قىزىلجار ءوڭىرىنىڭ ديقاندارى بيىلعى وراقتا تاماشا ناتيجەگە جەتىپ وتىر. كەيبىر وزىق شارۋاشىلىقتار ارپانى گەكتارىنان 40,5, بيدايدى 41,5 تسەنتنەردەن العان. ماسەلەن, جىلىنا 10 مىڭ گەكتار جەرگە ەگىن سالاتىن «نوۆوميحايلوۆسكي-2003» جشس باسشىلىعىنىڭ ايتۋىنشا, مۇنداي جەتىستىككە بارلىق اگروتەحنيكالىق شارانى ءجىتى اتقارعاندىقتان جەتكەن.
«قازىر بارلىق القاپتىڭ 50 پايىزىنا جۋىعىن باستىرىپ بولدىق. وراقتى 4 تامىزدا باستاعان ەدىك. الدىمەن بۇرشاق پەن جاسىمىقتى جيناپ الدىق. بۇلار قازىر ۇلكەن سۇرانىسقا يە, باعالارى دا جاقسى. بىلتىر ارپانىڭ ونىمدىلىگى گەكتارىنا 30 تسەنتنەر بولعان, بيىل مىنە, 40,5 تسەنتنەرگە جەتتى. بيداي دا بىلتىرعىدان 4 تسەنتنەرگە جوعارى. مينەرالدى تىڭايتقىشتاردى ۋاقىتىندا جەتكىزىپ, جاز كۇندەرى جاسالاتىن اگروتەحنيكالىق شارالاردى دا مەزگىلىندە ورىندادىق. ونىڭ ۇستىنە, ۇكىمەتتىڭ بەرگەن كومەگىنىڭ ارقاسىندا جاپپاي وزىق تەحنيكالارعا قولجەتكىزدىك. مىسالى, بيىل جاساندى ينتەللەكت جۇيەسى ورناتىلعان ەكى كومباين ساتىپ الدىق. ساپاسى وتە جاقسى, كابينالارىنىڭ جايلىلىعى دا كەرەمەت», دەيدى شارۋاشىلىق باسشىسى ۆياچەسلاۆ ششەگولەۆ.
ونىڭ سوزىنشە, مينيسترلىك كوكتەمگى دالا مەن كۇزگى وراق جۇمىسىنا ەداۋىر ارزانداتىلعان ديزەل وتىن بەرىپتى. ونىڭ دا كومەگى وراسان. «كەڭ دالا-2» ارقىلى قارجىلاندىرۋ 2,5 ەسە ارتىپ, 104,4 ملرد تەڭگەگە جەتكەن. 37 ملرد تەڭگەسى «سولتۇستىك» اكك» اق ارقىلى بەرىلسە, قالعانىن «قازاگروقارجى» اق ءبولىپتى. وبلىستىق اۋىل شارۋاشىلىعى باسقارماسى بيىل ورتاشا گەكتار ءتۇسىمى 16,5 تسەنتنەردەن اينالادى دەپ بولجايدى.
بۇگىنگە دەيىن وبلىس كولەمىندە 1 ملن 100 مىڭ گەكتارداي جەردىڭ استىعى الىندى.
سولتۇستىك قازاقستان وبلىسى