ەرتىس-بايان ءوڭىرى ءومىردىڭ بارلىق ماڭىزدى سالاسىنا تسيفرلىق شەشىمدەردى جەدەلدەتىپ ەنگىزۋگە باعىت الدى. الداعى جىلدارى وڭ وزگەرىستەردى جەرگىلىكتى تۇرعىندار سەزىنە باستايدى دەپ كۇتىلىپ وتىر.
مەملەكەت باسشىسى قاسىم-جومارت توقاەۆ بيىلعى جولداۋىندا «قازاقستان ءۇش جىلدىڭ ىشىندە تسيفرلىق ەلگە اينالۋى كەرەك» دەپ ناقتى ماقسات قويعانى بەلگىلى. بۇل باعىتتاعى العاشقى جانە ناقتى قادامداردىڭ ءبىرى – ءومىردىڭ بارلىق سالاسىن تسيفرلاندىرۋ. ەرتىس بويىندا بۇل مىندەتكە نەگىزدەلگەن ءىس-قيمىل جوسپارلارى ءتۇزىلىپ, ىسكە اسا باستادى.
وبلىس ورتالىعىندا پرەزيدەنت جولداۋىن جۇزەگە اسىرۋ ماسەلەلەرىنە ارنالعان جيىن ءوتتى. ءىس-شاراعا قوعام وكىلدەرى, باسقارما باسشىلارى, قالالار مەن اۋدان اكىمدەرى قاتىستى.
ءوڭىر باسشىسى اسايىن بايحانوۆ مەملەكەت باسشىسىنىڭ العا قويعان مىندەتتەرى ايماقتىڭ نەگىزگى سالالارىنا تىكەلەي قاتىستى ەكەنىن, سوندىقتان ءاربىر قۇرىلىم مەن باسشىدان جەكە جاۋاپكەرشىلىكتى تالاپ ەتەتىنىن اتاپ ءوتتى.
– مەملەكەت باسشىسى جولداۋىنىڭ بارلىق باعىتى ءوڭىرىمىزدىڭ نەگىزگى سالالارىن قامتيدى. سوندىقتان قويىلعان مىندەتتەردى جەكە جاۋاپكەرشىلىك رەتىندە قابىلداۋىمىز كەرەك. پاۆلودار وبلىسىنىڭ ءاربىر تۇرعىنى وڭ وزگەرىستەردى سەزىنۋگە ءتيىس. ول ءۇشىن بىزگە جاڭا باستامالاردى ساپالى ءارى ءتيىمدى ىسكە اسىرۋ بويىنشا ۇيلەسىمدى, ناقتى جانە ناتيجەلى جۇمىس قاجەت, – دەدى ءوڭىر باسشىسى.
جولداۋدىڭ باستى باعىتى – تسيفرلاندىرۋدى كەڭ كولەمدە دامىتۋ, جاساندى ينتەللەكتى تەحنولوگيالارىن ەنگىزۋ. پاۆلودار وبلىسى وسى ۇدەرىستىڭ درايۆەرلەرىنىڭ ءبىرى بولۋعا نيەتتى.
«Smart Region» ستراتەگياسى اياسىندا «Smart City Pavlodar» جانە «قاۋىپسىز قالا» جوبالارى ىسكە اسىرىلىپ جاتىر. جي جانە سپۋتنيكتىك مونيتورينگ پايدالانىلا وتىرىپ, جەر رەسۋرستارىنىڭ تسيفرلىق كارتاسى, سونداي-اق وبلىس اكىمىنىڭ تاپسىرماسى بويىنشا پاۆلودار قالاسىنىڭ ينجەنەرلىك جەلىلەرىنىڭ «ينتەراكتيۆتى جىلۋ كارتاسى» ازىرلەنۋ ۇستىندە. ەكىباستۇزدا دەرەكتەردى وڭدەۋ جانە ماينينگ سالاسىندا وڭىرگە ستراتەگيالىق پوزيتسيانى قامتاماسىز ەتەتىن زاماناۋي داتا-ورتالىق سالىنىپ جاتىر.
كادرلاردى دايارلاۋ ءۇشىن جاڭا مۇمكىندىكتەر جاسالىپ, ستارتاپتاردى قولداۋ ءۇشىن زەرتحانالار مەن ءماجىلىس-زالدارى بار «Pavlodar Hub» ىسكە قوسىلدى. اقپاراتتىق تەحنولوگيالار كوللەدجىنىڭ بازاسىندا «ۇشقىشسىز ۇشۋ اپپاراتتارىنىڭ وپەراتورى» ماماندىعى اشىلدى, جوعارى تەحنولوگيالىق جوبالارعا 100 مىڭعا دەيىن ستۋدەنتتەردى تارتاتىن «AI-Sana» باعدارلاماسى جۇمىس ىستەيدى. ءوڭىر Astana Hub جانە ۋنيۆەرسيتەتتەرمەن بىرلەسىپ IT-سەكتور مەن تسيفرلىق ەكونوميكا ءۇشىن ماماندار دايارلايدى.
