شىعىس قازاقستان وبلىسى, كۇرشىم اۋدانى, مارالدى اۋىلىندا بەلگىسىز سەبەپتەن ءىرى قارا مال ولە باستاعان. تۇرعىنداردىڭ ايتۋىنشا, ولاردىڭ بارلىعى التىن فابريكاسىنىڭ ماڭىندا جايىلعان, دەپ حابارلايدى Egemen.kz.
مارالدىداعى التىن ءوندىرۋ فابريكاسىنا قاتىستى ماسەلەگە تۇرعىندار بۇعان دەيىن دە سان مارتە نارازىلىق تۋدىرعان.
ءىرى قارا مالدىڭ ءولىپ جاتقان بەينەجازباسى جۋىقتا الەۋمەتتىك جەلىدە تاراي باستادى.
«19 قىركۇيەك كۇنى تسيانيدپەن التىن ءوندىرىپ جاتقان زاۋىت ماڭىندا اۋىلىمىزدىڭ مالى قىرىلدى. قازىر 7-8 باس ءولىپ جاتىر, بۇل العاشقى جاعداي ەمەس. وسىلاي جالعاسا بەرسە ادام ءولىمى بولا ما دەپ قورقامىز» دەدى الەۋمەتتىك جەلىدە بەينەۇندەۋ جولداعان تۇرعىندار.
كۇرشىم اۋدانىنىڭ اكىمى مەيىرجان الىبەكوۆ وسى جاعدايعا بايلانىستى سانيتاريالىق-ەپيدەميولوگيالىق قىزمەت جانە ۆەتەريناريا سالاسىنىڭ ماماندارىمەن بىرلەسكەن ارنايى كوميسسيا قۇرىلىپ, تەكسەرۋ جۇرگىزىپ جاتقانىن ايتتى.
بەلگىلى بولعانداي, وقيعا ورنىنا بارىپ, ولگەن مالدان سىناما الىندى. جەتى كۇننىڭ ىشىندە قورىتىندى شىعادى. سوندا عانا ناقتى اقپارات بەرىلەدى. مالدىڭ فابريكا ماڭىندا جايىلعانى تۋرالى اقپارات تا انىقتالادى. 20 قىركۇيەك كۇنى قوسىمشا تەكسەرۋ جۇرگىزىلىپ, باسقا مالدان دا وسىنداي جاعدايدىڭ تىركەلگەن-تىركەلمەگەنى انىقتالدى.
شىعىس قازاقستان وبلىسى,
كۇرشىم اۋدانى