«Amanat» پارتياسىنىڭ اقمولا وبلىستىق فيليالىندا جول كارتاسىنىڭ ورىندالماي قالۋ قاۋپىنە بايلانىستى دەپۋتاتتىق فراكتسيانىڭ وتىرىسى ءوتتى, دەپ حابارلايدى Egemen.kz.
وتىرىس بارىسىندا اقمولا وبلىسى اكىمىنىڭ ورىنباسارى ەرنار جاركەشوۆ «Amanat» پارتياسىنىڭ «حالىقپەن بىرگە!» 2023-2027 جىلدارعا ارنالعان سايلاۋالدى باعدارلاماسىن ىسكە اسىرۋ جونىندەگى جول كارتاسىنىڭ ورىندالۋى جايلى باياندادى. جول كارتاسى بىرنەشە باعىت بويىنشا جۇزەگە اسىرىلىپ جاتىر.
–وبلىستا جۇيەلى جۇمىس اتقارىلىپ جاتىر, – دەيدى وبلىس اكىمىنىڭ ورىنباسارى ەرنار جاركەشوۆ, –استانا اگلومەراتسياعا كىرەتىن يندۋستريالىق ايماق ارشالى اۋدانىندا جۇمىس ىستەپ باستادىق. وعان ءبىز شەتەلدىك جانە قازاقستاندىق ينۆەستورلاردىڭ ىشىنەن 1 تريلليون 100 ميلليارد تەڭگەگە جۋىق ينۆەستيتسيالىق جوبالاردى تارتىپ, ورنىقتىرىپ جاتىرمىز. ول جەرگە ءبىز ءبىراز ەلەكتر قۋاتىن, سۋ قۇبىرلارىن تارتىپ, دايىنداپ قويدىق. ەندى قۇرىلىستار بىرتە-بىرتە باستالىپ جاتىر. ودان باسقا «كوكشەينۆەستور» دەگەن يندۋستريالىق ايماقتى اشتىق. ونىڭ ەڭ باستى ماقساتى ءبىزدىڭ كوكشەتاۋدىڭ الەۋەتىن جالپى گەوگرافيالىق جاعىنان قانداي ۇتىمدى جاعدايلار بار سونى ەسكەرە وتىرىپ, ترانسپورتتىق-لوگيستيكالىق حاب رەتىندە تەرەڭ وڭدەۋگە بايلانىستى جوبالاردى اشتىق.
تسەلينوگراد جانە ارشالى اۋداندارى ەلورداعا جاقىن بولعاندىقتان بۇل وڭىرلەردىڭ دامۋىنا ەرەكشە ەكپىن بەرىلىپ وتىر. الايدا, شالعايدا جاتقان ەلدىمەكەن تۇرعىندارىنىڭ جاعدايى ءماز ەمەس. ماسەلەن, ەرەيمەنتاۋ اۋدانىنىڭ حالقى ۇزاق جىل ساپالى اۋىز سۋعا جارىماي كەلەدى. وعان قوسا, جولدىڭ جاي-كۇيى دە الاڭداتىپ وتىر. سول سەبەپتى اۋىل تۇرعىندارىنىڭ ەلدىمەكەننەن جاپپاي كوشۋ تەندەنتسياسى بايقالادى. جيىن بارىسىندا وبلىستىق ءماسليحاتتىڭ دەپۋتاتى بەكىم اكىموۆ ءوڭىر تۇرعىندارىن تولعاندىرىپ جۇرگەن ماسەلەنى كوپشىلىك تالقىسىنا سالدى.
–اۋىل حالقىنىڭ ۇدەرە كوشىپ جاتقاندىعى شىندىق. ەرتەڭ اۋىل شارۋاشىلىعىمەن اينالىساتىن قوجالىقتاردا جۇمىسشى قالمايدى, – دەدى وبلىستىق ءماسليحاتتىڭ دەپۋتاتى بەكىم اكىموۆ, – الدىمەن اۋىلعا جاعداي جاسالۋ كەرەك.
«جايلى مەكتەپ» باعدارلاماسى اياسىندا بوي كوتەرگەن ءبىلىم وشاقتارى دا جيىن بارىسىندا تالقىلاندى. كەلەر جىلى مەكتەپتەر ءۇش اۋىسىمدى ءبىلىم بەرۋ جۇيەسىنە قايتادان ورالۋى مۇمكىن. سەبەبى, شالعايداعى ءبىلىم وردالارىنىڭ جاعدايى مۇشكىل.
اقمولا وبلىسى