الماتىنىڭ الاتاۋ اۋدانىندا حالىقارالىق ستاندارتتارعا ساي زاماناۋي تەننيس ورتالىعى بوي كوتەردى. كەشەن ITF جانە ATF دەڭگەيىندەگى رەسپۋبليكالىق جانە حالىقارالىق تۋرنير وتكىزۋگە قاۋقارلى, دەپ حابارلايدى Egemen.kz.
ورتالىق اۋماعىندا ءتورت جابىق قاتتى جابىندى كورت, ءتورت اشىق قاتتى جابىندى كورت, التى توپىراق جابىندى كورت ورنالاسقان. كورەرمەن ءۇشىن اشىق الاڭداردا 150 ورىندىق, عيمارات ىشىندە 100 ورىندىق تريبۋنا بار. جاڭا ورتالىقتىڭ جالپى اۋماعى 5 مىڭ شارشى مەتردەن اسادى.
كاسىبي سپورتشىلارمەن قاتار ءار جاستاعى اۋەسقويلارعا ارنالعان ورتالىق حالىق تىعىز قونىستانعان اۋداندا ورنالاسقان. جاتتىعۋ ءۇشىن بىلىكتى جاتتىقتىرۋشىلار تارتىلىپ, تەننيسشىلەردى دايارلاۋعا جانە بۇقارالىق سپورتتى دامىتۋعا قولايلى جاعداي جاسالعان.
مۇندا الەۋمەتتىك از قامتىلعان وتباسىلاردىڭ بالالارى ءۇشىن كەمىندە ەكى توپ (ارقايسىسى 10 ادامنان) تەگىن ساباقتار ۇيىمداستىرىلماق. سونىمەن قاتار كوپبالالى وتباسىلار مەن زەينەتكەرلەر جەڭىلدىكپەن جاتتىعا الادى. ورتالىق تولىقتاي مۇمكىندىگى شەكتەۋلى ازاماتتارعا بەيىمدەلگەن.
كەشەندە مەديتسينالىق كابينەت, اسحانا, زاماناۋي TechnoGym جابدىقتارىمەن قامتىلعان جاتتىعۋ زالى, ءماجىلىس زالى بار. ورتالىق كۇنىنە كەمىندە 400 سپورتشىنى قابىلداي الادى. نىسان قۇرىلىسى قازاقستان تەننيس فەدەراتسياسىنىڭ قولداۋىمەن جۇزەگە اسقان. كەشەننىڭ رەسمي اشىلۋ سالتاناتى قالا كۇنىن مەرەكەلەۋ اياسىندا وتەدى.