الماتىدا ۇلتتىق كىتاپحانا جانە بالالار ادەبيەتى مەن ءبىلىم بەرۋ سالاسىندا جۇمىس ىستەيتىن «Nomad Culture Foundation» قورى بىرلەسىپ «الەم وقىرماندارىنا ارنالعان بالالار ادەبيەتى» تاقىرىبىندا ويتالقى وتكىزدى, دەپ حابارلايدى Egemen.kz.
بالالارعا ارنالعان ساۋاتتى كونتەنت جاساۋ, تارتىمدى شىعارمالار جازۋ ەلىمىزدە عانا ەمەس, الەمدىك دەڭگەيدە وزەكتى بولىپ وتىر. ۇيىمداستىرۋشىلاردىڭ ايتۋىنشا, بۇل ءىس-شاراعا Oxford University Press ( ۇلىبريتانيا) حالىقارالىق بيزنەستى دامىتۋ جونىندەگى اعا مەنەدجەرى دجۋزەپپە تراپاني, سونداي-اق Pickatale (نورۆەگيا) ءبىلىم بەرۋ كونتەنتى جانە باسپا ستراتەگياسى جونىندەگى ديرەكتورى ەميلي گيللە-ماررەتت سياقتى بىلىكتى مامانداردىڭ قاتىسۋى بالالارعا ارنالعان كىتاپتار مەن ءبىلىم بەرۋ تەحنولوگيالارى سالاسىنداعى بىرلەسكەن جوبالارعا جول اشىپ, تۇيتكىلدى ماسەلەلەردى شەشۋگە ىقپال ەتپەك.
بالالار جازۋشىلارى, باسپاگەرلەر مەن حالىقارالىق ساراپشىلاردىڭ باسى بىرىككەن جيىندا بالالار ادەبيەتى يندۋسترياسىندا 20 جىلدان استام تاجىريبەسى بار Oxford University Press بيزنەس دامىتۋ جونىندەگى اعا مەنەدجەرى دجۋزەپپە تراپاني, ءبىلىم بەرۋ باعدارلامالارى جونىندەگى ديرەكتور, نورۆەگيادان كەلگەن ەميلي گيللە-ماررەتت بالالار سۇرانىسىنا جاۋاپ بەرەتىن, ولاردىڭ قيالىن شىڭداپ, ويىن ورىستەتەتىن ادەبيەت شىعارۋ ىسىندەگى تاجىريبەسىمەن ءبولىستى.
كاسىبي ساراپشى ماماندار اتاپ وتكەندەي, بالالارعا ارنالعان ادەبيەت شىعارۋ كىتاپ باسىپ شىعارۋ ۇردىسىمەن عانا بايلانىستى ەمەس. ول بالالاردىڭ جاس ەرەكشەلىكتەرىن زەرتتەۋ, قاجەتتىلىكتەرىنە تالداۋ جاساۋ, تىپتەن مىنەز-ق ۇلىق ەرەكشەلىكتەرىن تانۋعا زەر سالاتىن الەۋمەتتىك, پسيحولوگيالىق ءارى تالعامدىق فاكتورلارمەن تىعىز بايلانىستى. مۇنىمەن قوسا جاس وقىرمانداردى كىتاپ وقۋعا قىزىقتىرۋدا ماتىنگە, ءتۇرلى-ءتۇستى بەزەندىرىلۋىنە دە زەر سالۋ اسا قاجەت.
بۇگىندە Oxford University Press (OUP) الەم بويىنشا بالالار كىتاپتارى مەن ءبىلىم بەرۋ مازمۇنىن باسپا جانە تسيفرلىق فورماتتا ناسيحاتتاپ وتىرعان الدىڭعى قاتارداعى باسپا. باسپانىڭ كوپتەگەن ماراپاتتارعا يە بولعان يلليۋستراتسيالىق كىتاپتارى, وقىرماندارعا ارنالعان سەريالارى جانە وكسفوردتىڭ ءبىلىم بەرۋ جوبالارى الەمنىڭ 60-تان استام تىلىنە اۋدارىلعان. كىتاپتار اۋديو مەن فيلمدەر فورماتىنا بەيىمدەلگەندىكتەن, بالالاردىڭ تىڭداۋىنا, كورۋىنە قولايلى ءارى تارتىمدى كەلەدى.
جيىندا ساراپشىلار ساندىق ءبىلىم بەرۋ ونىمدەرىن ازىرلەۋ, قىزىقتى وقيعالاردى وزىق تەحنولوگيالارمەن, باعالاۋ قۇرالدارىمەن جانە پەداگوگيكامەن بىرىكتىرۋدىڭ زاماناۋي ادىستەرى جانە EdTech نارىقتىڭ مۇمكىندىگى تۋرالى دا ايتىپ بەردى.