– جەدەلدەتىلگەن تسيفرلىق ترانسفورماتسيا مەن جاساندى ينتەللەكتىنى ەنگىزۋ – تالشىقتى-وپتيكالىق جەلىلەردى, ءموبيلدى بايلانىستى, سونداي-اق «Starlink» جانە «OneWeb» سياقتى تومەن وربيتالىق جۇيەلەرگە نەگىزدەلگەن سپۋتنيكتىك بايلانىستى دامىتۋدى كوزدەيدى. ول ءوز كەزەگىندە قوماقتى ينۆەستيتسيالار تارتۋدى تالاپ ەتەدى. 2024 جىلى «Starlink» تەحنولوگياسى وبلىسىمىزدىڭ 33 مەكتەبىندە ەنگىزىلدى, جىلدىڭ سوڭىنا دەيىن وسى تەحنولوگياعا قالعان 42 مەكتەپ قوسىلادى. وسىلايشا, اۋىل مەكتەپتەرىن ساپالى ينتەرنەتپەن قامتاماسىز ەتۋ جونىندەگى پرەزيدەنت تاپسىرماسى تولىق ورىندالادى, – دەيدى وڭىرلىك تسيفرلىق تەحنولوگيالار باسقارماسىنىڭ باسشىسى اعىباي ءامىرين.
الەۋمەتتىك سالاداعى جوبالاردى ىسكە اسىرۋعا ەرەكشە نازار اۋدارىلىپ وتىر. پاۆلوداردا بيىل 1 200 ورىندىق مەكتەپ اشىلدى. وزگە دە جاڭا وقۋ ورىندارىنىڭ قۇرىلىسى جۇرگىزىلىپ جاتىر. بۇل 2026 جىلعا قاراي 4 مىڭنان اسا وقۋشى ورنىن قۇرۋعا, ءۇش اۋىسىمدى وقىتۋدى جويۋعا مۇمكىندىك بەرەدى. دەنساۋلىق ساقتاۋ سالاسى بويىنشا اۋىلدىق جەرلەردە التى مەديتسينالىق مەكەمە سالۋ, پاۆلودارداعى №1 قالالىق اۋرۋحانانى رەكونسترۋكتسيالاۋ, جي-ءدى پايدالانا وتىرىپ دياگنوستيكا جاساۋ ءۇشىن «Forus Data» جۇيەسىن ەنگىزۋ كوزدەلگەن. تۋريزم سالاسى بويىنشا باياناۋىلدا ۆيزيت-ورتالىقتىڭ جانە سابىندىكولدە بايقاۋ الاڭىنىڭ قۇرىلىسى باستالادى. پاۆلودار مەن ەكىباستۇزدا زاماناۋي سپورت كەشەندەرى مەن مۇز سارايلارى بوي كوتەرەدى.
– ينفراقۇرىلىم مەن ەنەرگەتيكاعا ۇلكەن كوڭىل ءبولىنىپ وتىر. الداعى جىلدارى ەرتىس ارقىلى وتەتىن جاڭا كوپىر قۇرىلىسىن اياقتاۋ, ۇزىندىعى 352 كم بولاتىن اقسۋ-دەگەلەڭ-جاڭا سەمەي تەمىرجول ۋچاسكەسىن جاڭعىرتۋ, پاۆلودار اۋەجايىن قايتا جاڭارتۋ جوسپارلانعان. «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى اياسىندا 2029 جىلعا قاراي ينجەنەرلىك جەلىلەردىڭ توزۋ دەڭگەيىن ايتارلىقتاي تومەندەتۋ كوزدەلگەن. اتاپ ايتقاندا, جىلۋمەن جابدىقتاۋ جەلىلەرىن – 64%-عا دەيىن, ەلەكترمەن جابدىقتاۋ جەلىلەرىن – 52,9%-عا دەيىن, سۋمەن جابدىقتاۋ جەلىلەرىن – 46,5%-عا دەيىن, سۋ بۇرۋ جەلىلەرىن – 68,1%-عا دەيىن. ءوڭىر رەسپۋبليكادا العاشقى بولىپ قارجى مينيسترلىگىمەن وبليگاتسيالىق قارىز الۋعا قول قويدى. بولىنگەن 9,8 ملرد تەڭگە پاۆلوداردا جىلۋ ماگيسترالىن سالۋعا باعىتتالدى, بۇل 600-دەن اسا كوپقاباتتى تۇرعىن ءۇيدى ۇزدىكسىز جىلۋمەن قامتاماسىز ەتۋگە مۇمكىندىك بەرەدى, – دەيدى وبلىس اكىمىنىڭ ءبىرىنشى ورىنباسارى سەرىك باتىرعۇجينوۆ.
