ەل ىشىندە قازاقستان وزبەكستانعا جانارماي ساتىپ جاتىر دەگەن اقپارات تاراعان ەدى. تاياۋدا ەنەرگەتيكا مينيسترلىگى مالىمدەمە جاساپ, بۇل دەرەكتى نەگىزسىز دەپ تاپتى, دەپ جازادى Egemen.kz.
«قازىر قازاقستاننان وزبەكستانعا نەمەسە وزگە ەلدەرگە جانارماي ەكسپورتى جۇزەگە اسىرىلمايدى. ەلدە مۇناي ونىمدەرىن سىرتقى شىعارۋعا تىيىم سالىنعان. ۇكىمەت زاڭسىز ساۋدا مەن كونتراباندامەن كۇرەس جوسپارىن ىسكە اسىرىپ جاتىر», دەپ مالىمدەدى مينيسترلىك.
مەكەمە مالىمەتىنشە, اقپارات قۇرالدارىنىڭ ءبىرى بيىل كوكتەمدەگى ءبىر جولعى ۋاقىتشا شارا تۋرالى جازعان.
ۇكىمەت ماۋسىم ايىنان باستاپ بەنزين ەكسپورتىن تولىق توقتاتتى.
مينيسترلىك مۇنداي شارا ىشكى نارىقتى تۇراقتاندىرۋعا, جانارماي قورىن ايتارلىقتاي ۇلعايتۋعا مۇمكىندىك بەرگەنىن اتاپ وتەدى.
«جازدىڭ باسىنا قاراي اي-92 بەنزينى قورى شامامەن 70%-عا, ديزەل وتىنى قورى 78%-عا ارتتى. قازىرگى تاڭدا مۇناي ونىمدەرى نارىعىنداعى جاعداي تۇراقتى. ىشكى نارىق تولىق كولەمدە قامتاماسىز ەتىلىپ جاتىر», دەپ حابارلايدى مينيسترلىك.