جاڭا وقۋ جىلى باستالعالى جامبىل وبلىسى تراگەديا وشاعىنا اينالدى. ەكى اپتانىڭ ىشىندە كامەلەت جاسىنا تولماعان جاسوسپىرىمدەر اراسىندا ءۇش بىردەي قايعىلى وقيعا تىركەلدى, دەپ حابارلايدى Egemen.kz.
جاسوسپىرىمدەر اراسىندا اسا اۋىر قىلمىستىڭ جيىلەپ كەتۋىنە بايلانىستى شۇعىل كەڭەس وتكىزگەن ءوڭىر باسشىسى ەربول قاراشوكەەۆ قاراماعىنداعى بىرنەشە لاۋازىمدى تۇلعاعا تارتىپتىك جازا قولداندى.
ءوڭىر باسشىسى وقۋ جىلى باستالعالى ورىن العان وقيعالارعا بايلانىستى وبلىس اكىمىنىڭ ورىنباسارى سەرىك سالەموۆكە سوگىس, تاراز قالاسىنىڭ اكىمى باقىتجان ورىنبەكوۆكە, شۋ اۋدانىنىڭ اكىمى باقىتجان جانىبەكوۆكە, وبلىستىق ءبىلىم باسقارماسىنىڭ باسشىسى نۇربەك ورشىبەكوۆكە, تاراز قالاسى اكىمىنىڭ ورىنباسارى ۇلانا سلامبەكوۆا مەن شۋ اۋدانى اكىمىنىڭ ورىنباسارى نايمان سۇلتانباەۆقا قاتاڭ سوگىس تۇرىندەگى تارتىپتىك شارا قولدانۋ ءۇشىن وبلىس اكىمى اپپاراتىنا تاپسىرما بەردى. سونداي-اق وبلىستىق ءبىلىم باسقارماسىنان تاراز قالالىق جانە شۋ اۋداندىق ءبىلىم بولىمدەرىنىڭ باسشىلارىنىڭ جانە وزگە دە جاۋاپتى تۇلعالاردىڭ اتقارىپ وتىرعان قىزمەتىنە سايكەستىگىن قاراستىرۋدى تالاپ ەتتى.
وبلىس اكىمى جاسوسپىرىمدەر اراسىنداعى قىلمىستىڭ الدىن الۋ بويىنشا شۇعىل زەردەلەۋ توبىن قۇرىپ, ءار ءبىلىم بەرۋ مەكەمەسىندە كەڭەيتىلگەن ساۋالناما جۇرگىزىپ, ونىڭ ناتيجەسى بويىنشا ءتيىستى جۇمىستاردى جەدەل ۇيىمداستىرۋدى مىندەتتەدى.
بۇل قۇرىلاتىن توپ وڭىردەگى بارلىق مەكتەپتىڭ جوعارى سىنىپ وقۋشىلارى مەن كوللەدج ستۋدەنتتەرىنىڭ قۇقىقتىق ساۋاتتىلىعىن ارتتىرۋعا, قىلمىستىڭ سالدارى مەن زاردابىن تۇسىندىرۋگە كۇش سالۋى ءتيىس. توپ جەتەكشىسى رەتىندە تاراز قالاسى جانە اۋدان اكىمدەرى جەكە جاۋاپ بەرەتىن بولادى.