پاۆلودار وبلىسى ەلدىڭ يندۋستريالىق ورتالىعى رەتىندە ءوزىنىڭ پوزيتسياسىن نىعايتا تۇسۋدە. كەيىنگى ءۇش جىلدا ەكونوميكاعا 2 ترلن تەڭگەدەن اسا ينۆەستيتسيا تارتىلعان, ونىڭ 88%-ى – جەكە ينۆەستيتسيالار. جالپى قۇنى 7,4 ترلن تەڭگە بولاتىن 102 جوبا ىسكە اسىرىلۋدا, ونىڭ ىشىندە جاڭا فەرروقورىتپا جانە مەتاللۋرگيا زاۋىتتارىن قوسا العاندا 76 جوبا جالپىۇلتتىق پۋلعا ەنگىزىلدى. 2027 جىلى پاۆلوداردا الكيلات شىعاراتىن زاۋىت جۇمىسىن باستايدى, ول مۇناي-حيميا شيكىزاتىن قايتا وڭدەۋگە جاڭا مۇمكىندىكتەر اشادى. بۇگىنگى تاڭدا «پاۆلودار» اەا-نىڭ ينۆەستيتسيالىق پورتفەلى 541 ملرد تەڭگەنى قۇرايدى. وڭدەۋ سەكتورىنىڭ ءونىم كولەمى بويىنشا ءوڭىر رەسپۋبليكاداعى جەتەكشى بەستىككە كىرەدى.
اگرارلىق سەكتور دا – باسىم باعىتتاردىڭ قاتارىندا. مال شارۋاشىلىعىن دامىتۋدىڭ جانە پايدالانىلمايتىن جەرلەردى قايتارۋدىڭ كەشەندى جوسپارى ىسكە اسىرىلۋدا. 2030 جىلعا قاراي ءىرى قارا مالدى 600 مىڭ باسقا دەيىن, ال ۇساق مال باسىن 750 مىڭعا دەيىن ۇلعايتۋ جوسپاردا بار. بۇل ىشكى نارىقتى قامتۋعا جانە ەت ەكسپورتىن ەكى ەسەگە ارتتىرۋعا مۇمكىندىك بەرەدى. الداعى بەس جىلدا اگروونەركاسىپتىك كەشەندە 1 600-گە جۋىق جۇمىس ورنىن قۇرا وتىرىپ, 131 ملرد تەڭگەدەن اسا سوماعا 50 جوبا ىسكە اسىرىلادى.
جيىندى قورىتىندىلاي كەلە اسايىن بايحانوۆ 20 قىركۇيەككە دەيىن جولداۋدى ىسكە اسىرۋ بويىنشا ءىس-شارالار جوسپارىن بەكىتۋدى, قالالار مەن اۋدان اكىمدەرىنە اپتانىڭ سوڭىنا دەيىن جەرگىلىكتى جەرلەردە تالقىلاۋلار وتكىزۋدى تاپسىردى.
– ءبىزدىڭ ورتاق مىندەتىمىز – پرەزيدەنت جولداۋىنىڭ جۇيەلى ىسكە اسىرىلۋىن قامتاماسىز ەتۋ. ءاربىر قادام ءوڭىردىڭ تۇراقتىلىعىن نىعايتۋعا جانە ادامداردىڭ ءومىر ءسۇرۋ ساپاسىن ارتتىرۋعا باعىتتالۋعا ءتيىس, – دەپ اتاپ ءوتتى وبلىس باسشىسى.
وسىلايشا, پاۆلودار وبلىسى دامۋدىڭ نەگىزگى باعدارلارىن انىقتادى: تسيفرلىق وزگەرىستەر, ادامي كاپيتالدى نىعايتۋ, ينفراقۇرىلىمدى جاڭعىرتۋ, ينۆەستيتسيالىق ءوسۋ جانە الەۋمەتتىك تۇراقتىلىق. بۇل مىندەتتەردى ىسكە اسىرۋ ءوڭىردىڭ جاساندى ينتەللەكتى داۋىرىنە سەنىمدى ەنۋى ءۇشىن نەگىز بولۋعا ءتيىس.
پاۆلودار وبلىسى