استانادا 16–18 قىركۇيەك ارالىعىندا پانكراتيوننان Amateur MMA باعىتى بويىنشا قازاقستان چەمپيوناتى ءوتتى. بايراقتى باسەكەدە قر ءىىم ۇلتتىق ۇلانىنىڭ اسكەري قىزمەتشىسى, «BURKIT TEAM» كلۋبىنىڭ سپورتشىسى نۇرعالي نۇرعايپ ۇلى قارسىلاستارىنا دەس بەرمەي, چەمپيون اتاندى, دەپ حابارلايدى Egemen.kz.
نۇرعالي ەركىن كۇرەستەن حالىقارالىق دارەجەدەگى سپورت شەبەرى, سونداي-اق ۇلتتىق قۇراما ساپىندا ەل نامىسىن قورعاپ جۇرگەن مىقتىلاردىڭ ءبىرى. 2018–2022 جىلدار ارالىعىندا بىرنەشە رەت قازاقستان چەمپيوناتىندا جەڭىمپاز اتانىپ, 2019 جىلى پولشادا وتكەن حالىقارالىق تۋرنيردە كۇمىس جۇلدەگەر بولدى. سول جىلى الەم بىرىنشىلىگىندە بەسىنشى ورىنعا يە بولعان.
بۇدان بولەك, ول جەكپە-جەكتەن 2023 جىلى قازاقستان چەمپيونى, 2024 جىلى پانكراتيوننان ەل چەمپيونى اتانعان. «Nomad Wrestling II» تۋرنيرىندە قولا مەدال يەلەنىپ, جانكۇيەرلەرىن تاعى ءبىر مارتە قۋانتقان. قازىر نۇرعالي كاسىبي مما سپورتشىسى رەتىندە تانىمال. Sherdog مالىمەتىنە سايكەس, ونىڭ رەكوردى – ءۇش جەڭىس جانە ەكى جەڭىلىس.
ء«اربىر جەكپە-جەك – ەرىك-جىگەر مەن توزىمدىلىكتىڭ سىناعى. بۇل جەڭىس – جەكە ەڭبەگىمنىڭ عانا ەمەس, ۇستازدارىم مەن كوماندامنىڭ ورتاق جەمىسى. قازاقستان تۋىن بيىككە كوتەرۋ – مەن ءۇشىن ەڭ ۇلكەن مارتەبە», دەدى چەمپيون.
نۇرعالي نۇرعايپ ۇلىنىڭ جەڭىستەرى جاس سپورتشىلارعا ۇلگى بولىپ, ەل سپورتىنىڭ دامۋىنا جانە ۇلتتىق ۇلاننىڭ ابىرويىن ارتتىرۋعا ەلەۋلى ۇلەس قوسىپ كەلەدى.