جومارت توقاەۆتىڭ تاپسىرماسىمەن دەنساۋلىق ساقتاۋ سالاسىن دامىتۋعا ەرەكشە كوڭىل ءبولىنىپ وتىر. وڭىردە تۇرعىنداردىڭ ءومىر ساپاسىن ارتتىرۋعا باعىتتالعان بىرقاتار الەۋمەتتىك جوبا جۇزەگە اسادى, دەپ حابارلايدى Egemen.kz.
مەملەكەت باسشىسىنىڭ تاپسىرماسىنا سايكەس, زاڭسىز الىنعان اكتيۆتەردى مەملەكەتكە قايتارۋ ەسەبىنەن ارناۋلى مەملەكەتتىك قوردان 880 ميلليون تەڭگە ءبولىنىپ, بۇل قاراجات «اۋىلدىق جەرلەردە دەنساۋلىق ساقتاۋدى جاڭعىرتۋ» ۇلتتىق جوباسى اياسىندا جاڭا نىساندار سالۋعا باعىتتالعان.
اتالعان قارجىعا ۇلىتاۋ مەن جاڭاارقا اۋداندارىندا 7 العاشقى مەديتسينالىق-سانيتاريالىق كومەك كورسەتۋ مەكەمەسىنىڭ قۇرىلىسى جۇرگىزىلەدى. اتاپ ايتقاندا, اقتۇبەك پەن كەڭگىر اۋىلدارىندا دارىگەرلىك امبۋلاتوريالار بوي كوتەردى. بۇدان بولەك, بەتبۇلاق, پيونەر, قورعاسىن, اينابۇلاق جانە ەگىندى ەلدى مەكەندەرىندە مەديتسينالىق پۋنكتتەر سالىنىپ جاتىر.
جوسپار بويىنشا بۇل نىساندار جىل سوڭىنا دەيىن پايدالانۋعا بەرىلەدى. جاڭا مەديتسينالىق ورتالىقتار اۋىل تۇرعىندارىنىڭ دەنساۋلىق ساقتاۋ قىزمەتىنە قولجەتىمدىلىگىن ارتتىرىپ, وبلىستىڭ جالپى مەديتسينا سالاسىن دامىتۋعا سەرپىن بەرمەك.