شارانىڭ ۇيىمداستىرۋشىسى «Nomad Culture Foundation» قورىنىڭ ديرەكتورى بايان قابىلاشتىڭ ايتۋىنشا, بالالار ادەبيەتىن شىعارۋ, ناسيحاتتاۋ ءىسى ەلىمىزدە كەنجەلەپ كەلەدى.
«بالالار شىعارمالارىن جازاتىن جازۋشىلار وتە از. بۇل شارادا الەمدىك تاجىريبەنى تىڭداي وتىرىپ, شەتەلدىك ساراپشىلارمەن وي ءبولىسۋ ماڭىزدى. بۇگىندە بالا تاربيەسىندە بالاعا كىتاپ وقىتۋدىڭ وتە ماڭىزدى ەكەنىن ەسكەرەر بولساق, دۇنيە ءجۇزىنىڭ كوپتەگەن ەلدەرىندە تاجىريبەسىمەن ءبولىسىپ جۇرگەن شەتەلدىك باسپاگەرلەر بۇل جولى الماتى, استانا قالاسىندا بالالار باسپا نارىعىنا قاجەت اقپاراتتارمەن ءبولىستى. بۇل الاڭدا ەلىمىزدىڭ باسپاگەرلەرى, جازۋشىلارى دا كەلىپ, تولعاندىرعان سۇراقتارىن قويىپ, پىكىرىمەن ءبولىسىپ جاتىر. بۇل الداعى ۋاقىتتا بالالارعا ارنالعان قىزىقتى ادەبيەتتەر نارىعىنىڭ دامۋىنا جول اشاتىنى انىق» دەيدى ب.قابىلاش.
كەزدەسۋدى Steppe & World باسپا ءۇيىنىڭ ديرەكتورى رايسا قادىر جۇرگىزدى. اينالاسى از عانا ۋاقىتتا بالالار ءۇشىن قازاق تىلىندە 100-دەن استام كىتاپ شىعارىپ ۇلگەرگەن باسپا ءۇيىنىڭ باسشىسى «كىتاپ وقۋ ارقىلى بالالاردىڭ سوزدىك قورى قالىپتاسىپ, سىني ويلاۋ قابىلەتى جاقسارادى. سوندىقتان بالالاردىڭ ءوز انا تىلىندەگى ادەبيەتتەرگە, وقۋلىقتارعا سۋسىنداپ وسۋىنە قولايلى جاعداي جاساۋ ءارى ءاربىر باسىلىمدى وتە قىزىقتى, ساۋاتتى ەتىپ شىعارۋعا باسپاگەرلەر باستى نازار اۋدارۋى قاجەت دەگەن» پىكىرىن ءبىلدىردى. بۇگىندە «اقىن قويان» مەن «گرۋفاللو», ء حارري پوتتەردى قازاقشالاعان باسپا ءۇيى الەمدىك ادەبيەتتىڭ جارقىن ۇلگىلەرىن قازاق تىلىنە اۋدارىپ, بالالارعا تارتۋ ەتىپ كەلەدى. وسى ءۇردىستى جالعاستىرۋدى ماقسات ەتىپ وتىرعان باسپاگەر وكىنىشكە وراي ەلىمىزدە مەكتەپ وقۋلىقتارىنىڭ, كەيبىر كىتاپتاردىڭ ساۋاتتى شىعارىلمايتىندىعىنا قىنجىلىسىن ءبىلدىردى.
ءوز تاجىريبەسىمەن بولىسكەن اسەل ساپاقوۆا باسپا ىسىنە كەلۋدەگى بىردەن-ءبىر سەبەبىن ءوز بالالارىنا قازاق تىلىندە كىتاپ شىعارىپ باستاعانىمەن بايلانىستىردى. وسى ورايدا قازاق تىلىندەگى بالالاردى دامىتۋ كىتاپتارىنىڭ اۆتورى بالالارعا ارنالعان ساۋاتتى ءارى كاسىبي ادەبي ورتانى دامىتۋعا ءالى دە كۇش سالۋ قاجەتتىگىن العا تارتتى.
القالى جيىنعا الماتى, استانا, ەلىمىزدىڭ باسقا دا وڭىرلەرىمەن قاتار ورتالىق ازيادان باسپاگەرلەر, اۆتورلار, يلليۋستراتورلار مەن پەداگوگتەر قاتىسىپ, بالالارعا ۇنايتىن, ولاردى بىلىمگە, ىزگىلىك پەن ىزدەنىسكە ۇندەيتىن شىعارمالار, وقۋلىقتار شىعارۋدىڭ الەمدە ورتاق ماسەلەلەرىن تالقىلاپ, تاجىريبە الماستى.