2025 جىلدىڭ العاشقى جارتىسىندا الماتىداعى تۋريستىك ينفراقۇرىلىمعا سالىنعان ينۆەستيتسيا كولەمى 92,2 ملرد تەڭگەگە جەتتى. بۇل وتكەن جىلمەن سالىستىرعاندا 62%-عا ارتىق. اتالعان سالاداعى تىڭ جاڭالىقتار تۋرالى قالانىڭ تۋريزم باسقارماسى حابارلادى.
قاراجات جاڭا قوناق ءۇي نىساندارىن سالۋعا, قولدانىستاعى ينفراقۇرىلىمدى جاڭعىرتۋعا جانە قىزمەت كورسەتۋ ساپاسىن ارتتىرۋعا باعىتتالعان.
وسى كەزەڭدە تۋريزمنەن تۇسكەن سالىق ءتۇسىمى 46,9 ملرد تەڭگەنى قۇراعان. ونىڭ ىشىندە قوعامدىق تاماقتانۋ سالاسى – 21,2 ملرد تەڭگە (45,2%), سپورت جانە دەمالىستى ۇيىمداستىرۋ – 8 ملرد تەڭگە (17%), ۋاقىتشا ورنالاستىرۋ قىزمەتىنەن 4,6 ملرد تەڭگە (9,8%) تۇسكەن.
«ينۆەستيتسيا مەن سالىق ءتۇسىمىنىڭ ءوسۋى الماتىداعى تۋريزم سالاسىنىڭ قالانىڭ ەكونوميكاسىنداعى نەگىزگى قوزعاۋشى كۇشتەردىڭ بىرىنە اينالىپ كەلە جاتقانىن كورسەتەدى. بۇل قاراجات ينفراقۇرىلىمدى دامىتۋعا, سەرۆيستى جاقسارتۋعا جانە زاماناۋي ساپا ستاندارتتارىن قالىپتاستىرۋعا مۇمكىندىك بەرەدى», – دەپ اتاپ ءوتتى تۋريزم باسقارماسىنداعىلار.
ءتۋريزمدى دامىتۋ قوناقتاردىڭ الماتىعا دەگەن قىزىعۋشىلىعىنىڭ ارتۋىن عانا ەمەس, سونداي-اق قالانىڭ جۇيەلى جۇمىسىن دا جانداندىرۋعا ءتيىس. الماتى وبلىسى اۋماعىندا تۋريستىك ورىندار كوپ بولعانىمەن, ولارداعى قىزمەت كورسەتۋ ساپاسىنىڭ اقساپ تۇرعانى تالاي مارتە سىن ساداعىنا ىلىنگەن ەدى. ماماندار كەيىنگى جىلداردىڭ بەدەرىندە بۇل ولقىلىقتار رەتتەلە باستاعانىن ايتادى.